ເຕືອນໄວຮຸ່ນໂລກເຄິ່ງໜຶ່ງ ສ່ຽງເສຍຫູເພາະຟັງເພງດັງດົນໆ
ອົງການລະດັບໂລກເຕືອນວ່າ: ໄວຮຸ່ນກວ່າ 1.000 ລ້ານຄົນ ຫລື ປະມານເຄິ່ງໜຶ່ງຂອງໄວຮຸ່ນທົ່ວໂລກ ສ່ຽງມີບັນຫາໃນການໄດ້ຍິນ ເພາະຟັງເພງສຽງດັງຈາກໂທລະສັບມືຖື ແລະ ເຄື່ອງສຽງອື່ນໆຕໍ່ເນື່ອງເປັນເວລາດົນ.
ອົງການອະນາໄມໂລກເຕືອນວ່າ: ປະມານເຄິ່ງໜຶ່ງຂອງຄົນອາຍຸ 12-35 ປີ ທົ່ວໂລກສ່ຽງມີບັນຫາໃນການໄດ້ຍິນ ເປັນຜົນມາຈາກການຟັງສຽງດັງເປັນເວລາດົນນານ ແລະ ຕໍ່ເນື່ອງ, ໄວຮຸ່ນຈະຕ້ອງເນັ້ນໜັກວ່າ: ຖ້າສູນເສຍການໄດ້ຍິນແລ້ວຈະບໍ່ສາມາດກັບມາເປັນປົກກະຕິໄດ້ຄືເກົ່າ, ປັດຈຸບັນທົ່ວໂລກມີຜູ້ສູນເສຍການໄດ້ຍິນ 466 ລ້ານຄົນ ຄິດເປັນ 5% ຂອງປະຊາກອນໂລກ ໃນຈຳນວນນີ້ 34 ລ້ານຄົນເປັນເດັກ, ແຕ່ຍັງບໍ່ມີຂໍ້ມູນແນ່ນອນວ່າເກີດຈາກການຟັງເພງສຽງດັງຈຳນວນເທົ່າໃດ, ພ້ອມແນະນຳວ່າ: ບໍ່ຄວນຟັງສຽງດັງເກີນ 85 ເດຊິເບລ ເປັນເວລາຕິດຕໍ່ກັນ 8 ຊົ່ວໂມງ ຫລື ເກີນ 100 ເດຊິເບລ ເປັນເວລາ 15 ນາທີ.
ອົງການອະນາໄມໂລກ ຮ່ວມກັບສະຫະພາບໂທລະຄົມມະນາຄົມສາກົນ ອອກມາດຕະຖານການຜະລິດ ແລະ ການໃຊ້ເຄື່ອງສຽງທີ່ບໍ່ບັງຄັບ ເອີ້ນວ່າ: ມາດຕະຖານລະບົບ ແລະ ອຸປະກອນການຟັງ Safe ສະເໜີໃຫ້ຕິດຕັ້ງຊັອບແວຄວບຄຸມສຽງໃນເຄື່ອງສຽງທຸກອັນ ເພື່ອຕິດຕາມລະດັບຄວາມດັງຂອງສຽງ, ໄລຍະເວລາການຟັງ ແລະ ຕີລາຄາຄວາມສ່ຽງຕໍ່ການໄດ້ຍິນ ແລ້ວແຈ້ງເຕືອນເມື່ອຜູ້ໃຊ້ມີພຶດຕິກຳການຟັງທີ່ເປັນອັນຕະລາຍ, ຄຽງຄູ່ກັບການມີລະບົບຄວບຄຸມສຽງທີ່ຕົ້ນກຳເນີດ ແລະ ຄວບຄຸມສຽງອັດຕະໂນມັດ ເພື່ອປ້ອງກັນການໃຊ້ໃນທາງທີ່ເປັນອັນຕະລາຍ, ເຖິງວ່າປັດຈຸບັນ ໂທລະສັບມືຖື ແລະ ເຄື່ອງສຽງບາງຊະນິດມີລະບົບແບບນີ້ແລ້ວ, ແຕ່ອົງການອະນາໄມໂລກຢາກໃຫ້ເປັນມາດຕະຖານດຽວກັນທົ່ວໂລກ.
