ຢໍໂຄວິດ ຄວ້ານັກກິລາດີເດັ່ນຊາຍ ລໍເຣອຸສ ເວິລ ສະປອດ ອາວອດ
ໂນວັກ ຢໍໂຄວິດ ຄວ້າລາງວັນນັກກິລາຊາຍດີເດັ່ນແຫ່ງປີ “ລໍເຣອຸສ ເວິລ ສະປອດ ອາວອດ” ຈາກຜົນງານຄວ້າແກຣນສະແລມ 3 ລາຍການຕິດ, ສ່ວນດີເດັ່ນຍິງເປັນ ຊິໂມເນ ໄບລ໌ ນັກຢິມນາສຕິກຊາວອາເມລິກາ, ສ່ວນ ຝຣັ່ງ ຄວ້າທີມດີເດັ່ນຈາກຜົນງານຄວ້າແຊ້ມບານໂລກ 2018.
ໂນວັກ ຢໍໂຄວິດ ຍອດນັກເທັນນິສມື 1 ຂອງໂລກຊາວເຊີເບຍ ຄວ້າລາງວັນນັກກິລາຊາຍດີເດັ່ນແຫ່ງປີ “ລໍເຣອຸສ ເວິລ ສະປອດ ອາວອດ” ປະຈຳປີ 2019 ໄປຄອງ ໃນການປະກາດລາງວັນໃນວັນທີ 18 ກຸມພາຜ່ານມາ ຫລັງ ຢໍໂຄວິດ ສ້າງຜົນງານໄດ້ຢ່າງສຸດຍອດ ຄວ້າແຊ້ມແກຣນສະແລມໄດ້ 3 ລາຍການຕິດຕໍ່ກັນ ນັບແຕ່ວິມເບິລດັນ ແລະ ຢູເອສ ໂອເພັນ ປີຜ່ານມາ ມາຈົນເຖິງການແຂ່ງຂັນອັອສເຕຣລ້ຽນ ໂອເພັນ ໃນເດືອນມັງກອນຜ່ານມາ.
ສ່ວນລາງວັນນັກກິລາຍິງດີເດັ່ນແຫ່ງປີ ຕົກເປັນຂອງ ຊິໂມເນ ໄບລ ນັກຢິມນາສຕິກຊາວອາເມລິກາ ຫລັງສ້າງຜົນງານຄວ້າ 4 ຫລຽນຄຳ, 1 ຫລຽນເງິນ ແລະ 1 ຫລຽນທອງ ໃນການແຂ່ງຂັນຢິມນາສຕິກຊີງແຊ້ມໂລກ 2018 ຢູ່່ນະຄອນຫລວງໂດຮາ ປະເທດກາຕາ ໃນທ້າຍປີຜ່ານມາ.
ສ່ວນລາງວັນອື່ນໆທີ່ໜ້າສົນໃຈ ໄທເກີ ວູດ ຍອດນັກກ໊ອບຊາວອາເມລິກາເຈົ້າຂອງແຊ້ມເມເຈີ 14 ລາຍການ ຄວ້າລາງວັນນັກກິລາທີ່ກັບມາສ້າງຜົນງານໄດ້ດີເດັ່ນໄປຄອງ ຫລັງ ໄທເກີ ວູດ ເຊົາຈາກອາການບາດເຈັບຫລັງມາຫລາຍປີ ກັບມາຄວ້າແຊ້ມລາຍການທຳອິດໃນຮອບ 5 ປີ ໃນລາຍການ ທົວ ແຊມປ້ຽນຊິບ ລາຍການສຸດທ້າຍຂອງປີ ໃນເດືອນກັນຍາປີຜ່ານມາ, ສ່ວນ ນາໂອມິ ໂອຊາກະ ນັກເທັນນິສສາວມື 1 ຂອງໂລກຊາວຍີ່ປຸ່ນ ຄວ້າລາງວັນດາວຮຸ່ງດີເດັ່ນຈາກການຄວ້າແຊ້ມ ຢູເອສ ໂອເພັນ ປີຜ່ານມາ ຕໍ່ເນື່ອງມາຈົນເຖິງແຊ້ມອັອສເຕຣລ້ຽນ ໂອເພັນ ໃນປີນີ້, ສ່ວນລາງວັນທີມດີເດັ່ນໄດ້ແກ່ທີມຊາດຝຣັ່ງຊຸດຄວ້າແຊ້ມບານໂລກ 2018 ທີ່ປະເທດຣັດເຊຍ. ຂະນະທີ່ ອາແຊນ ເວນເກີ ອະດີດຜູ້ຈັດການທີມ ອາເຊນອລ ຮັບລາງວັນກຽດຕິຍົດບຸກຄົນຜູ້ປະສົບຜົນສຳເລັດໃນວົງການກິລາ ເຊິ່ງລາງວັນດັ່ງກ່າວຖືເປັນລາງວັນພິເສດທີ່ບໍ່ໄດ້ມອບກັນທຸກປີ.
