ຈາກປະລິມານກ້າວສູ່ຄຸນນະພາບ
ໂດຍ: ທິດກ່ຳ
ດັ່ງທີ່ຮູ້ກັນແລ້ວວ່າ, ແຜນຮັບເອົາພະນັກງານລັດຖະກອນໃນປີ 2019 ໄດ້ອອກມາຢ່າງເປັນທາງການແລ້ວ 1.500 ຄົນ ເມື່ອທຽບໃສ່ປີ ກ່ອນຫລຸດລົງເຖິງ 50%. ແນວໃດກໍຕາມ, ເມື່ອບໍ່ດົນມານີ້ຄືໃນວັນທີ 13 ກຸມພາຜ່ານມານີ້ໃນໂອກາດກອງປະຊຸມຂະແໜງພາຍໃນທົ່ວປະເທດທີ່ນະຄອນຫລວງວຽງຈັນ ທ່ານ ນາຍົກລັດຖະມົນຕີ ທອງລຸນ ສີສຸລິດ ກໍໄດ້ແນະ ນຳ ໃຫ້ຂະແໜງການດັ່ງກ່າວເອົາໃຈໃສ່ແກ້ໄຂເຖິງ 9 ໜ້າວຽກທີ່ສຳຄັນເປັນຕົ້ນແຕ່ນີ້ຫາປີ 2020 ໃຫ້ສຸມໃສ່ ຫລຸດຈຳນວນລັດຖະກອນລົງແລ້ວຫັນມາເນັ້ນເລື່ອງຄຸນນະພາບ, ເປົ້າໝາຍກໍແມ່ນໃຫ້ສາມາດເທົ່າທຽມກັບປະເທດອື່ນ.
ການຈັດການໃນ ດ້ານບໍລິຫານຕ້ອງຢຶດໝັ້ນຄວາມກະທັດຮັດ, ໜັກແໜ້ນ, ເຂັ້ມແຂງ ແລະ ມີປະສິດທິຜົນຢ່າງແທ້ຈິງ. ນີ້ຄືໜຶ່ງໃນພາລະກິດ 9 ໜ້າວຽກຂອງຂະ ແໜງການພາຍໃນທີ່ຕ້ອງ ເຮັດໃຫ້ສຳເລັດ ແລະ ເປັນຮູບປະທຳດີຂຶ້ນໃນໄລຍະເວລາທີ່ກຳນົດ.
ເທົ່າທີ່ທິດກ່ຳໄດ້ຕິດຕາມ, ຄືນັບແຕ່ມື້ມີແຜນຮັບພະນັກງານລັດຖະກອນນີ້ອອກມາ ຫາງສຽງຄົນສ່ວນຫລາຍກໍເຫັນດີ ທັງຊົມເຊີຍ ແລະ ໃຫ້ການສະໜັບສະໜູນວ່າການທີ່ພັກ ແລະ ລັດຖະບານເຮົາມີນະໂຍບາຍຫັນຈາກປະລິມານກ້າວສູ່ຄຸນນະພາບນັ້ນ ແມ່ນສອດຄ່ອງກັບ ສະພາບຄວາມເປັນຈິງຂອງການພັດທະນາເສດຖະກິດ- ສັງຄົມຂອງປະເທດ, ເຊິ່ງໜຶ່ງ ໃນພາລະກິດທີ່ຕ້ອງໄປກ່ອນນັ້ນກໍຄືການພັດທະນາຊັບພະຍາກອນມະນຸດ.
ໃນການພັດທະນາຄົນ, ກ່ອນອື່ນໝົດກໍຕ້ອງໃຫ້ເຕັມໄປດ້ວຍຄວາມຮູ້ຄວາມສາມາດ, ທັງມີຄຸນສົມບັດ, ສັດຊື່ບໍລິສຸດ, ມີສິນທຳປະຈຳໃຈ, ບໍ່ໂລບມາກໂລພາ, ບໍ່ສໍ້ລາດບັງຫລວງ, ຮັກປະເທດຊາດບ້ານເມືອງ ແລະ ຮັບໃຊ້ປະຊາຊົນດ້ວຍຄວາມຈົ່ງຮັກພັກດີ.
ທັງໝົດທີ່ກ່າວມານີ້, ການຮັບເອົາຄົນເຂົ້າເປັນລັດຖະກອນກໍຕ້ອງມີມາດຖານ ເງື່ອນໄຂ ແລະ ຄວາມພ້ອມ ທຸກຢ່າງ, ບໍ່ຄວນເຫັນແກ່ພັກພວກຄົນເພິ່ນຄົນໂຕ, ຄົນເຈົ້າຄົນຂ້ອຍ. ອັນສຳຄັນທີ່ ສຸດຕ້ອງເປັນຄົນທີ່ເກັ່ງສາມາດເຮັດໄດ້ຫລາຍວຽກ. ຕົວຢ່າງຜູ້ເຮັດວຽກເລຂານຸ ການພາສາອັງກິດກໍຕ້ອງຮູ້, ຂັບລົດກໍໃຫ້ໄດ້, ຄອມພິວເຕີກໍເກັ່ງ, ການຂີດຂຽນເອກະສານ ຫລື ວິຊາສະເພາະດ້ານນີ້ກໍຕ້ອງຕີຫລົບທົບໄດ້ທັງມີຄວາມຊຳນິຊຳນານ ຈຶ່ງຖືວ່າເປັນພະນັກງານທີ່ມີຄຸນນະພາບ.
ໃນຜ່ານມາ, ທິດກ່ຳເຫັນ ວ່າຂອດພະນັກງານລັດບໍລິຫານເປັນລັກສະນະຄົນເຫລືອບໍ່ພໍ, ຈຳນວນພະນັກງານ ໃນຫ້ອງການຫລາຍ ແຕ່ເຮັດວຽກບໍ່ທັນມີປະສິດທິຜົນເທົ່າທີ່ຄວນ ແລະ ບໍ່ມີຄຸນນະພາບ, ມາຮອດຍຸກສະໄໝນີ້ມັນກໍສົມຄວນແລ້ວ ທີ່ພວກເຮົາຕ້ອງໄດ້ຕັດສິນໃຈຄັດເລືອກ ແລະ ສັນຫາເອົາບຸກຄົນທີ່ເກັ່ງເຂົ້າເຮັດວຽກໃນກົງຈັກບໍລິຫານໃຫ້ທຽບເທົ່າພາກພື້ນ ແລະ ສາກົນ.
ເຖິງຢ່າງໃດກໍດີ, ຕາມເຮົາວ່າ ກວ່າຈະໄປເຖິງຈຸດ ທີ່ເຮົາຕ້ອງການແນ່ນອນ ມັນກໍຕ້ອງຜ່ານຂະບວນການ, ຜ່ານໄລຍະແຫ່ງການບຳລຸງ ແລະ ກໍ່ສ້າງ, ໃນພາລະກິດສ້າງສາ ແລະ ພັດທະນາປະເທດຊາດຖ້າມີຄົນດີ ຄົນເກັ່ງຫລາຍເທົ່າໃດ ບ້ານ ເມືອງກໍຍິ່ງຈະເລີນໄວ ຍ້ອນ ທຸກຄົນໃຜກໍເຮັດວຽກຢ່າງ ມີຄຸນນະພາບມັນກໍຍັງດີລື່ນ ກວ່າມີຄົນຫລາຍວຽກບໍ່ໄດ້ ລັດຕ້ອງແບກຫາບງົບປະ ມານເພື່ອມາຈ່າຍເປັນເງິນ ເດືອນໃຫ້ຢ່າງຫລວງຫລາຍພາຍມາກ.
