“ສົງຄາມ” ກັບ​ພວກ​ຄ້າ​ມະນຸດ​ບໍ່ມີ​ທ່າ​ທີວ່າ​ຈະ​ຈົບ​ລົງ​ງ່າຍ

“ສົງຄາມ” ກັບ​ພວກ​ຄ້າ​ມະນຸດ​ບໍ່ມີ​ທ່າ​ທີວ່າ​ຈະ​ຈົບ​ລົງ​ງ່າຍ - 777 - “ສົງຄາມ” ກັບ​ພວກ​ຄ້າ​ມະນຸດ​ບໍ່ມີ​ທ່າ​ທີວ່າ​ຈະ​ຈົບ​ລົງ​ງ່າຍ
“ສົງຄາມ” ກັບ​ພວກ​ຄ້າ​ມະນຸດ​ບໍ່ມີ​ທ່າ​ທີວ່າ​ຈະ​ຈົບ​ລົງ​ງ່າຍ - Untitled design - “ສົງຄາມ” ກັບ​ພວກ​ຄ້າ​ມະນຸດ​ບໍ່ມີ​ທ່າ​ທີວ່າ​ຈະ​ຈົບ​ລົງ​ງ່າຍ

      ພວກ​ຜູ້ຍິງ ​ແລະ ​ເດັກນ້ອຍ​ໃນ​ເຂດ​ຊົນນະບົດ​ຫ່າງ​ໄກ​ສອກຫລີກ​ໄດ້​ກາຍ​ເປັນ​​ເປົ້າຈອບ​ອອຍ​ຂອງ​ພວກ​ຄ້າ​ມະນຸດ ​​ເພື່ອ​ຂາຍ​ໃຫ້​ພວກ​ຄົນ​ຕ່າງປະ​ເທດ​ຈຳນວນ​ໜຶ່ງ​ເອົາ​ໄປ​ເປັນ​ເມຍ, ຮັບຈ້າງ​ຝາກ​ທ້ອງ (ອຸ້ມ​ທ້ອງ), ບັງຄັບ​ໃຫ້​ຂາຍ​ປະ​ເວ​ນີ… ​ເຖິງ​ແມ່ນ​ວ່າ​ອຳນາດ​ການ​ປົກຄອງ​ຈະ​ມີ​ຫລາຍ​ວິທີ​ການ​ສະກັດ​ກັ້ນ ​ແລະ ​ແກ້​ໄຂ​ປານ​ໃດ​ກໍ​ຕາມ, ​ແຕ່​ພວກ​ຄ້າ​ມະນຸດ​ກໍ​ຍັງ​ສືບ​ຕໍ່​ດຳ​ເນີນ​ຈອບ​ອອຍ​ເອົາ​ເຫຍື່ອ​ຢ່າງ​ບໍ່​ລົດ​ລະ.

      ​ເປັນ​ຫຍັງ​ປາກົດການ​ແບບ​ນີ້​ຈຶ່ງ​ບໍ່​ສາມາດ​ຢຸດຕິ​ໄດ້ ?

      ຜູ້​ມີ​ຄວາມ​ຮັບຜິດຊອບຢູ່​ທ້ອງ​ຖິ່ນ​ມີ​ຄວາມ​ເຂົ້າ​ໃຈດີ​ຕໍ່​ເລ່ຫລ່ຽມ​ກົນອຸບາຍ​ຂອງ​ພວກ​ຄ້າ​ມະນຸດ, ​ແຕ່​ກໍ​ຍອມຮັບ​ວ່າການ​ທີ່​ຈະ​ສະກັດ​ກັ້ນຢັບຢັ້ງ​ໃຫ້​ໄດ້​ຢ່າງ​ເດັດຂາດ​ນັ້ນ​ແມ່ນ​ເປັນ​ໄປ​ໄດ້​ຍາກ. “ເລ່ຫລ່ຽມ​ກົນອຸບ​າຍຂອງ​ພວກ​ເຂົາ​ມັນ​ບໍ່​ແມ່ນ​ອັນ​ແປ​ໃໝ່”.

      ທ່ານ ພັນ​ເອກ ຟານ​ຮົ່ງຄວ້າ​ຍ ຫົວໜ້າ​ໜ່ວຍ​ຕຳຫລວດ​ສືບສວນ​ຄວາມ​ສະຫງົບ​ຂອ​ງ​ເມືອງ​ລາດ ​ແຂວງ​ແທງ​ຮວາ ສສ ຫວຽດນາມ ​ໃຫ້​ຮູ້​ວ່າ: ຢູ່​ໃນ​ຕາ​ແສງ​ຈຸ​ງລີ້ ມີ​ຜູ້ຍິງ 36 ຄົນ​ທີ່​ສົງ​ໄສ​ວ່າ​ເອົາ​ຜົວ ຫລື ອາດ​ຈະ​ຖືກ​ຫລອກ​ໃຫ້​ໄປ​ຈີນ, ສະ​ເພາະ​ຢູ່​ໃນ​ເມືອງ​ລີ້​ມີ 27 ກໍລະນີ, ສ່ວນ 11 ກໍລະນີ​ແມ່ນ​ນອນ​ຢູ່​ໃນ​ບັນດາ​ຕາ​ແສງຕາ​ມຈຸ​ງ, ຍີ​ເຊີນ, ປູ່​ຍີ ​ແລະ ມີ​ຜູ້ຍິງ​ອີກ 74 ຄົນ​ທີ່​ບໍ່​ຮູ້​ຂ່າວ​ຄາວ ​ເຊິ່ງອຳນາດ​ການ​ປົກຄອງ​ສົງ​ໄສ​ວ່າ​ເຂົາ​ອາດ​ຈະ​ເປັນ​ເຫຍື່ອ​ຂອງ​ພວກ​ຄ້າ​ມະນຸດ​ໄປ​ແລ້ວ.

      ອີງ​ຕາມ​ການ​ໃຫ້ການ​ຂອງ​ທ່ານ ພັນ​ເອກ ຄວ້າ​ຍ ​ໃຫ້​ຮູ້​ວ່າ: ​ເຫຍື່ອ​ທີ່​ພວກ​ຄ້າ​ມະນຸດ​ຫລອກ​ໄປ​ນັ້ນອາດ​ຈະ​ໄປ​ເປັນ​ເມຍ​ຂອງ​ພວກ​ຜູ້​ຊາຍ​ດ້ວຍ​ຄວາມ​ຈົນຕາ​ແຈ ຫລື ອາດ​ຈະ​ຖືກ​ຂາຍ​ຕໍ່​ໃຫ້​ພວກ​ຄ້າ​ປະ​ເວ​ນີ ​ແລະ ​ເຂົາ​ກໍ​ຫາ​ທຸກ​ວິທີ​ທາງ​ເພື່ອ​ກັບ​ຄືນ​ມາ​ປະ​ເທດ.

     ​ເລ່ຫລ່ຽມ​ທີ່​ພວກ​ຄ້າ​ມະນຸດ​ນຳ​ໃຊ້​ນັ້ນມັນ​ບໍ່​ແມ່ນ​ສິ່ງ​ແປກ​ໃໝ່, ພວກ​ເຂົາ​ສວຍ​ໃຊ້​ຊ່ອງ​ຫວ່າງ​ຄວາມ​ບໍ່​ເຂັ້ມງວດ​ໃນ​ການ​ຄຸ້ມ​ຄອງ​ຂອງ​ຄອບຄົວ, ສື່​ສັງຄົມ​ອອນ​ລາຍ, ການ​ຊັກ​ຊວນ, ຕັ້ງຕິ​ເປັນ​ຊູ້​ເປັນ​ແຟນ, ຊັກ​ຊວນ​ໄປ​ທ່ອງ​ທ່ຽວ, ​ໄປ​ຮັບຈ້າງ​ເຮັດ​ວຽກບ່ອນ​ທີ່​ມີ​ລາຍ​ຮັບ​ສູງ, ​ໄປ​ອອກ​ແຮງ​ງານ​ຢູ່​ຕ່າງປະ​ເທດ​ທີ່​ບໍ່​ໄດ້​ເສຍ​ຄ່າ​ທຳນຽມ​ຫລາຍ ​ແລ້ວ​ພວກ​ເຂົາ​ກໍ​ນຳ​ເອົາ​ຂຶ້ນ​ໄປ​ບັນດາ​ແຂວງ​ລຽບ​ຊາຍ​ແດນ​ແລ້ວ​ກໍ​ຂາຍ​ໃຫ້​ຜູ້​ຕ້ອງການ.

    ​ເຫຍື່ອ​ຜູ້ຍິງ​ສ່ວນ​ຫລາຍ​ແມ່ນ​ຢູ່​ໃນ​ອາຍຸ​ລະຫວ່າງ 15-30 ປີ ທີ່​ດຳລົງ​ຊີວິດ​ຢູ່​ເຂດ​ຫ່າງ​ໄກ​ສອກຫລີກ, ທຸລະກັນດານ, ມີ​ລະດັບ​ການ​ສຶກສາ ​ແລະ ຄວາມ​ຮູ້​ທາງ​ກົດໝາຍ​ຕໍ່າ. ພິ​ເສດ ຖ້າ​ພວກ​ຄ້າ​ມະນຸດ​ຄົນ​ໃດ​ຫາກ​ເວົ້າພາສາ​ມົ້ງ​ໄດ້​ດີ​ກໍ​ຍິ່ງ​ຈະ​ເຮັດ​ໃຫ້​ຍິງ​ສາວ​ຕົກ​ເປັນ​ເຫຍື່ອ​ຂອງ​ພວກ​ເຂົາ​ໄດ້​ງ່າຍ.

      ອີງ​ຕາມ​ການ​ລາຍ​ງານ​ຂອງ​ທ່ານ ພັນ​ເອກ ຄວ້າ​ຍ ​ໃຫ້​ຮູ້​ວ່າ: ການ​ຈັບ​ກຸມ ​ແລະ ​ແກ້​ໄຂ​ພວກ​ຄ້າ​ມະນຸດ​ນັ້ນມັນ​ບໍ່​ແມ່ນ​ເລື່ອງ​ງ່າຍ ​ເພາະວ່າ​ກໍລະນີ​ທີ່​ຖືກ​ຫລອກ​ລວງ​ຂາຍ​ໄປ​ແລ້ວ​ມັນ​ບໍ່​ໄດ້​ເກີດ​ຂຶ້ນຢູ່​ກັບ​ພື້ນທີ່​ຂອງ​ເຮົາ​ຄຸ້ມ​ຄອງ. ສະນັ້ນ ຈຶ່ງ​ເຮັດ​ໃຫ້​ກຳລັງ​ເຈົ້າໜ້າ​ທີ່ ​ແລະ ພາກສ່ວນ​ກ່ຽວຂ້ອງ​ເຂົ້າ​ໄປ​ຄວບ​ຄຸມ ​ແລະ ​ແກ້​ໄຂ​ໄດ້​ຍາກ.

    ຍູ້​ແຮງ​ການ​ໂຄສະນາ ​ແລະ ການ​ແກ້​ໄຂ​ໃຫ້​ເດັດຂາດ

     ຕຳຫລວດ​ເມືອງ​ລາດ ​ໃຫ້​ຮູ້​ວ່າ: ​ໃນ​ຕໍ່ໜ້າ​ນີ້ ຈະ​ເອົາ​ໃຈ​ໃສ່​ຍູ້​ແຮງ​ການ​ໂຄສະນາ​ຍົກ​ສູງ​ສະຕິ​ຂອງ​ປະຊາຊົນ​ຕໍ່​ສະພາບ ​ແລະ ຜົນ​ຮ້າຍ​ຂອງ​ການ​ຄ້າ​ມະນຸດ​ຢູ່​ໃນ​ພື້ນທີ່​ດັ່ງກ່າວ​ໃຫ້​ສູງ​ຂຶ້ນ. ພ້ອມ​ດຽວ​ກັນນັ້ນ ກໍ​ຈະ​ປະສານ​ສົມທົບ​ກັບ​ບັນດາ​ອຳນາດ​ການ​ປົກຄອງ​ຕິດຕາມ ​ແລະ ສະກັດ​ກັ້ນ​ເປົ້າໝາຍ​ທີ່​ສົງ​ໄສ.

     ຜ່ານ​ການ​ແລກປ່ຽນ​ຄຳ​ຄິດ​ເຫັນ​ກັບ​ອົງການ​ກົດໝາຍ. ທ່ານ ກາວ​ວັນ​ເກື່ອງ ປະທານ​ຄະນະ​ກຳມະການ​ປະຊາຊົນ​ເມືອງ​ລາດ ​ໃຫ້​ຮູ້​ວ່າ: ຄະນະ​ກຳມະການ​ປົກຄອງ​ເມືອງ​ໄດ້​ມີ​ທິດ​ຊີ້​ນໍາ​ໃຫ້​ຕຳຫລວດ​ເມືອງ​ສົມທົບ​ກັບ​ບັນດາ​ຂະ​ແໜງ​ການ, ອົງການ​ທີ່​ກ່ຽວຂ້ອງ​ຕ່າງໆ ຈັດຕັ້ງການ​ໂຄສະນາຢ່າງ​ແຂງ​ແຮງ​ຢູ່​ໃນ​ພື້ນທີ່​ດັ່ງກ່າວ​ໃຫ້​ກວ້າງຂວາງ​ຫລາຍ​ຂຶ້ນ ​ເພື່ອ​ສາມາດ​ປຸກລະດົມ​ໃຫ້​ປະຊາຊົນ​ເຂົ້າ​ໃຈ​ກ່ຽວ​ກັບ​ລະບຽບ​ກົດໝາຍ​ການ​ເຂົ້າ-ອອກ​ເມືອງ, ການ​ໄປ​ອອກ​ແຮງ​ງານ​ຢູ່​ຕ່າງປະ​ເທດ ​ແລະ ກົນອຸບາຍ ​ແລະ ​ເລ່ຫລ່ຽມ​ຂອງ​ພວກ​ຄ້າ​ມະນຸດ​ເປັນຕົ້ນຕໍ.

“ສົງຄາມ” ກັບ​ພວກ​ຄ້າ​ມະນຸດ​ບໍ່ມີ​ທ່າ​ທີວ່າ​ຈະ​ຈົບ​ລົງ​ງ່າຍ - Wave100S AD to Website 2020 0 - “ສົງຄາມ” ກັບ​ພວກ​ຄ້າ​ມະນຸດ​ບໍ່ມີ​ທ່າ​ທີວ່າ​ຈະ​ຈົບ​ລົງ​ງ່າຍ

     ທ່ານ ​ເກື່ອງ ​ໃຫ້​ຮູ້​ວ່າ: ປັດຈຸບັນ​ອຳນາດ​ການ​ປົກຄອງ​ແຕ່ລະ​ຂັ້ນ​ໄດ້​ຈັດຕັ້ງກັນ​ໄປ​ພົບ​ປະ​ກັບ​ຜູ້​ທີ່​ຖືກ​ຕົກ​ເປັນ​ເຫຍື່ອ, ພາຍຫລັງ​ໄດ້​ກັບ​ຄືນ​ມາ ​ເພື່ອ​ຍົກ​ໃຫ້​ເຫັນ​ແຈ້ງ​ກົນອຸບາຍ ​ແລະ ​ເປົ້າໝາຍ​ທີ່​ຈະ​ຕົກ​ເປັນ​ເຫຍື່ອ​ຂອງ​ພວກ​ຄ້າ​ມະນຸດ ​ເຊິ່ງ​ໃນ​ເບື້ອງຕົ້ນກໍ​ເຫັນ​ວ່າ​ໄດ້ຜົນ​ດີ​ສົມຄວນ. ​ເຈົ້າໜ້າ​ທີ່​ຕຳຫລວດ​ສາມາດ​ສະກັດ​ກັ້ນ​ໄດ້ 4 ກໍລະນີ ຈະ​ຕົກ​ເປັນ​ເຫຍື່ອ​ຂອງ​ພວກ​ຄ້າ​ມະນຸດ​ດັ່ງກ່າວ.

      ທ່ານ ​ເກື່ອງ ​ໃຫ້​ຮູ້​ຕື່ມ​ວ່າ: ຜູ້​ທີ່​ຕົກ​ເປັນ​ເຫຍື່ອ​ນັ້ນສ່ວນ​ຫລາຍ​ແມ່ນ​ຜູ້ຍິງ​ຊົນ​ເຜົ່າ​ມົ້ງທີ່​ມີ​ລະດັບ​ຄວາມ​ຮັບ​ຮູ້​ຈຳກັດ, ​ເຂົາ​ເຈົ້າບໍ່​ຮູ້​ຂໍ້​ມູນ​ຂ່າວສານ​ຫຍັງ​ເລີຍ​ຂອງ​ຜູ້​ທີ່​ມາ​ຫລອກ​ລວງ​ເອົາ​ຕົນ​ເອງ​ໄປ​ຂາຍ, ພຽງ​ແຕ່​ຮູ້ຈັກ​ກັນ​ໃນ​ເຟສບຸກ. ຜ່ານ​ການ​ໂອ້​ລົມ​ນັດ​ໝາຍ​ກັນ​ຫລາຍ​ເທື່ອ, ຜູ້​ທີ່​ຕົກ​ເປັນ​ເຫຍື່ອ​ກໍ​ຂຶ້ນລົດ​ເມ​ໄປ​ຫາ​ຈຸດ​ນັດ​ພົບ​ກັນ ​ແລ້ວ​ເຂົາ​ກໍ​ຖືກ​ນຳ​ສົ່ງ​ໄປ​ປະ​ເທດ​ອື່ນ, ​ເມື່ອນັ້ນຈຶ່ງ​ຮູ້ສຶກ​ຕົວ​ວ່າ​ຕົນ​ເອງ​ຖືກ​ຂາຍ​ໄປ​ແລ້ວ.

     “ຕໍ່​ກັບ​ກໍລະນີ​ຜູ້​ທີ່​ໄດ້​ກັບ​ຄືນ​ປະ​ເທດ​ແລ້ວນັ້ນ ຄະນະ​ກຳມະການ​ປົກຄອງ​ເມືອງ​ກໍ​ໄດ້​ມອບ​ໝາຍ​ໃຫ້​ອຳນາດ​ການ​ປົກຄອງ​ທ້ອງ​ຖິ່ນ​ຂັ້ນຕາ​ແສງ ​ແລະ ພາກສ່ວນ​ທີ່​ມີ​ຄວາມ​ຮັບຜິດຊອບ​ກ່ຽວຂ້ອງ​ສົມທົບ​ກັບ​ຄອບຄົວ​ຜູ້ກ່ຽວ​ປຸກລະດົມ​ໃຫ້​ກຳລັງ​ໃຈ ​ແລະ ປະຕິບັດ​ນະ​ໂຍບາຍ​ຕໍ່​ເຂົາ​ເຈົ້າຢ່າງ​ທັນ​ການ ​ເພື່ອ​ໃຫ້​ເຂົາ​ເຈົ້າມີ​ຄວາມ​ອຸ່ນ​ອ່ຽນ​ທຸ່ນ​ທ່ຽງ​ໃນ​ການ​ທຳ​ມາ​ຫາ​ກິນ​ລ້ຽງ​ຊີບ​ຕົນ​ເອງ”.

ເຫຍື່ອ​ຜູ້​ຊາຍ​ຖືກ​ຫລອກ​ໃຫ້​ໄປ​ແມ່ນ​ເພື່ອ​​ໄປ​ຂາຍ​ອະ​ໄວ​ຍະ​ວະ​ຕ່າງໆ

      ການ​ຄ້າ​ຂາຍ​ມະນຸດ​ໄດ້​ເກີດ​ຂຶ້ນ ​ແລະ ​ແຜ່​ລາມ​ໄປ​ເຖິງ 63 ​ແຂວງ, ນະຄອນ ສສ ຫວຽດນາມ ຕົ້ນຕໍ​ແມ່ນ​ການ​ຄ້າ​ມະນຸດ​ໄປ​ຕ່າງປະ​ເທດ. ອີງ​ຕາມ​ການ​ລາຍ​ງານ​ຂອງ​ກະຊວງ​ຕຳຫລວດຫວຽດນາມ ປີ 2012-2017 ຕົວ​ເລກ​ເຫຍື່ອ​ທີ່​ຖືກ​ຂາຍ​ໄປ​ມີ​ຫລາຍ​ກວ່າ 3.000 ຄົນ, ​ໃນ​ນັ້ນ 2.571 ຄົນ ​ແມ່ນ​ໄດ້​ກັບ​ຄືນ​ປະ​ເທດ​ແລ້ວ, ຍັງ 519 ຄົນ​ບໍ່​ທັນ​ໄດ້​ຮັບ​ຂ່າວ​ຄາວ​ຫຍັງ. 90% ຂອງ​ຜູ້​ເປັນ​ເຫຍື່ອ​ຖືກ​ຂາຍ​ໄປ​ນັ້ນ​ແມ່ນ​ຜູ້ຍິງ ​ແລະ ​ເດັກນ້ອຍ. ​ແຕ່​ສິ່ງ​ທີ່​ໜ້າ​ສົນ​ໃຈ​ກໍ​ຄື​ວ່າ: ກໍລະນີ​ຜູ້​ຊາຍ​ຖືກ​ຂາຍ​ໄປ​ສ່ວນ​ຫລາຍ​ແມ່ນ​ເພື່ອ​ໄປ​ຂາຍ​ອະ​ໄວ​ຍະ​ວະ​ຕ່າງໆ ​ເຊິ່ງຕົ້ນຕໍ​ແມ່ນ​ໝາກ​ໄຂ່ຫລັງ.

     ພວກ​ຄ້າ​ມະນຸດ​ໄດ້​ມີ​ການ​ຕິດ​ຕໍ່​ພົວພັນ​ກັບ​ເຫຍື່ອ ​ໂດຍ​ຜ່ານ​ສື່​ສັງຄົມ​ອອນ​ລາຍ. ມີ​ບາງ​ກໍລະນີ ພວກ​ຄ້າ​ມະນຸດ​ໄດ້​ປອມ​ແປງ​ເປັນ​ເຈົ້າໜ້າ​ທີ່ ​ເພື່ອ​ສ້າງ​ຄວາມ​ສຳພັນ​ລຶ້ງ​ເຄີຍ​ຮັກ​ແພງ, ​ເປັນ​ເພື່ອນ ​ເພື່ອ​ຫລອກ​ເຫຍື່ອ.

      ​ເກີດ​ມີ​ປາກົດການ​ຄ້າ​ມະນຸດ​ແບບ​ໃໝ່

     ປີ 2018 ​ໄດ້​ມີ​ປາກົດການ​ການ​ຄ້າ​ມະນຸດ​ແບບ​ໃໝ່​ເກີດ​ຂຶ້ນ ​ເຊິ່ງມີ​ຄວາມ​ຫຍຸ້ງຍາກ​ໃນ​ການ​ແກ້​ໄຂ, ນັ້ນກໍ​ຄື​ການ​ຄ້າ​ຜູ້ຍິງ​ຖືພາ (​ແມ່​ມານ) ​ໄປ​ເກີດ​ລູກ​ແລ້ວ​ຂາຍ​ໃຫ້​ພວກ​ເຂົາ. ຕໍ່​ກັບ​ກໍລະນີ​ຜູ້​ທີ່​ໄປ​ຄອດ​ລູກນັ້ນ ທາງ​ການ​ບໍ່ທັນ​ໄດ້​ດຳ​ເນີນ​ການ​ຫຍັງ ​ເພາະວ່າ​ບໍ່​ທັນ​ໄດ້​ກຳນົດ​ໄວ້​ໃນ​ກົດໝາຍ​ອາຍາ​ກ່ຽວ​ກັບ​ການ​ຄ້າຂາຍ​ຂອງ​ຄົນ​ດັ່ງກ່າວ.

“ສົງຄາມ” ກັບ​ພວກ​ຄ້າ​ມະນຸດ​ບໍ່ມີ​ທ່າ​ທີວ່າ​ຈະ​ຈົບ​ລົງ​ງ່າຍ - WhatsApp Image 2020 05 27 at 5 - “ສົງຄາມ” ກັບ​ພວກ​ຄ້າ​ມະນຸດ​ບໍ່ມີ​ທ່າ​ທີວ່າ​ຈະ​ຈົບ​ລົງ​ງ່າຍ
“ສົງຄາມ” ກັບ​ພວກ​ຄ້າ​ມະນຸດ​ບໍ່ມີ​ທ່າ​ທີວ່າ​ຈະ​ຈົບ​ລົງ​ງ່າຍ - WhatsApp Image 2020 05 27 at 5 - “ສົງຄາມ” ກັບ​ພວກ​ຄ້າ​ມະນຸດ​ບໍ່ມີ​ທ່າ​ທີວ່າ​ຈະ​ຈົບ​ລົງ​ງ່າຍ
error: Alert: ເນື້ອຫາຂ່າວມີລິຂະສິດ !!