ສະຕີເວັນ ເຈີຣາດ ຄຸມ ເຣັນເຈີ ດີຕໍ່ເນື່ອງ ຫລ້າສຸດນຳທີມເຂົ້າຮອບ 8 ທີມ ສະກັອດຕິສ ຄັບ
ສະຕີເວັນ ເຈີຣາດ ອະດີດກອງກາງທີມຊາດອັງກິດ ແລະ ສະໂມສອນລິເວີພູລ ອາຍຸ 38 ປີ ຜູ້ຈັດການທີມ ເຣັນເຈີ ທີມຊັ້ນນຳໃນລີກສູງສຸດຂອງປະເທດສະກັອດແລນ ຄຸມທີມຜົນງານດີຕໍ່ເນື່ອງ. ຫລ້າສຸດສາມາດນຳທີມເຂົ້າເຖິງຮອບ 8 ທີມສຸດທ້າຍ ການແຂ່ງຂັນເຕະບານສະກັອດຕິສ ເອັຟເອ ຄັບ ໃນກາງອາທິດນີ້ ເປີດບ້ານຊະນະ ຄິວມານັອກ 5-0 ທີມຢາມເຫລືອຜູ້ຫລິ້ນ 10 ຄົນນັບແຕ່ 25 ນາທີ ເມື່ອຜູ້ຮັກສາປະຕູໄດ້ໃບແດງຈາກການຊັກສອກໃສ່ຜູ້ຫລິ້ນ ເຣັນເຈີ. ຈາກນັ້ນເຈົ້າບ້ານເຣັນເຈີ ໄລ່ຖະຫລົ່ມ 5-0 ຈາກ ອາວເຟຣໂດ້ ໂມເຣລັອສ ກອງໜ້າຊາວໂຄລົມເບຍ ຜູ້ດຽວ 4 ປະຕູ ນາທີ 7, 45, 78, 83 ແລະ ແອນດີ້ ຮາວລີເດ ນາທີ 77.
ເຣັນເຈີ ເຂົ້າສູ່ຮອບ 8 ທີມສຸດທ້າຍໄປລຸ້ນແຊ້ມສະໄໝທີ 34 ຈະບຸກໄປຢາມ ອາເບີດິນ ເປັນທີມທີ່ຝັງແຄ້ນໄວ້ກັບ ເຣັນເຈີ ໃນລະດູການນີ້ ເພາະເຂ່ຍ ເຣັນເຈີ ຕົກຮອບຮອງຊະນະເລີດ ສະກັອດຕິສ ລີກ ຄັບ.
ສຳລັບ ສະຕີເວັນ ເຈີຣາດ ຜັນຕົວເປັນຄູຝຶກຄັ້ງທຳອິດ ດ້ວຍການເຂົ້າມາຄຸມເຣັນເຈີ ໃນເດືອນມິຖຸນາ 2018 ຄຸມທີມ 46 ນັດ ຊະນະ 24 ສະເໝີ 15 ແລະ ເສຍ 7 ນັດ ສະເລ່ຍໂອກາດຊະນະຕໍ່ນັດບໍ່ຫລຸດ 52,17% ໃນລີກລະດູການນີ້ ຈັ້ງຢູ່ອັນດັບ 2 ມີ 52 ຄະແນນ ຈາກ 26 ນັດ ຕາມຫລັງທີມນຳ ເຊວຕິກ ແຊ້ມເກົ່າ 8 ຄະແນນ.
