ການເຂົ້າເຖິງການປິ່ນປົວຂອງຜູ້ຕິດເຊື້ອເຮສໄອວີຢູ່ລາວຍັງຕໍ່າ

ສູນຕ້ານເອດ ແລະ ພະຍາດຕິດຕໍ່ທາງເພດສຳພັນ (ພຕພ) ກະຊວງ ສາທາລະນະສຸກ ໃຫ້ຮູ້ວ່າ: ໃນປີ 2017 ຜ່ານມາ, ຜູ້ຕິດເຊື້ອເຮສໄອວີ/ເອດ ທີ່ເຂົ້າເຖິງການປິ່ນປົວດ້ວຍຢາຕ້ານເຊື້ອເຮສໄອວີ (ARV) ທົ່ວໂລກມີ 21,7 ລ້ານຄົນ,  59% ຂອງຜູ້ຕິດເຊື້ອທັງໝົດໄດ້ເຂົ້າເຖິງການປິ່ນປົວ, 59% ຂອງຜູ້ໃຫຍ່ອາຍຸ 15 ປີຂຶ້ນໄປ ແລະ 52% ແມ່ນເດັກນ້ອຍອາຍຸ 0-14 ປີ ໄດ້ຮັບການປິ່ນປົວ ແລະ 80% ຂອງແມ່ຍິງຖືພາທີ່ຕິດເຊື້ອໄດ້ເຂົ້າເຖິງການ ປິ່ນປົວເພື່ອປ້ອງກັນການສົ່ງເຊື້ອຫາລູກຂອງພວກເຂົາ.

ສ່ວນຜູ້ຕິດເຊື້ອເຮສໄອວີ/ເອດຢູ່ລາວທີ່ເຂົ້າເຖິງການປິ່ນປົວດ້ວຍຢາ ຕ້ານເຊື້ອເຮສໄອວີ (ARV) ຍັງຕໍ່າ, ເພາະການຈຳແນກລັງກຽດຍັງມີຢູ່ໃນສະຖານທີ່ບໍລິການ ແລະ ໂຕຂອງຜູ້ຕິດເຊື້ອເຮສໄອວີເອງ, ແມ່ຍິງຖືພາທີ່ຕິດ ເຊື້ອເຮສໄອວີ ເຂົ້າເຖິງການປິ່ນປົວດ້ວຍຢາ ARV ຍັງມີຄວາມຫຍຸ້ງຍາກ.   ນອກນີ້, ການໂຄສະນາຕ້ານເອດຍັງບໍ່ທັນກວ້າງຂວາງ, ອັດຕາການຕິດເຊື້ອເຮສໄອວີ ໃນກຸ່ມຊາຍມີເພດສຳພັນກັບຊາຍ (ຊພຊ) ມີທ່າອ່ຽງເພີ່ມຂຶ້ນ, ອັດຕາການຕິດເຊື້ອພະຍາດຕິດຕໍ່ທາງເພດສຳພັນ ໃນກຸ່ມສາວບໍລິການ ແລະ ຊພຊ ຍັງສູງ, ຄວາມຮູ້ໃນການກັນການຕິດເຊື້ອເຮສໄອວີ ແລະ ພຕພ ຍັງຕ່ຳ.

ສູນຕ້ານເອດ ແລະ ພຕພ ໃຫ້ຮູ້ຕື່ມວ່າ: ການສະໜອງທຶນ ຈາກພາຍນອກແມ່ນນັບມື້ຫລຸດລົງ, ກຸ່ມປະຊາກອນເຄື່ອນຍ້າຍທັງພາຍໃນ ແລະ ຕ່າງ ປະເທດມີທ່າອ່ຽງເພີ່ມຂຶ້ນ, ການເຂົ້າເຖິງກຸ່ມທີ່ມີຄວາມສ່ຽງມີຄວາມຫຍຸ້ງ ຍາກ ແລະ ຍັງມີການຈຳແນກ-ລັງກຽດ ຢູ່ໃນສັງຄົມຊຸມຊົນຜູ້ບໍລິການ ແລະ ຜູ້ຮັບບໍລິການອີກດ້ວຍ.