ບໍລິສັດ ອີຊູຊຸ ລາວບໍລິການ ແຈກໂຊກຄັ້ງຍິ່ງໃຫຍ່
ໃນວັນທີ 9 ກຸມພານີ້, ບໍລິສັດ ອີຊູຊຸ ລາວບໍລິການ ຈໍາກັດຜູ້ດຽວ (ISUZU LAOSERVICE) ໄດ້ຈັດງານຊິງໂຊກຄັ້ງຍິ່ງໃຫຍ່ ເພື່ອຄືນກໍາໄລໃຫ້ລູກຄ້າ ຂຶ້ນທີ່ບໍລິສັດຂອງຕົນ ຢູ່ບ້ານນາເລົ່າ (ເຂດທົ່ງປົ່ງ) ເມືອງສີໂຄດຕະບອງ ນະຄອນຫລວງວຽງຈັນ, ໂດຍການເຂົ້າຮ່ວມຂອງທ່ານ ທ່ານ ວິຣະໄຊຄໍາ ພິລາພັນເດຊ ອໍານວຍການບໍລິສັດ ອີຊູຊຸ ລາວບໍລິການ ຈໍາກັດຜູ້ດຽວ, ມີຜູ້ຈັດການຝ່າຍບໍລິການຫລັງການຂາຍ, ຜູ້ຈັດການຝ່າຍບັນຊີ, ຜູ້ຈັດການຝ່າຍຂາຍ ພ້ອມດ້ວຍລູກຄ້າເຂົ້າຮ່ວມຢ່າງຫລວງຫລາຍ.
ທ່ານ ວິຣະໄຊຄໍາ ພິລາພັນເດຊ ໃຫ້ຮູ້ວ່າ: ການຊິງໂຊກດ່ັງກ່າວ ແມ່ນໄດ້ຈັດຂຶ້ນເປັນປະຈໍາໃນເດືອນກຸມພາ ຂອງທຸກໆປີ, ເຊິ່ງປີນີ້ກໍເປັນປີທີ 6 ແລ້ວທີ່ທາງບໍລິສັດ ໄດ້ຈັດຂຶ້ນເພື່ອຄືນກໍາໄລໃຫ້ແກ່ລູກຄ້າທີ່ມາໃຊ້ບໍລິການ ແລະ ກໍນັບວ່າເປັນຄວາມພາກພູມໃຈຢ່າງຍິ່ງທີ່ເຫັນວ່າການດໍາເນີນທຸລະກິດຂອງອີຊູຊຸພວກເຮົາໄດ້ມີການຂະຫຍາຍຕົວຢ່າງຕໍ່ເນື່ອງ,
ພ້ອມກັນນັ້ນກໍໄດ້ເອົາໃຈໃສ່ ປະກອບສ່ວນຊ່ວຍເຫລືອສັງຄົມອັນເປັນວຽກບູລິມະສິດສໍາຄັນຂອງບໍລິສັດພວກເຮົາ
ເຊິ່ງອັນພົ້ນເດັ່ນໃນຜ່ານມາແມ່ນໄດ້ຮ່ວມມືກັບອົງການກາແດງລາວຈັດຕັ້ງກ່ອງບໍລິຈາກຂຶ້ນຢູ່ສູນອີຊູຊຸເພື່ອຫັກເງິນຈາກການຂາຍລົດແສນກີບຕໍ່ຄັນໃສ່ກ່ອງດັ່ງກ່າວເພື່ອສົມທົບທຶນຊື້ອຸປະກອນການສຶກສາ
ແລະ ຊ່ວຍເຈາະນໍ້າບາດານໃຫ້ໂຮງຮຽນປະຖົມແຫ່ງຕ່າງໆ. ນອກນີ້ຍັງໄດ້ມີກິດຈະກໍາຄາລາວານລົດອີຊູຊຸນໍາເຄື່ອງຊ່ວຍເຫລືອຈໍານວນໜຶ່ງໄປມອບໃຫ້ປະຊາຊົນຜູ້ທຸກຍາກຂາດເຂີນໃນເຂດຫ່າງໄກສອກຫລີກຕ່າງໆ,
ພ້ອມໄດ້ສະໜັບສະໜູນການແຂ່ງຂັນລົດວິບາກ, ມອບເຄື່ອງອຸປະໂພກ-ບໍລິໂພກຈໍານວນໜຶ່ງໄປຊ່ວຍປະຊາຊົນທີ່ໄດ້ຮັບຜົນກະທົບຈາກໄພນໍ້າຖ້ວມໃນຫລາຍໆເຂດ.
ສໍາລັບການຊິງໂຊກໃນຄັ້ງນີ້ ລວມມີ 100 ກວ່າລາງວັນຄື: ລາງວັນທີ່ມີໜຶ່ງຜູ້ໂຊກດີໄດ້ຮັບຈັກຊັກເຄື່ອງ 1 ລາງວັນ, ລາງວັນທີ 2 ໂທລະພາບສີ 32 ນິ້ວ 1 ລາງວັນ, ລາງວັນທີ 3 ມີ 2 ລາງວັນຜູ້ໂຊກດີຈະໄດ້ຮັບຕູ້ເຢັນ, ລາງວັນທີ 4 ມີ 6 ລາງວັນຜູ້ໂຊກດີຈະໄດ້ຮັບພັດລົມຕັ້ງໂຕະ ແລະ ລາງວັນອັນອື່ນໆອີກຢ່າງຫລວງຫລາຍ, ພິເສດແມ່ນທຶນການສຶກສາມີ 4 ລາງວັນຄື: ລາງວັນທີ 1 ຈະໄດ້ຮັບເງິນ 2 ລ້ານກີບ, ລາງວັນທີ 2 ຈະໄດ້ຮັບເງິນ 1,5 ລ້ານກີບ, ລາງວັນທີ 3 ຈະໄດ້ຮັບເງິນ 1 ລ້ານກີບ ແລະ ລາງວັນທີ 4 ຈະໄດ້ຮັບເງິນ 5 ແສນກີບ. ນອກນີ້ຍັງມີລາງວັນສໍາລັບລູກຄ້າຜູ້ໃດຊື້ລົດຈາກບໍລິສັດໃນປີ 2018, ສາຍຄໍຄໍາໜັກ 1 ບາດ ມີ 5 ລາງວັນ, ລາງວັນຜູ້ຂັບຂີ່ລົດ ອີຊູຊຸ ດີເດັ່ນ ແລະ ລາງວັນຜູ້ຮ່ວມຫລິ້ນເກມຖາມ-ຕອບຄວາມຮູ້ຕ່າງໆກ່ຽວກັບລົດ ອີຊູຊຸຕື່ມອີກຢ່າງຫລາຍລາງວັນ. ພິເສດສໍາລັບລູກຄ້າທີຈອງລົດໃນມື້ນີ້ສາມາດລຸ້ນຮັບລາງວັນທີ 1 ສາຍຄໍຄໍາໜັກ 2 ບາດ, ລາງວັນທີ 2 ສາຍຄໍຄໍາໜັກ 1 ບາດ ແລະ ລາງວັນທີ 3 ສາຍຄໍຄໍາໜັກ 2 ສະຫລຶງ ແລະ ລາງວັນອື່ນໆອີກຄື: ທ່ານ ວິ້ງ ມະນີລະສິດ ໄດ້ຮັບ 2 ສະລຶງ, ທ່ານ ໜູມາກ ໄດ້ຮັບສາຍຄໍຄໍາໜັກ 1 ບາດ, ທ່ານ ບົວແສງ ແສງສີວົງ ໄດ້ຮັບສາຍຄໍຄໍາໜັກ 2 ບາດ.
