ກຸນ ອາເກວໂຣ ຍິງແຮັດທຣິກທີ 11 ໃນພຣີເມຍລີກ ທຽບເທົ່າສະຖິຕິສູງສຸດ
ເຊີຈີໂອ້ ກຸນ ອາເກວໂຣ ກອງໜ້າທີມຊາດອາເຈນຕິນາ ຂອງສະໂມສອນແມນເຊັສເຕີ ຊິຕີ້ ຍິງແຮັດທຣິກ 3 ປະຕູ ຊ່ວຍຕົ້ນສັງກັດຖະຫລົ່ມ ເຊລຊີ ເຄິ່ງໂຫລ 6-0 ອີກ 3 ປະຕູໄດ້ຈາກ ຣາຮີມ ສະເຕີລິ້ງ 2 ໜ່ວຍ ແລະ ອີຄາຍ ກຸນໂດກັນ 1 ປະຕູ. ແຮັດທຣິກຄັ້ງນີ້ ກາຍເປັນແຮັດທຣິກຄັ້ງທີ 11 ໃນພຣີເມຍລີກຂອງ ອາເກວໂຣ ທຽບເທົ່າສະຖິຕິສູງສຸດຂອງ ອາລັນ ເຊຍເຣີ ອະດີດກອງໜ້າທີມຊາດອັງກິດ ແລະ ສະໂມສອນນິວຄາສເຊິນ ຢູໄນເຕັດ ໃນປີ 1992-2000 ໝາຍວ່າ ອາເກວໂຣ ມີໂອກາດທຳລາຍສະຖິຕິສູງ.
ອາເກວໂຣ ຍິງໄປແລ້ວ 17 ປະຕູໃນພຣີເມຍລີກລະດູການນີ້ ນຳດາວຍິງສູງສຸດຮ່ວມກັບ ໂມຮາເໝັດ ຊາລາ ກອງໜ້າລິເວີພູລ ລວມທຸກລາຍການຍິງໄປແລ້ວ 23 ປະຕູ ຈາກ 30 ນັດ. ຍ້າຍຈາກ ແອັດເລຕິໂກ້ ມາດຣິດ ມາຢູ່ກັບ ແມນຊິຕີ້ ໃນປີ 2011 ຍິງ 222 ຈາກ 322 ນັດ ເປັນດາວຍິງສູງສຸດຂອງສະໂມສອນ.
ສ່ວນ ເຊລຊີ ການເສຍ 0-6 ໃຫ້ ແມນຊິຕີ້ ເປັນການເສຍຂາດສຸດໃນຮອບເກືອບ 28 ປີ ຕໍ່ຈາກເສຍໃຫ້ ນ໊ອດຕິງແຮມ ຟໍເຣັສ 0-7 ໃນເດືອນເມສາ 1991. ແມນຊິຕີ້ ແຊ້ມເກົ່າ ແຊງ ລິເວີພູລ ຂຶ້ນເປັນທີມນຳອີກຄັ້ງ ມີ 65 ຄະແນນ ເທົ່າກັບ ລິເວີພູລ ແຕ່ ຊິຕີ້ ມີປະຕູໄດ້ເສຍສະເລ່ຍດີກວ່າ ລິເວີພູລ +54 ຕໍ່ +44 ແຕ່ ຊິຕີ້ ແຂ່ງຫລາຍກວ່າ 1 ນັດ. ສ່ວນ ເຊລຊີ ຕົກມາຢູ່ທີ 6 ມີ 50 ຄະແນນ ເທົ່າກັບ ອາເຊນອລ ປະຕູໄດ້ເສຍສະເລ່ຍເທົ່າກັນ +16 ແຕ່ ອາເຊນອລ ມີປະຕູຍິງໄດ້ດີກວ່າ ຍິງ 53 ເສຍ 37. ສ່ວນ ເຊລຊີ ຍິງ 45 ເສຍ 29. ນັດຕໍ່ໄປ ເຊລຊີ ຈະລົງຫລິ້ນເກມຢູໂຣປາລີກ ຮອບ 32 ທີມສຸດທ້າຍ ນັດທີ 1 ບຸກໄປຢາມ ມາວໂມ ເອັຟເອັຟ ທີມຈາກສະວີເດັນ ໃນວັນທີ 14 ກຸມພານີ້. ຂະນະທີ່ ແມນຊິຕີ້ ຈະໄປຢາມ ນິວພ໊ອດ ເຄົາຕີ້ ເກມເອັຟເອຄັບ ຮອບ 16 ທີມ ໃນວັນທີ 16 ກຸມພານີ້.
