ຄະນະຊີ້ນຳວຽກງານ MIA ລົງຕິດຕາມການປະຕິບັດງານຮ່ວມພາກສະໜາມ ລາວ-ອາເມຣິກາ ຢູ່ແຂວງຫົວພັນ”
ເມື່ອບໍ່ດົນມານີ້, ທ່ານ ພົນຕີ ຄໍາສີ ວົງຄໍາຊາວ ຫົວໜ້າຫ້ອງວ່າການກະຊວງປ້ອງກັນປະເທດ ທັງເປັນຄະນະຊີ້ນໍາວຽກງານສໍາຫຼວດ ແລະ ຂຸດຄົ້ນເພື່ອຊອກຫາຮ່ອງຮອຍ ແລະ ສິ່ງເສດເຫຼືອຂອງທະຫານອາເມຣິກາທີ່ຫາຍສາບສູນໃນປາງສົງຄາມຢູ່ລາວ (MIA), ພ້ອມດ້ວຍຄະນະຈາກກະຊວງການຕ່າງປະເທດ ແລະ ກະຊວງປ້ອງກັນປະເທດ ໄດ້ລົງຕິດຕາມການປະຕິບັດງານຮ່ວມໃນພາກສະໜາມລະຫວ່າງ ລາວ-ອາເມຣິກາ ໃນການສໍາຫຼວດ ແລະ ຂຸດຄົ້ນເພື່ອຊອກຫາຮ່ອງຮອຍ ແລະ ສິ່ງເສດເຫຼືອຂອງທະຫານອາເມຣິກາທີ່ຫາຍສາບສູນໃນປາງສົງຄາມຢູ່ລາວ, ຄັ້ງທີ 2 ປະຈໍາສົກປີ 2018-2019 ຢູ່ແຂວງຫົວພັນ. ເພື່ອເປັນການກະຕຸກຊຸກຍູ້ໃຫ້ກໍາລັງໃຈແກ່ອ້າຍນ້ອງທີ່ພວມປະຕິບັດໜ້າທີ່ຢູ່ພາກສະໜາມ ແລະ ຖືໂອກາດລົງຕິດຕາມກວດກາສະພາບການປະຕິບັດງານຮ່ວມດ້ານມະນຸດສະທໍາລາວ-ອາເມຣິກາ ຕາມເງື່ອນໄຂ ແລະ ຄວາມອາດສາມາດຕົວຈິງຂອງຝ່າຍລາວ. ໃນໂອກາດນີ້, ທາງຄະນະໄດ້ລົງຢ້ຽມຢາມຈຸດຂຸດຄົ້ນກໍລະນີ 0079, 0084 ເຂດບ້ານນາແທ່ນ ແລະ 0690 ເຂດບ້ານບັກ, ເມືອງວຽງໄຊ ແຂວງຫົວພັນ, ພ້ອມທັງໄດ້ຮັບຟັງລາຍງານເຖິງຄວາມ ສະດວກ ແລະ ຫຍຸ້ງຍາກຕ່າງໆ ໃນການປະຕິບັດວຽກງານຢູ່ແຕ່ລະຈຸດຂຸດຄົ້ນ ຈາກຫົວໜ້າພາກສະໜາມຂອງຝ່າຍລາວ ແລະ ອາເມຣິກາ. ການປະຕິບັດງານຮ່ວມສອງຝ່າຍໃນພາກສະໜາມຄັ້ງນີ້ ກໍຄືຫຼາຍຄັ້ງທີ່ຜ່ານມາ ໄດ້ດໍາເນີນດ້ວຍບັນຍາກາດອັນສ້າງສັນ ແລະ ປະສົບຜົນສໍາເລັດເປັນຢ່າງດີ. ເຖິງວ່າຈະປະສົບກັບອຸປະສັກ ແລະ ສິ່ງທ້າທາຍຫຼາຍຢ່າງກໍຕາມ, ແຕ່ການປະຕິບັດງານຮ່ວມກັນດັ່ງກ່າວ ກໍໄດ້ຮັບຜົນສໍາເລັດທີ່ເປັນຢ່າງໜ້າຊື່ນຊົມຕະຫຼອດມາ. ທັງນີ້ກໍຍ້ອນມີການຮ່ວມມືຂອງລັດຖະບານ, ເຈົ້າໜ້າທີ່ກ່ຽວຂ້ອງຂອງລາວທຸກໆຂັ້ນແຕ່ສູນກາງຮອດທ້ອງຖິ່ນ ກໍຄືການປະກອບສ່ວນອັນສໍາຄັນ ແລະ ຂາດບໍ່ໄດ້ຂອງປະຊາຊົນລາວບັນດາເຜົ່າ, ຊຶ່ງສ່ອງແສງເຖິງນະໂຍບາຍມະນຸດສະທໍາອັນສະເໝີຕົ້ນສະເໝີປາຍຂອງລັດຖະບານລາວ ທີ່ມີຕໍ່ສະຫະລັດອາເມຣິກາ, ໂດຍສະເພາະແມ່ນຕໍ່ຄອບຄົວ ແລະ ຍາດພີ່ນ້ອງຂອງຜູ້ຫາຍສາບສູນໃນປາງສົງຄາມຢູ່ລາວ.
ຕະຫຼອດໄລຍະ 3 ທົດສະວັດກວ່າຜ່ານມາ, ລັດຖະບານກໍຄືປະຊາຊົນລາວໄດ້ໃຫ້ການຮ່ວມມືເປັນຢ່າງດີເທົ່າທີ່ເປັນໄປໄດ້ໃນວຽກງານມະນຸດສະທໍາດັ່ງກ່າວແກ່ຝ່າຍສະຫະລັດ ອາເມຣິກາ, ແນໃສ່ຊອກຄົ້ນ ແລະ ນໍາເອົາສິ່ງເສດເຫຼືອຂອງທະຫານອາເມຣິກາທີ່ເສຍຊີວິດໃນປາງສົງຄາມຢູ່ລາວສົ່ງຄືນໃຫ້ຄອບຄົວຂອງເຂົາເຈົ້າ, ອັນເປັນການປະກອບສ່ວນເຂົ້າໃນການເສີມສ້າງການພົວພັນຖານເພື່ອນມິດ ແລະ ການຮ່ວມມືອັນຍາວນານ ລະຫວ່າງ ສອງປະເທດໃຫ້ເຂັ້ມແຂງ ແລະ ມີໝາກຜົນຕົວຈິງ.
