ຄວາມຄິດໃນແງ່ລົບກຳຈັດໄດ້ບໍ່ຍາກ

ຄວາມຄິດໃນແງ່ລົບກຳຈັດໄດ້ບໍ່ຍາກ - advert banner 728 90 728x90 - ຄວາມຄິດໃນແງ່ລົບກຳຈັດໄດ້ບໍ່ຍາກ

    ມະນຸດເຮົາໂດຍທຳມະຊາດແລ້ວມັກຈະເບິ່ງໂລກໃນແງ່ລົບສະເໝີ ໂຕຢ່າງງ່າຍໆຍ້ອນຄົນສ່ວນຫລາຍມັກຟັງຂ່າວສານໃນດ້ານລົບ ຈຶ່ງບໍ່ໜ້າສົງໄສເລີຍວ່າເປັນຫຍັງຈຶ່ງມີຂ່າວປະເພດນີ້ຢູ່ໃນໂທລະພາບຢ່າງບໍ່ຂາດສາຍ. ມະນຸດກໍເປັນແບບນີ້ ເຖິງຈະບໍ່ຮູ້ເຫດຜົນ ຫລື ເລື່ອງລາວຈະແຈ້ງ ແຕ່ບໍ່ວ່າໃຜກໍລ້ວນແຕ່ສົນໃຈໃນການຕິສິນນິນທາກັນ ຈຶ່ງເປັນເຫດຜົນທີ່ວ່າສື່ທັງຫລາຍສາມາດສ້າງເງິນຈາກໄລຍະຕົກຕໍ່າ ຫລື ຊີວິດທ່ີໂຫດຮ້າຍຂອງຄົນມີຊື່ສຽງໄດ້ນັ້ນເອງ. ດັ່ງນັ້ນ ສິ່ງທຳອິດທີ່ທ່ານຄວນຈະເຂົ້າໃຈໃນເລື່ອງຂອງການເບິ່ງໂລກໃນແງ່ລົບກໍຄືການທີ່ທ່ານກຳລັງພະຍາຍາມຝືນທຳມະຊາດຂອງມະນຸດໂລກຢູ່ ແລະ ຫາກຢາກຈະເອົາຊະນະມັນໃຫ້ໄດ້ ທ່ານຈຳເປັນຕ້ອງຕໍ່ສູ້ກັບມັນຢ່າງຕໍ່ເນື່ອງ ເຊິ່ງເຮັດໄດ້ໂດຍອາໄສ 4 ວິທີດັ່ງຕໍ່ໄປນີ້ :

ຄວາມຄິດໃນແງ່ລົບກຳຈັດໄດ້ບໍ່ຍາກ - new3 - ຄວາມຄິດໃນແງ່ລົບກຳຈັດໄດ້ບໍ່ຍາກ

     1. ຄວບຄຸມຄວາມຄິດໂຕເອງໃຫ້ໄດ້ :ເມື່ອໃດກໍຕາມທີ່ທ່ານເຜີຕື່ນຂຶ້ນມາກາງເດິກ ເປັນຍ້ອນກັງວົນກັບຫຍັງບາງຢ່າງ ທາງທີ່ດີກໍຄືການຕໍ່ສູ້ກັບຄວາມຄິດເຫລົ່ານັ້ນ ແລະ ຫາທາງຄວບຄຸມມັນ ອາດຈະໂດຍການອ່ານໃນສິ່ງທີ່ສະໜັບສະໜູນຄວາມຄິດໃນດ້ານບວກ ຫລື ເວົ້າເຖິງສິ່ງດີໆກັບໂຕເອງ ແລະ ສິ່ງອ້ອມຂ້າງ ທັງນີ້ຈົ່ງຫົດນຳ້ພູນດິນແກ່ນພືດຄວາມຄິດໃນດ້ານບວກນີ້ໃຫ້ດີ ຂະນະດຽວກັນກໍຢ່າລືມໝັ່ນຖອນສັດຕູພືດທາງຄວາມຄິດລົບໆອອກໄປນຳ.

     2. ເລືອກຄົບຄົນ : ສິ່ງທີ່ທ່ານຄວນເຮັດກໍຄື ເຂົ້າໄປຢູ່ທ່າມກາງຜູ້ຄົນທີ່ຄອຍໃຫ້ກຳລັງໃຈ ແລະ ມີຄວາມຄິດໃນດ້ານບວກ ເນື່ອງຈາກຄົນເຮົາມັກຈະມີຄວາມຄິດໃນທາງດຽວກັນກັບຜູ້ຄົນທີ່ອ້ອມຂ້າງສະເໝີ ຫາກທ່ານເມົ່າແຕ່ໃຊ້ເວລາທັງຊີວິດໄປກັບຜູ້ຄົນທີ່ເບິ່ງຫຍັງໃນດ້ານລົບ ແລະ ຫົດຫູ່ ທ່ານກໍຍ່ອມຈະກາຍເປັນຄົນທີ່ມັກເບິ່ງຫຍັງໃນດ້ານລົບ ແລະ ຫົດຫູ່ເຊັ່ນກັນ ດັ່ງນັ້ນ ຈົ່ງໃຊ້ເວລາຢູ່ກັບຜູ້ຄົນທີ່ຈະຊ່ວຍເສີມສ້າງນຳພາຊີວິດທ່ານໄປໃນທາງທີ່ດີຂຶ້ນ.

     3. ເລີ່ມຕົ້ນຄວາມສຸກຕັ້ງແຕ່ຕອນນີ້ : ຊີວິດນີ້ສັ້ນຫລາຍ ຖ້າຫາກເຮົາເມົາແຕ່ລໍຖ້າໃຫ້ສະຖານະການນຳພາມາເຊິ່ງຄວາມສຸກ ແລ້ວເມື່ອໃດທ່ານຈຶ່ງຈະມີຄວາມສຸກຈັກເທື່ອ ? ຖ້າຫາກຢາກຈະມີເງິນຫລາຍໆ ຢາກແຕ່ງດອງ ຫລື ມີລູກ ແຕ່ບໍ່ລົງມືເຮັດຫຍັງນອກຈາກລໍຖ້າ ບໍ່ຕ້ອງໃຫ້ໃຜມາບອກກໍຮູ້ວ່າບໍ່ມີທາງເປັນໄປໄດ້ແນ່ນອນ. ແມ່ນຢູ່ວ່າບາງເທື່ອຊີວິດກໍກາຍເປັນຮູບເງົາໂສກເສົ້າທີ່ອາດເຮັດໃຫ້ທ່ານເກີດຄວາມເສຍຫາຍທາງຄວາມຮູ້ສຶກໄດ້, ແຕ່ນັ້ນບໍ່ແມ່ນສິ່ງທີ່ເກີດຂຶ້ນເປັນປະຈຳໃນຊີວິດ ຖ້າຄິດເບິ່ງດີໆແລ້ວ ການມີລູກນ້ອຍໜ້າຮັກ, ມີພໍ່ແມ່ ແລະ ສະມາຊິກຄົນອື່ນໆໃນຄອບຄົວຢູ່ກັນພ້ອມໜ້າໃນເຮືອນ ພຽງເທົ່ານີ້ກໍສາມາດເປັນໄລຍະເວລທີ່ມີຄວາມສຸກທີ່ສຸດໃນຊີວິດໄດ້ແລ້ວ.

ຄວາມຄິດໃນແງ່ລົບກຳຈັດໄດ້ບໍ່ຍາກ - lattana 1 - ຄວາມຄິດໃນແງ່ລົບກຳຈັດໄດ້ບໍ່ຍາກ

    4. ສະແດງອອກໃນສິ່ງທີ່ຕ້ອງການຈະຮູ້ສຶກ : ທ່ານອາດຈະຄິດວ່າຕົນເອງບໍ່ແມ່ນຄົນສົດໃສລ່າເລີງທີ່ຈະມີຄວາມສຸກໄປກັບທຸກເລື່ອງ ແຕ່ຢ່າງໜ້ອຍກໍຂໍໃຫ້ລອງຄິດພາບວ່າໂຕເອງເປັນແບບນັ້ນ ແລ້ວລອງສະແດງມັນອອກມາເບິ່ງ ເຊິ່ງເຄີຍມີຄົນກ່າວໄວ້ວ່າ : ສະແດງໃນສິ່ງທີ່ຕ້ອງການຈະຮູ້ສຶກອອກມາ ແລະ ໃນບໍ່ດົນທ່ານກໍຈະຮູ້ສຶກເຖິງສິ່ງທີ່ສະແດງອອກມາແທ້້ໆ ເຊິ່ງໝາຍຄວາມວ່າທ່ານສາມາດຕັ້ງໂປຣແກຣມໃຫ້ກັບໂຕເອງໄດ້ ໂດຍການຍິ້ມເຂົ້າໄວ້, ເວົ້າສິ່ງດີໆກັບຜູ້ອື່ນເຂົ້າໄວ້ ເຖິງວ່າທ່ານອາດຈະກຳລັງພະເຊີນກັບສະຖານະການທີ່ໂຫດຫ້າຍ ແຕ່ຫາກທ່ານສູ້ກັບມັນດ້ວຍຄວາມຄິດໃນດ້ານບວກໂອກາດໃນການຊະນະກໍຍ່ອມມີຫລາຍກ່ວາ ດັ່ງນັ້ນ ລອງຖາມໂຕເອງດີໆວ່າບັນຫາທີ່ມີຢູ່ນັ້ນ ຄວາມຈິງແລ້ວມັນໃຫຍ່ນ້ອຍປານໃດ ຈາກນັ້ນກໍຍິ້ມເຂົ້າໄວ້ຈົນກ່ວາຈະຮູ້ສຶກແບບນັ້ນແທ້ໆ. ສິ່ງສຳຄັນທີ່ສຸດແມ່ນການຄຳນຶງ ແລະ ຮູ້ເທົ່າທັນໂຕເອງທັງໃນຍາມທີ່ກຳລັງຄິດບວກ ແລະ ຄິດລົບ ຂໍພຽງແຕ່ເອົາໃຈໃສ່ ທ່ານກໍຈະປ່ຽນແປງໂຕເອງໄດ້ ໂດຍການປັບປຸງທັດສະນະຄະຕິທີ່ມີຕໍ່ໂຕເອງເຂົ້າໄປຢູ່ທ່າມກາງຜູ້ຄົນທີ່ພ້ອມຈະສະໜັບສະໜູນທ່ານທຸກເມື່ອ ແລະ ປ່ອຍໃຫ້ສິ່ງຕ່າງໆເປັນໄປໂດຍບໍ່ເມົາແຕ່ຈົມຢູ່ກັບມັນ ເມື່ອເວລາຜ່ານໄປທ່ານອາດຄົ້ນພົບໄດ້ວ່າທັງສຸຂະພາບ, ວຽກງານ ແລະ ຄວາມສຳພັນຕໍ່ຄົນອ້ອມຂ້າງຂອງທ່ານພັດທະນາໄປໃນທາງບວກຫລາຍຍິ່ງຂຶ້ນ.

error: Content is protected !!