ຜູ້ນຳ ສປປ ເກົາຫລີ ຈະເດີນທາງ ໄປຫວຽດນາມໂດຍລົດໄຟ
ແຫລ່ງຂ່າວດ້ານຄວາມໝັ້ນຄົງ ແລະ ການກຽມກອງປະຊຸມສຸດຍອດຜູ້ນຳ ອາເມລິກາ ແລະ ສປປ ເກົາຫລີ ເປີດເຜີຍໃນວັນທີ 20 ກຸມພານີ້ວ່າ: ຫວຽດນາມ ກຳລັງກຽມການຕ້ອນຮັບທ່ານ ກິມ ຈ໋ອງອຸນ ຜູ້ນຳ ສປປ ເກົາຫລີ ທີ່ຈະເດີນທາງໂດຍລົດໄຟມານະຄອນຫລວງຮ່າໂນ້ຍ ເພື່ອກອງປະຊຸມສຸດຍອດຄັ້ງທີ 2 ກັບປະທານາທິບໍດີ ໂດນັລ ທຣຳ ຂອງອາເມລິກາ.
ລາຍງານລະບຸວ່າ: ທ່ານ ກິມ ຈ໋ອງອຸນ ຕ້ອງໃຊ້ເວລາໃນການເດີນທາງຢ່າງໜ້ອຍ 2 ມື້ເຄິ່ງ ຈາກນະຄອນຫລວງພຽງຢາງ ຜ່ານປະເທດຈີນມາຫວຽດນາມ ເຊິ່ງໝາຍຄວາມວ່າ: ທ່ານຈະຕ້ອງອອກເດີນທາງໃນອາທິດນີ້ ເພື່ອໃຫ້ຮອດຫວຽດນາມທັນເວລາສຳລັບກຳນົດການເດີນທາງໃນວັນທີ 25 ກຸມພາ. ແຫລ່ງຂ່າວລະບຸວ່າ: ລົດໄຟຂະບວນທີ່ທ່ານ ກິມ ຈ໋ອງອຸນ ເດີນທາງມານັ້ນຈະຢຸດຢູ່ສະຖານີດົງດ່າງ ຊາຍແດນຫວຽດນາມ ເຊິ່ງທ່ານຈະເດີນທາງຕໍ່ໂດຍລົດອີກ 170 ກິໂລແມັດໄປນະຄອນຫລວງຮ່າໂນ້ຍ. ທ່ານ ກິມ ຈ໋ອງອຸນ ແລະ ທ່ານ ທຣຳ ມີກຳນົດຈະພົບກັນຢູ່ນະຄອນຫລວງຮ່າໂນ້ຍ ໃນວັນທີ 27-28 ກຸມພາ ຫລັງຈາກກອງປະຊຸມສຸດຍອດຄັ້ງທຳອິດໃນເດືອນມິຖຸນາປີຜ່ານມາ ຢູ່ສິງກະໂປ ເຊິ່ງຖືເປັນການພົບກັນຄັ້ງປະຫວັດສາດ. ຂະນະດຽວກັນ ມີແຫລ່ງຂ່າວກ່າວວ່າ: ສະຖານທີ່ຈັດກອງປະຊຸມນັ້ນຄາດວ່າຈະເປັນເຮືອນພັກຂອງລັດຖະບານ ເຊິ່ງເປັນອາຄານໃນຍຸກອານານິຄົມ ຕັ້ງຢູ່ໃຈກາງນະຄອນຫລວງຮ່າໂນ້ຍ, ແຕ່ແຫລ່ງຂ່າວທັງຫລາຍກ່າວວ່າ: ແຜນການເຫລົ່ານີ້ມີໂອກາດຈະປ່ຽນແປງໄດ້ຕະຫລອດເວລາ ເນື່ອງຈາກບັນຫາທາງດ້ານຄວາມປອດໄພ.
