ລາວ-ບຣູໄນ ດາຣູຊາລາມ ເສີມຂະຫຍາຍສາຍພົວພັນຮ່ວມມືສອງຝ່າຍ
ມັນເປັນນິມິດໝາຍອັນໃໝ່ແຫ່ງການເສີມຂະຫຍາຍສາຍພົວພັນຮ່ວມມືລະຫວ່າງ ສປປ ລາວ ແລະ ບຣູໄນ ດາຣູຊາລາມ, ພາຍຫລັງການຢ້ຽມຢາມຢ່າງເປັນທາງການຂອງທ່ານນາຍົກລັດຖະມົນຕີ ທອງລຸນ ສີສຸລິດ ໃນວັນທີ 16-17 ກຸມພານີ້ ຕາມຄຳເຊີນຂອງ ສົມເດັດ ຊຸນຕານ ຮາຈິ ຮັດຊາມານ ໂບນເກຍ ແຫ່ງບຣູໄນ ດາຣູຊາລາມ ເຊິ່ງເປັນການຢ້ຽມຢາມຄັ້ງທຳອິດ ນັບແຕ່ທ່ານໄດ້ດຳລົງຕຳແໜ່ງເປັນນາຍົກລັດຖະມົນຕີ ແຫ່ງ ສປປ ລາວ.
ໃນການພົບປະ ສອງຝ່າຍຕ່າງກໍໄດ້ຕີລາຄາສູງຕໍ່ສາຍພົວພັນຮ່ວມມືທີ່ດີຂອງສອງປະເທດ ເຊິ່ງນັບມື້ໄດ້ຮັບການເສີມຂະຫຍາຍດີຂຶ້ນເລື້ອຍໆ, ພິເສດແມ່ນພາຍຫລັງສອງປະເທດໄດ້ສ້າງຕັ້ງສາຍພົວພັນການທູດນຳກັນມາແຕ່ວັນທີ 27/7/1993 ເປັນຕົ້ນມາ ແລະ ໃນໂອກາດດຽວກັນ, ສອງຝ່າຍໄດ້ຮ່ວມປຶກສາຫາລືກັນຫລາຍດ້ານ ເພື່ອເພີ່ມທະວີການພົວພັນຮ່ວມມືທາງດ້ານເສດຖະກິດ, ການສຶກສາ, ວັດທະນະທຳ, ການທ່ອງທ່ຽວ ແລະ ອື່ນໆ. ຈາກນັ້ນ ທ່ານນາຍົກລັດຖະມົນຕີ ທອງລຸນ ສີສຸລິດ ແລະ ສົມເດັດ ຊຸນຕານ ຮາຈິ ຮັດຊານານ ໂບນເກຍ ກໍໄດ້ເຂົ້າເປັນສັກຂີພະຍານໃນການຮ່ວມລົງນາມບົດບັນທຶກຄວາມເຂົ້າໃຈວ່າດ້ວຍການຮ່ວມມືດ້ານການສຶກສາ ລະຫວ່າງສອງປະເທດທີ່ມີມາແລ້ວນັ້ນໃຫ້ກ້າວສູ່ລວງເລິກ.
ໃນໄລຍະການຢ້ຽມຢາມພາກທຸລະກິດ ກໍໄດ້ຈັດກອງປະຊຸມຮ່ວມລະຫວ່າງສອງຝ່າຍ ເພື່ອປຶກສາຫາລືຊອກຫາຊ່ອງທາງໃນການພົວພັນຮ່ວມມືແລກປ່ຽນຂໍ້ມູນຂ່າວສານໃນດ້ານເສດຖະກິດນຳກັນໃຫ້ຫລາຍຂຶ້ນ, ປັດຈຸບັນ ລັດຖະບານລາວ ໄດ້ມີນະໂຍບາຍສົ່ງເສີມການລົງທຶນໃນຂະແໜງກະສິກຳສະອາດ ແລະ ເປັນມິດຕໍ່ສິ່ງແວດລ້ອມ. ດັ່ງນັ້ນ ຈຶ່ງເຊີນຊວນໃຫ້ນັກທຸລະກິດບຣູໄນໄດ້ມາລົງທຶນຢູ່ລາວໃຫ້ຫລາຍຂຶ້ນ.
ໃນໄລຍະຜ່ານມາ, ລັດຖະບານບຣູໄນ ໄດ້ໃຫ້ການສະໜັບສະໜູນຊ່ວຍເຫລືອລາວຫລາຍດ້ານເຊັ່ນ: ການພັດທະນາຊັບພະຍາກອນມະນຸດ ເປັນຕົ້ນແມ່ນໃຫ້ທຶນການສຶກສາ, ການຝຶກອົບຮົມພາສາອັງກິດ, ການຊ່ວຍເຫລືອດ້ານການເງິນ ກໍຄືການສ້າງສູນສຶກສາສຳລັບເດັກພິການທາງສາຍຕາ, ການປັບປຸງຫ້ອງວາງສະແດງສິນສາຍໄໝຂອງສະຫະພັນແມ່ຍິງ ແລະ ສູນຝຶກອົບຮົມວິຊາຊີບອື່ນໆອີກ.
