ຊຳຊຸງ ເປີດຕົວສະມາດໂຟນ ພັບໄດ້ຮອງຮັບ 5G
ຊຳຊຸງ ເປີດຕົວສະມາດໂຟນ 3 ຮຸ້ນ ຮອງຮັບລະບົບ 5G ແລະ ສະມາດໂຟນແບບພັບໄດ້ ລາຄາເກືອບ 2.000 ໂດລາ ເລີ່ມວາງຈຳໜ່າຍຢ່າງເປັນທາງການ 26 ເມສານີ້.
ຊຳຊຸງ ເປີດຕົວຜະລິດຕະພັນຮຸ້ນຕ່າງໆໃນງານກາແລັກຊີ ອັນແພກ 2019 ທີ່ນະຄອນຊານຟຣານຊິສໂກ ລັດກາລິຟໍເນຍ ອາເມລິກາ ໂດຍຜະລິດຕະພັນທີ່ຊຳຊຸງນຳມາເປີດຕົວຄັ້ງນີ້ ມີສະມາດໂຟນກາແລັກຊີ ເອສ 10 ແລະ ເອສ 10 ພລັສ ຮອງຮັບລະບົບ 5G ສາມາດຊາກລະຫວ່າງໂທລະສັບນຳກັນເອງໄດ້ ໂດຍການວາງໂທລະສັບຊ້ອນກັນ ລວມທັງສະມາດໂຟນພັບໄດ້ໃນລາຄາຈຳໜ່າຍໜ່ວຍລະ 1.980 ໂດລາ.
ສຳລັບສະມາດໂຟນກາແລັກຊີ ເອສ 10 ແລະ ເອສ 10 ພລັສນັ້ນ ມີຈຸດເດັ່ນຄືຕິດຕັ້ງກ້ອງຖ່າຍຮູບທາງໜ້າ 2 ອັນ ທີ່ເພີ່ມລະດັບຄວາມເລິກ ແລະ ກ້ອງທາງຫລັງ 3 ອັນ ທີ່ຊ່ວຍເພີ່ມປະສິດທິພາບການຖ່າຍຮູບ ແລະ ວີດີໂອສຳລັບອິນສະຕາແກຣມໂດຍສະເພາະ ເຊິ່ງສະມາດໂຟນທັງ 2 ຮຸ້ນນີ້ມີລາຄາເລີ່ມຕົ້ນ 749 ໂດລາ ເລີ່ມວາງຈຳໜ່າຍຢ່າງເປັນທາງການວັນທີ 8 ມີນານີ້.
