ເທສະການໂຄມໄຟນານາຊາດຄັ້ງທຳອິດຈະຈັດຂຶ້ນທີ່ຟາມພູຕາເວັນ ໃນວັນທີ 7-10 ມີນານີ້
ທ່ານ ນາງຈັນທະຈອນ ວົງໄຊ ປະທານຄະນະບໍລິຫານ ສະມາຄົມນັກທຸລະກິດແມ່ຍິງລາວ ໄດ້ຖະແຫລງຕໍ່ສື່ມວນຊົນ ໃນວັນທີ 19 ກຸມພາ ນີ້ວ່າ: ຟາມພູຕາເວັນ ໄດ້ຮ່ວມກັບສະມາຄົມນັກທຸລະກິດແມ່ຍິງລາວ ແມ່ຍິງລາວ ແລະການທ່ອງທ່ຽວ ຈະຈັດງານເທສະການໂຄມໄຟນານາຊາດຄັ້ງທຳອິດ ຂຶ້ນໃນວັນທີ 7-10 ມີນາທີ່ຈະມາເຖິງນີ້ຢູ່ຟາມພູຕາເວັນ ເມືອງທ່າພະບາດ ແຂວງບໍລິຄຳໄຊ ເພື່ອແນໃສ່ສົ່ງເສີມ ແລະສ້າງວຽກເຮັດງານທຳໃຫ້ແກ່ຊຸມຊົນ ແລະໝູ່ບ້ານໃກ້ຄຽງຟາມດັ່ວກ່າວ ແລະເປັນການເຊື່ອມໂຍງໂຄງການທ່ອງທ່ຽວຕາມຍຸດທະສາດລະຫວ່າງນະຄອນຫລວງວຽງຈັນກັບບໍລິຄຳໄຊ ແລະກຸ່ມປະເທດອາຊຽນ, ເຮັດໃຫ້ການທ່ອງທ່ຽວລາວກ້າວສູ່ຄວາມຍືນຍົງ ແລະເປັນການສົ່ງເສີມຜະລິດຕະພັນພາຍໃນ ໃຫ້ກ້າວສູ່ຕະຫລາດສາກົນ. ໃນງານຈະມີກິດຈະກຳຕ່າງໆຄື: ການສະແດງໂຄມໄຟຈາກປະເທດຕ່າງໆເຊັ່ນ: ຫວຽດນາມ, ຈີນ, ຍີ່ປຸ່ນ, ເກົາຫລີ ແລະໄທ ຫລາຍພັນດວງ ເຊິ່ງແຕ່ລະດວງຈະສະແດງອອກເຖິງຄວາມເປັນເອກະລັກຂອງແຕ່ລະປະເທດ. ພ້ອມຈະມີງານວາງສະແດງສິນຄ້າຈາກຜູ້ປະກອບການແມ່ຍິງ ແລະຕ່າງປະເທດຄື ຈີນ, ຫວຽດນາມ ແລະໄທ ລວມທັງໝົດຫລາຍກວ່າ 50 ຮ້ານ. ພິເສດມື້ສຸດທ້າຍຂອງງານຈະມີຄອນເສີດໃຫຍ່ຈາກສິນລະປິນຮ່ວມລາວ-ໄທ, ທ່ຽວຊົມດອກຕາເວັນ ດອກໄມ້ນານາພັນ ແລະງານສະແດງສິລະປະວັນນະຄະດີ ອື່ນໆອີກ.
ໃນໂອກາດດຽວກັນ ທ່ານນາງ ດາລຸນີ ດວງປະເສີດ ເຈົ້າຂອງຟາມພູຕາເວັນ ໄດ້ກ່າວຕໍ່ສື່ມວນຊົນວ່າ: ງານຄັ້ງນີ້, ນອກຈາກເພື່ອເປັນກິດຈະກຳສົ່ງເສີມການທ່ອງທ່ຽວ ແລະຜະລິດຕະພັນພາຍໃນແລ້ວ ຍັງເປັນງານການກຸສົນ ເພາະວ່າລາຍໄດ້ທັງໝົດຈາກງານຄອນເສີດຈະເອົາໄປໃຫ້ພາກສ່ວນຕ່າງໆເຊັ່ນ: ຊ່ວຍເຫລືອຜູ້ປະສົບໄພ, ຊ່ວຍເຫລືອໂຮງຮຽນໃນບ້ານອ້ອມຂ້າງ ແລະຈະມອບໃຫ້ທາງບ້ານເປັນຜູ້ເກັບຄ່າຝາກລົດຕາມການຕົກລົງເຫັນຂອງຄະນະຮັບຜິດຊອບດ້ວຍລາຄາ ລົດໃຫຍ່ບໍ່ເກີນ 10.000 ກີບ ແລະລົດຈັກບໍ່ເກີນ 5.000 ຕໍ່ຄັນ ແລະພ້ອມນີ້, ທ່ານຍັງໄດ້ຂໍເຊີນຊວນໃຫ້ມວນຊົນເຂົ້າຮ່ວມງານ ເພື່ອເຮັດໃຫ້ບັນຍາກາດມີຄວາມຟົດຟື້ນ ສຳລັບຜູ້ທີ່ຢາກປະກອບສ່ວນບູດສິນຄ້າແມ່ນສາມາດເຂົ້າໄປພົວພັນກັບສະມາຄົມທຸລະກິດແມ່ຍິງລາວ ໄດ້ນັບຕັ້ງແຕ່ມື້ນີ້ຈົນເຖິງມື້ເປີດງານ ເພື່ອແນໃສ່ສ້າງສິ່ງດຶງດູດໃຫ້ແກ່ປີທ່ອງທ່ຽວລາວ-ຈີນມີຄວາມຟົດຟື້ນ.
