ຂໍພຽງບໍ່ເສຍໃຫ້ ລິເວີພູລ ໂຊລຊາ ສ້າງສະຖິຕິໃໝ່ທັນທີ
ເກມແດງເດືອດທ້າຍອາທິດນີ້ ມີຄວາມໝາຍສຳຄັນຕໍ່ ໂອເລ່ ກຸມນາ ໂຊລຊາ ເພາະຖ້າພາ ແມນເຊັສເຕີ ຢູໄນເຕັດ ຊະນະ ຫລື ສະເໝີ ລິເວີພູລ ຈະທຳລາຍສະຖິຕິ ພຣີເມຍລີກ ທີ່ ກຸສ ຮິດດິງ ເຄີຍເຮັດໄວ້ກັບ ເຊລຊີ ເມື່ອ 10 ປີຜ່ານມາທັນທີ.
ໂອເລ່ ກຸນນາ ໂຊລຊາ ຜູ້ຈັດການທີມຊົ່ວຄາວຂອງ ແມນເຊັສເຕີ ຢູໄນເຕັດ ຈະພາທີມເປີດສະໜາມ ໂອດ ແທບຟອດ ຕ້ອນຮັບການມາຢາມຂອງ ລິເວີພູລ ໃນເກມແດງເດືອດ ວັນທີ 24 ກຸມພານີ້.
ໂຊລຊາ ເຂົ້າມາຮັບວຽກຕໍ່ຈາກ ໂຊເຊ່ ມູຣິນໂຢ ໃນເດືອນທັນວາຜ່ານມາ ກ່ອນສ້າງຜົນງານໄດ້ຢ່າງໂດດເດັ່ນໃນ ພຣີເມຍລີກ ໂດຍລົງຫລິ້ນໄປ 9 ນັດ ຊະນະ 8 ແລະ ສະເໝີ 1 ເກມ ໄດ້ 25 ຄະແນນ.
ຖ້າ ໂຊລຊາ ພາ ແມນເຊັສເຕີ ຢູໄນເຕັດ ຊະນະ ຫລື ສະເໝີ ລິເວີພູລ ຈະສົ່ງຜົນໃຫ້ກາຍເປັນຜູ້ຈັດການທີມທີ່ພາທີມເກັບຄະແນນໄດ້ຫລາຍສຸດຈາກການລົງຄຸມທີມໃນ ພຣີເມຍລີກ 10 ນັດທຳອິດທັນທີ ທຳລາຍສະຖິຕິທີ່ ກຸສ ຮິດດິງ ພາ ເຊລຊີ ເກັບ 25 ຄະແນນໃນ 10 ນັດທຳອິດທີ່ເຂົ້າມາຄຸມທີມໃນປີ 2009.
ທັງນີ້ ຮິດດິງ ພາ ເຊລຊີ ຊະນະ 8 ຈາກ 10 ເກມທຳອິດ, ສ່ວນອີກ 2 ນັດສະເໝີ ເອັຟເວີຕັນ ແລະ ເສຍໃຫ້ ທ໊ອດແນມ ຮ໊ອດສະເປີ.
