ປີທ່ອງທ່ຽວລາວ 2018 ສ້າງລາຍຮັບເຂົ້າປະເທດໄດ້ຫລາຍກວ່າ 755 ລ້ານໂດລາສະຫະລັດ

  ກອງປະຊຸມສະຫລຸບການຈັດຕັ້ງປະຕິບັດກິດຈະກໍາສົ່ງເສີມປີທ່ອງທ່ຽວລາວ 2018 ໄດ້ຈັດຂຶ້ນໃນວັນທີ 11 ກຸມພານີ້ຢູ່ທີ່ຫໍວັດທະນະທໍາແຫ່ງຊາດ, ໂດຍການໃຫ້ກຽດເຂົ້າຮ່ວມຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະຊີ້ນໍາລະດັບຊາດຈັດປີທ່ອງທ່ຽວລາວ 2018, ມີບັນດາລັດຖະມົນຕີ, ທູຕານຸທູດ, ອົງການສາກົນ ແລະ ມວນຊົນຊາວນະຄອນຫລວງວຽງຈັນເຂົ້າຮ່ວມເປັນຈໍານວນຫລາຍ.

  ທ່ານລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ບໍ່ແສງຄໍາ ວົງດາລາ ໄດ້ຂຶ້ນລາຍງານວ່າ: ລັດຖະບານ, ໄດ້ຖືເອົາວຽກງານການທ່ອງທ່ຽວເປັນຂະແໜງເສດຖະກິດສໍາຄັນ ເພື່ອປະກອບສ່ວນເຂົ້າໃນການພັດທະນາເສດຖະກິດຂອງຊາດ, ຈຶ່ງໄດ້ເຫັນດີຕົກລົງໃຫ້ຈັດປີທ່ອງທ່ຽວລາວ 2018 ຂຶ້ນຢ່າງເປັນທາງການ ແລະ ເປັນໜ້າທີ່ຂອງທຸກຂະແໜງການນັບທັງສູນກາງ, ທ້ອງຖິ່ນ, ພາກລັດ, ພາກເອກະຊົນ, ທຸລະກິດ ແລະ ທົ່ວປວງຊົນທັງຊາດ, ໂດຍການຈັດກິດຈະກໍາສົ່ງເສີມການທ່ອງທ່ຽວຢ່າງຄືກຄື້ນ ຕາມທ່າແຮງດ້ານການທ່ອງທ່ຽວພາຍໃນທ້ອງຖິ່ນຕົນດ້ວຍບັນຍາກາດຟົດຟື້ນ, ພ້ອມນີ້, ລັດຖະບານໄດ້ມີນະໂຍບາຍພິເສດດ້ວຍການຍົກເວັ້ນຄ່າທໍານຽມວີຊາໃຫ້ 4 ປະເທດໃນຊ່ວງໄລຍະປີທ່ອງທ່ຽວຄື: ເດນມາກ, ແຟງລັງ, ນອກແວ ແລະ ຊຸແອດ. ນອກນີ້, ລັດຖະບານໄດ້ສະໜອງງົບປະມານຈໍານວນໜຶ່ງເພື່ອປັບປຸງພື້ນຖານໂຄງລ່າງ ແລະ ແຫລ່ງທ່ອງທ່ຽວໃຫ້ມີຄວາມສະດວກ, ມີຄຸນນະພາບ ແລະ ການບໍລິການທີ່ດີ ແລະ ສາມາດດຶງດູດນັກທ່ອງທ່ຽວເຂົ້າມາປະເທດເຮົາຫລາຍກວ່າ 4,1 ລ້ານເທື່ອຄົນ, ເພີ່ມຂຶ້ນ 8,2% ເມື່ອທຽບໃສ່ປີ 2017 ແລະ ສ້າງລາຍຮັບເຂົ້າປະເທດໄດ້ຫລາຍກວ່າ 755 ລ້ານໂດລາສະຫະລັດ. ຜ່ານການຈັດປີທ່ອງທ່ຽວ 2018 ໄດ້ເຮັດໃຫ້ທຸກພາກສ່ວນສັງຄົມໄດ້ຮັບຮູ້ ແລະ ມີສ່ວນຮ່ວມໃນການພັດທະນາ, ພາກທຸລະກິດໄດ້ປະກອບສ່ວນເຂົ້າໃນການລົງທຶນພັດທະນາການທ່ອງທ່ຽວຕາມແນວທາງນະໂຍບາຍຂອງພັກ-ລັດຖະບານ, ໄປຄຽງຄູ່ກັນນັ້ນ, ກໍເຫັນວ່າສະຖານທີ່ທ່ອງທ່ຽວຫລາຍແຫ່ງຍັງບໍ່ທັນໄດ້ຮັບການພັດທະນາເທົ່າທີ່ຄວນ, ກິດຈະກໍາບໍ່ຫລາກຫລາຍ, ຜະລິດຕະພັນໃໝ່ໃນການທ່ອງທ່ຽວຍັງມີໜ້ອຍ, ພື້ນຖານໂຄງລ່າງ ແລະ ສິ່ງໍານວຍຄວາມສະດວກດ້ານຕ່າງໆຍັງບໍ່ທັນສະດວກ, ເສັ້ນທາງເຂົ້າສູ່ແຫລ່ງທ່ອງທ່ຽວຫລາຍແຫ່ງຍັງຫຍຸ້ງຍາກ ແລະ ເຂົ້າໄດ້ແຕ່ລະດູແລ້ງ, ເສັ້ນທາງເຊື່ອມຕໍ່ ຫລື ສາຍການບິນໂດຍກົງເຊື່ອມຕໍ່ກັບຕະຫລາດເປົ້າໝາຍທາງໄກຍັງມີໜ້ອຍ, ການໂຄສະນາການທ່ອງທ່ຽວຍັງບໍ່ກວ້າງຂວາງ ແລະ ບໍ່ຫລາກຫລາຍ, ການກວດຄົນເຂົ້າ-ອອກເມືອງຍັງມີຫລາຍຂັ້ນຕອນ, ຊັກຊ້າ, ມີການປັບໃໝລົດຂົນສົ່ງນັກທ່ອງທ່ຽວຊໍ້າຊ້ອນຕາມສາຍທາງຕ່າງໆ. ສະນັ້ນໃນຕໍ່ໜ້ານີ້, ສະເໜີສືບຕໍ່ຖືເອົາວຽກງານການທ່ອງທ່ຽວເປັນວຽກຈຸດສຸມຂອງລັດຖະບານ, ສືບຕໍ່ແກ້ໄຂບັນດາສິ່ງກີດຂວາງຕ່າງໆ ແລະ ສິ່ງທີ່ສ້າງຜົນກະທົບຕໍ່ແຫລ່ງທ່ອງທ່ຽວ ເຊັ່ນ: ການເຂົ້າ-ອອກເມືອງ, ການກວດກາປັບໃໝຕາມເສັ້ນທາງ ແລະ ແຫລ່ງທ່ອງທ່ຽວ, ການເກັບຄ່າທໍານຽມ ຫລື ຄ່າບໍລິການນອກລະບົບ, ກໍານົດຄ່າພັກເຊົາ, ອາຫານການກິນທີ່ມີລາຄາແພງເກີນຈິງ ແລະ ຄວນຫລຸດຜ່ອນຄ່າທໍານຽມວີຊາ ຫລື ຍົກເວັ້ນວີຊາໃຫ້ປະເທດທີ່ເປັນຕະຫລາດເປົ້າໝາຍການທ່ອງທ່ຽວຂອງພວກເຮົາ. ຈາກນີ້ ຈຶ່ງຈະເຮັດໃຫ້ການທ່ອງທ່ຽວປະເທດເຮົາກາຍເປັນອຸດສາຫະກໍາທັນສະໄໝດີຂຶ້ນ, ພິເສດແມ່ນຈະກະຕຸກຊຸກຍູ້ໃຫ້ປີທ່ອງທ່ຽວລາວ-ຈີນ 2019 ນີ້ປະ ສົບຜົນສໍາເລັດຍິ່ງໃຫຍ່ກວ່າເກົ່າ.