ຢູຟາ ອາດຫ້າມ ຣາມອສ ເພີ່ມເປັນ 2 ນັດ ຫລັງຍອມຮັບຕັ້ງໃຈຖືກໃບເຫລືອງ
ເຊຄິໂອ ຣາມອສ ກອງຫລັງຄົນດັງຂອງ ຣີລ ມາດຣິດ ສະໂມສອນຍັກໃຫຍ່ແຫ່ງ ລາ ລີກາ ສະເປນ ມີໂອກາດຖືກສະຫະພັນບານເຕະເອີຣົບ (ຢູຟາ) ຫ້າມລົງສະໜາມເພີ່ມເປັນ 2 ນັດ ຫລັງຈາກລາວໃຫ້ສຳພາດວ່າຕັ້ງໃຈເຮັດໃຫ້ຕົນເອງຖືກໃບເຫລືອງ ໃນເກມ ຢູຟາ ແຊມປ້ຽນລີກ ຮອບ 16 ທີມສຸດທ້າຍ ນັດທຳອິດ ທີ່ຕົ້ນສັງກັດບຸກໄປຊະນະ ອາແຈ໊ກ ອຳສະເຕີດຳ 2-1 ໃນວັນທີ 13 ກຸມພາຜ່ານມາ. ຕາມການເປີດເຜີຍຂອງ ເດລີ ເມລ ສື່ຂອງປະເທດອັງກິດ.
ໃນນາທີ 89 ຂອງນັດດັ່ງກ່າວ ເຊິ່ງເປັນໄລຍະ 2 ນາທີຫລັງຈາກ ຣີລ ມາດຣິດ ຂຶ້ນນຳເປັນ 2-1 ນັ້ນ, ຣາມອລ ໄປເຂົ້າສະກັດ ແຄສເປີ ດອລເບິກ ຜູ້ຫລິ້ນຂອງເຈົ້າຖິ່ນ ສົ່ງຜົນໃຫ້ລາວໄດ້ຮັບໃບເຫລືອງທັນທີ.
ເຖິງຢ່າງໃດກໍຕາມ ບັນຫາກໍຄືນີ້ເປັນໃບເຫລືອງໃບທີ 3 ຂອງ ຣາມອລ ກັບການຫລິ້ນ ແຊມປ້ຽນລີກ ລະດູການນີ້ ເຮັດໃຫ້ລາວຈະຖືກໂທດຫ້າມລົງຫລິ້ນໃນນັດໜ້າ ເຊິ່ງຫລາຍຄົນເບິ່ງວ່າລາວຕັ້ງໃຈຈະສະສົມໃບເຫລືອງໃຫ້ຄົບໃນເກມຜ່ານມາ ເພື່ອຈະເປັນການລ້າງໃບເຫລືອງກ່ອນລົງຫລິ້ນຮອບກ່ອນຮອງຊະນະເລີດທີ່ອາດຈະເປັນງານຍາກກວ່າ ແລະ ຫລັງຈົບເກມນັ້ນ ລາວໄດ້ອອກມາຍອມຮັບວ່າຕັ້ງໃຈເຮັດໃຫ້ຕົນເອງໄດ້ໃບເຫລືອງແທ້.
ທັງນີ້ ຕາມກົດຂອງ ຢູຟາ ລະບຸໄວ້ວ່າ: ນັກເຕະຄົນໃດກໍຕາມທີ່ຕັ້ງໃຈເຮັດໃຫ້ຕົນເອງໄດ້ຮັບໃບເຫລືອງ ຫລື ໃບແດງ ຈະຖືກໂທດຫ້າມລົງສະໜາມເພີ່ມເປັນ 2 ນັດ ຫລື ຕາມໄລຍະເວລາໃດເວລາໜຶ່ງ.
