ປະຊາຊົນອາໄສຢູ່ແຄມທາງແຕ່ໜອງບຶກ-ຕານມີໄຊເດືອດຮ້ອນຈາກຂີ້ຝຸ່ນ

ປະຊາຊົນອາໄສຢູ່ແຄມທາງແຕ່ໜອງບຶກ-ຕານມີໄຊເດືອດຮ້ອນຈາກຂີ້ຝຸ່ນ - advert banner 728 90 728x90 - ປະຊາຊົນອາໄສຢູ່ແຄມທາງແຕ່ໜອງບຶກ-ຕານມີໄຊເດືອດຮ້ອນຈາກຂີ້ຝຸ່ນ

ປະຊາຊົນທີ່ອາໄສຢູ່ແຄມເສັ້ນທາງແຕ່ສາມແຍກໜອງບຶກຫາຕານມີໄຊ ພວມໄດ້ຮັບຄວາມເດືອດຮ້ອນແຮງຈາກຈາກຂີ້ຝຸ່ນປິວໄຫງ່ ແລະ ສົ່ງຜົນກະທົບຕໍ່ສຸຂະພາບຂອງເຂົາເຈົ້າ, ໂດຍສະເພາະຜູ້ເຖົ້າ ແລະ ເດັກນ້ອຍຍິ່ງໜ້າເປັນຫວ່ງ. ພາຍຫລັງມີການປັບປຸງກໍ່ສ້າງເສັ້ນທາງດັ່ງກ່າວມາເປັນເວລາກວ່າ 3 ປີແລ້ວແຕ່ຍັງບໍ່ສໍາເລັດ.

ປະຊາຊົນອາໄສຢູ່ແຄມທາງແຕ່ໜອງບຶກ-ຕານມີໄຊເດືອດຮ້ອນຈາກຂີ້ຝຸ່ນ - lattana 1 - ປະຊາຊົນອາໄສຢູ່ແຄມທາງແຕ່ໜອງບຶກ-ຕານມີໄຊເດືອດຮ້ອນຈາກຂີ້ຝຸ່ນ

  ຕໍ່ສະພາບດັ່ງກ່າວ, ນັກຂ່າວໜັງສືພີມລາວພັດທະນາໄດ້ໄປຕິດຕາມເບິ່ງສະພາບຕົວຈິງ ແລະ ເຫັນວ່າມີສະພາບຂີ້ຝຸ່ນໄຫງ່ຮຸນແຮງແທ້ ຍ້ອນມີລົດສັນຈອນໄປມາຢ່າງບໍ່ຂາດສາຍບວກກັບເສັ້ນທາງດັ່ງກ່າວຢູ່ໃນໄລຍະກໍ່ສ້າງ. ຕາມການສໍາພາດຫົວຫນ້າຮັບພິຊອບໂຄງການກໍ່ສ້າງເສັ້ນທາງດັ່ງກ່າວໃຫ້ຮູ້ວ່າ: ທາງສາຍນີ້ມີຄວາມຍາວ 9 ກວ່າກິໂລແມັດ ນັບແຕ່ສາມແຍກໜອງບຶກຫາສີແຍກໄຟແດງຕານມີໄຊ ໂດຍຈະສ້າງເປັນທາງເບຕົງ ລວມມີມູນຄ່າກໍ່ສ້າງ 45 ລ້ານກວ່າໂດລາສະຫະລັດ, ຊຶ່ງໄດ້ເລີ່ມມາແຕ່ປີ 2016 ແລະ ຕາມສັນຍາແມ່ນຈະໃຫ້ສໍາເລັດໃນໄລຍະເວລາ 2 ປີ, ແຕ່ຜ່ານການປະຕິບັດຕົວຈິງມາຮອດປັດຈຸບັນສາມາດປູເບຕົງນັບແຕ່ສີ່ແຍກໄຟແດງຕານມີໄຊມາແລ້ວພຽງ 5 ກວ່າກິໂລແມັດ ຍ້ອນບໍລິສັດຜູ້ຮັບເໝົາບໍ່ມີທຶນທີ່ຈະມາສຸມໃສ່ໃຫ້ການກໍ່ສ້າງສໍາເລັດໂດຍໄວໄດ້, ຈຶ່ງເຮັດໃຫ້ເກີດສະພາບທີ່ບໍ່ສະດວກອື່ນໆຕາມມາ ເປັນຕົ້ນການສັນຈອນມີຄວາມຫຍຸ້ງຍາກ, ເປັນບວກເປັນຂຸມ ແລະ ມີຂີ້ຝຸ່ນໄຫງຕະຫລອດວັນ, ອັນໄດ້ສົ່ງຜົນກະທົບຕໍ່ການດໍາລົງຊີວິດຂອງປະຊາຊົນຢູ່ໃກ້ຄຽງຢ່າງຮຸນແຮງ, ເຖິງວ່າໃນແຕ່ລະວັນກໍມີລົດເອົານໍ້າມາຫົດທາງ 3-4 ຖ້ຽວເພື່ອຫລຸດຜ່ອນສະພາບຂີ້ຝຸ່ນ ແຕ່ກໍແກ້ໄຂໄດ້ຊົ່ວຄາວເທົ່ານັ້ນ, ປັດຈຸບັນ ປະຊາຊົນແມ່ນມີຄວາມລໍາບາກຫລາຍຕໍ່ການໃຊ້ຊີວິດຂອງເຂົາເຈົ້າ, ເຮືອນຊານບ້ານຊ່ອງເຕັມແຕ່ຂີ້ຝຸ່ນ ແລະ ສົ່ງຜົນກະທົບຕໍ່ສຸຂະພາບ, ໂດຍສະເພາະແມ່ນຜູ້ເຖົ້າ ແລະ ເດັກນ້ອຍ, ເຮືອນຫລາຍຫລັງໄດ້ອັດປະຕູຕະຫລອດ 24 ຊົ່ວໂມງ, ບາງຄອບຄົວຈໍາເປັນຕ້ອງໄດ້ຍົກຍ້າຍໄປຢູ່ບ່ອນອື່ນ ແລະ ຮ້ານອາຫານຕ່າງໆແມ່ນຢຸດກິດຈະການໄປຕາມໆກັນຍ້ອນບັນຫາຂີ້ຝຸ່ນ.

   ຕໍ່ສະພາບດັ່ງກ່າວ, ປະຊາຊົນສະເໜີໃຫ້ພາກລັດກ່ຽວຂ້ອງມີມາດຕະການ ຊຸກຍູ້ຜູ້ຮັບເໝົາໃຫ້ເລັ່ງການກໍ່ສ້າງໄວຂຶ້ນ ຫລື ຊອກຫາບໍລິສັດອື່ນທີ່ມີຄວາມອາດສາມາດມາດໍາເນີນການກໍ່ສ້າງແທນ ເພື່ອສາມາດແກ້ໄຂຄວາມເດືອດຮ້ອນຕ່າງໆຂອງປະຊາຊົນໃຫ້ໝົດໄປ.