ເວເນຊູເອລາຍອມຮັບ ການຊ່ວຍເຫລືອຈາກບັນດາປະເທດ
ຜູ້ນຳເວເນຊູເອລາປະກາດວ່າ: ພ້ອມຮັບການຊ່ວຍເຫລືອດ້ານການແພດຈາກຣັດເຊຍ ແລະ ພ້ອມຮັບການຊ່ວຍເຫລືອດ້ານມະນຸດສະທຳຈາກ EU.
ຫລັງການພົບປະຫາລືກັບຮອງລັດຖະມົນຕີຕ່າງປະເທດຣັດເຊຍ, ປະທານາທິບໍດີ ນິໂກລັສ ມາດູໂຣ ຜູ້ນຳເວເນຊູເອລາ ປະກາດວ່າ: ເວເນຊູເອລາ ພ້ອມຮັບການຊ່ວຍເຫລືອດ້ານການແພດຈາກຣັດເຊຍ ແລະ ພ້ອມຮັບການຊ່ວຍເຫລືອດ້ານມະນຸດສະທຳຈາກສະຫະພາບເອີຣົບ ຫລື EU ຜ່ານທາງອົງການສະຫະປະຊາຊາດ. ພ້ອມກ່າວວ່າ: ລັດຖະບານເວເນຊູເອລາກຳລັງພິຈາລະນາປິດຊາຍແດນທີ່ຕິດກັບໂກລົມບີ ແລະ ເບຣຊິນ.
ຂະນະທີ່ ຝ່າຍຄ້ານເວເນຊູເອລາກຽມຮັບອາຫານ ແລະ ເຄື່ອງບັນເທົາທຸກຜ່ານທາງຊາຍແດນດັ່ງກ່າວ. ກ່ອນໜ້ານີ້ ປະທານາທິບໍດີ ໂດນັລ ທຣຳ ຜູ້ນຳອາເມລິກາ ກ່າວຫາທ່ານ ມາດູໂຣ ວ່າເປັນຕົ້ນເຫດເຮັດໃຫ້ຊາວເວເນຊູເອລາຕ້ອງຜະເຊີນກັບຄວາມອຶດຫິວ ເນື່ອງຈາກຂັດຂວາງບໍ່ໃຫ້ອາຫານ ແລະ ເຄື່ອງບັນເທົາທຸກຈາກອາເມລິກາສົ່ງເຖິງມືຊາວເວເນຊູເອລາ.
