ກະຊວງການເງິນລົງວິໄນພະນັກງານຫລາຍສິບຄົນລະເມີດລະບຽບ.
ກລັດຖະມົນຕີກະຊວງການເງິນ ສົມດີ ດວງດີ ໃຫ້ຮູ້ໃນກອງປະຊຸມເປີດກວ້າງອົງຄະນະພັກກະຊວງການເງິນ ເມື່ອບໍ່ດົນມານີ້ວ່າ: ຂະແໜງການເງິນພວມເລັ່ງດຳເນີນການແກ້ໄຂສະພາບການສໍ້ລາດບັງຫລວງ ກໍຄືການລະເມີດລະບຽບວິໄນການເງິນຂອງພະນັກງານ ນັບແຕ່ຂັ້ນສູນກາງຮອດທ້ອງຖິ່ນ ເຊິ່ງໄດ້ລົງວິໄນເບື້ອງລັດທັງໝົດ 35 ຄົນ, ໃນນີ້ໄດ້ລຶບຊື່ອອກຈາກການເປັນລັດຖະກອນ 10 ຄົນ, ໂຈະການເລື່ອນຊັ້ນ-ຂັ້ນເງິນເດືອນ 13 ຄົນ, ຫລຸດຕຳແໜ່ງບໍລິຫານ 3 ຄົນ, ໂຈະວຽກຊົ່ວຄາວ 5 ຄົນ ແລະ ກ່າວເຕືອນຄວາມຜິດ 4 ຄົນ. ນອກນີ້ ຍັງມີພະນັກງານອີກຈຳນວນໜຶ່ງຢູ່ໃນຂັ້ນຕອນການຕິດຕາມກວດກາ ແລະ ຈະດຳເນີນຕາມລະບຽບກົດໝາຍ, ສືບຕໍ່ແກ້ໄຂຜົນການກວດກາທີ່ມີການລະເມີດລະບຽບການເງິນອີກຈຳນວນ 25 ເປົ້າໝາຍ, ມີຜູ້ລະເມີດ 64 ຄົນ (ຍິງ 16 ຄົນ). ນອກນີ້ ຈະສົມທົບກັບອົງການກວດກາສະເພາະກິດຂອງອົງການກວດກາລັດຖະບານ ເພື່ອກວດສອບບັນດາວິສາຫະກິດທີ່ຂຶ້ນກັບການຄຸ້ມຄອງຂອງກະຊວງການເງິນຄື: ລັດວິສາຫະກິດຫວຍພັດທະນາ, ບໍລິສັດແດນສະຫວັນ, ລັດວິສາຫະກິດລາວບໍລິການສິນຄ້າຜ່ານແດນ ແລະ ບໍລິສັດການບິນລາວ.
ທ່ານລັດຖະມົນຕີກະຊວງດັ່ງກ່າວ ໃຫ້ຮູ້ວ່າ: ການເປີດສາຍດ່ວນ 1519 ຂອງກະຊວງການເງິນ ເຮັດໃຫ້ສັງຄົມສ່ອງແສງບັນດາປາກົດການຕ່າງໆຂອງພະນັກງານໃນຂະແໜງການເງິນຫລາຍຂຶ້ນ ອັນໄດ້ຊ່ວຍໃຫ້ສາມາດແກ້ໄຂບັນຫາໄດ້ທັນກັບສະພາບການ ແລະ ມີປະສິດທິຜົນດີຂຶ້ນກວ່າເກົ່າ.
