ຍີ່ປຸ່ນສະໜອງທຶນ 3 ແສນກວ່າໂດລາການຮັກສາສຸຂະພາບປາກ-ແຂ້ວ.
ແຫລ່ງຂ່າວ
ຂປລ ລັດຖະບານຍີ່ປຸ່ນໄດ້ຕົກລົງສະໜອງທຶນຊ່ວຍເຫລືອລ້າໃຫ້ ສປປ ລາວ ຫລາຍກວ່າ 320.000 ໂດລາສະຫະລັດ ເຂົ້າໃນໂຄງການບໍລິການດ້ານສຸຂະພາບປາກ ແລະ ແຂ້ວ
ຢູ່ນະຄອນຫລວງວຽງຈັນ, ແຂວງວຽງຈັນ, ບໍລິຄຳໄຊ, ຄຳມ່ວນ ແລະ ແຂວງ ສະຫວັນນະເຂດ.
ການເຊັນສັນ ຍາໂຄງການຊ່ວຍເຫລືອດັ່ງກ່າວ, ໄດ້ມີຂຶ້ນໃນວັນທີ 13 ກຸມພານີ້
ລະຫວ່າງທ່ານ ທາເຄຊິ ຮິຄິຮາຣະ ເອກອັກຄະຣາຊະທູດຍີ່ປຸ່ນ ປະຈຳລາວ ແລະ ທ່ານ
ທາຄາຊິ ມິຢາຕະ ຫົວໜ້າອົງການຊ່ວຍເຫລືອສາກົນ ທາງດ້ານການສຶກສາທັນຕະກຳແຫ່ງປະເທດຍີ່ປຸ່ນ.
ໂຄງການດັ່ງກ່າວ, ມີເປົ້າໝາຍຈັດຕັ້ງການບໍລິການສຸຂະພາບປາກ ແລະ ແຂ້ວ ແລະ ຊ່ວຍຫລຸດຈຳນວນການຕິດເຊື້ອຈາກພະຍາດ ລວມໄປເຖິງພະຍາດແຂ້ວ ແລະ ປາກ ໃນສປປ ລາວ, ອົງການຊ່ວຍເຫລືອສາກົນ ທາງດ້ານການສຶກສາທັນຕະກຳ ແຫ່ງ ປະເທດຍີ່ປຸ່ນ ຈະສ້າງພື້ນຖານທີ່ລວມສູນການສຸກຂະສຶກສາດ້ານແຂ້ວ ແລະ ປາກ ໃນນະຄອນຫລວງວຽງຈັນ ແລະ ໃຫ້ຄວາມຮູ້ແກ່ພະຍາບານໃນຂອບເຂດທົ່ວປະເທດ. ນອກນັ້ນ, ອົງການດັ່ງກ່າວຍັງໄດ້ຊື້ລົດເມຂົນສົ່ງ ແລະ ຈັດຝຶກອົບຮົມຕົວຈິງ ກ່ຽວກັບການພະ ຍາບານທົ່ວໄປໃຫ້ 4 ແຂວງ ມີ ແຂວງວຽງຈັນ, ບໍລິຄຳໄຊ, ຄຳມ່ວນ ແລະ ແຂວງສະຫວັນນະເຂດອີກດ້ວຍ.
