ວິທະຍາໄລວຽງຈັນ-ຮ່າໂນ້ຍ ເປີດການຮຽນ-ການສອນ ວິຊາປ້ອງກັນຊາດ

    ໃນລະຫວ່າງວັນທີ 18-22 ກຸມພານີ້, ວິທະຍາໄລ ເຕັກນິກ-ວິຊາຊີບມິດຕະພາບວຽງຈັນ-ຮ່າໂນ້ຍ ໄດ້ເປີດການຮຽນ-ການສອນ ວິຊາປ້ອງກັນຊາດ ປະຈຳສົກຮຽນ 2018-2019, ເພື່ອສ້າງໃຫ້ນັກສຶກສາ ໄດ້ຮຽນຮູ້ວິຊາ ປ້ອງກັນຊາດ ທັງພາກທິດສະດີ ແລະ ປະຕິບັດຕົວຈິງ. ຕາມຄຳສັ່ງແນະນຳຂອງລັດຖະມົນຕີ ວ່າການກະຊວງສຶກສາທິການ ແລະ ກິລາ ວ່າດ້ວຍການນຳເອົາຫຼັກສູດ ວິຊາປ້ອງກັນຊາດ ເຂົ້າໃນຫຼັກສູດການຮຽນ-ການສອນ, ພ້ອມທັງເປັນການປະຕິບັດາມ 3 ລັກສະນະ ແລະ 5 ຫຼັກມູນການສຶກສາ, ເພື່ອສົ່ງເສີມໃຫ້ນັກສຶກສາ ມີສຸຂະພາບເຂັ້ມແຂງທັງກາຍ ແລະ ຈິດໃຈ, ມີນ້ຳໃຈມານະອົດທົດ, ເພື່ອກຽມພ້ອມປະກອບສ່ວນສ້າງສາ ແລະ ພັດທະນາປະເທດຊາດ. ໂດຍມີນັກສຶກສາເຂົ້າຮຽນທັງໝົດ 522 ຄົນ ໃນສົກຮຽນນີ້.

    ວິທະຍາໄລເຕັກນິກ-ວິຊາຊີບ ມິດຕະພາບວຽງຈັນ-ຮ່າໂນ້ຍ ແມ່ນໝາກຜົນຂອງການຮ່ວມມື ລະຫວ່າງ ສປປ ລາວ ແລະ ສສ ຫວຽດນາມ, ໂດຍໄດ້ຮັບການສ້າງຕັ້ງຂຶ້ນໃນປີ 2004 ແລະ ຍົກລະດັບຂຶ້ນເປັນວິທະຍາໄລ ເຕັກນິກວິຊາຊີບມິດຕະພາບວຽງຈັນ-ຮ່າໂນ້ຍ ໃນປີ 2014. ພັດທະນາຊັບພະຍາກອນມະນຸດໃນດ້ານວິຊາຊີບຕ່າງໆທີ່ມີຄຸນນະພາບອອກຮັບໃຊ້ສັງສົມ ໃນລະດັບວຸດທິ ຊັ້ນກາງ ແລະ ຊັ້ນສູງ ປັດຈຸບັນມີພະນັກງານຄູ-ອາຈານທັງໝົດ 89 ຄົນ, ຍິງ 48 ຄົນ ແລະ ໃນສົກຮຽນ 2018-2019 ມີຈຳນວນນັກຮຽນທັງໝົດ 1.875 ຄົນ, ຍິງ 820 ຄົນ.