ອິນໂດເນເຊຍຈະຈັດໂມໂຕຈີພີຢູ່ເກາະລອມບອກ
ອິນໂດເນເຊຍຈະເປັນເຈົ້າພາບການແຂ່ງຂັນກຣັງປຣີ ມໍເຕີໄຊເຄິລ ເຣສຊິງ ຫລື ໂມໂຕຈີພີ (MotoGP) ນັບແຕ່ປີ 2021 ຢູ່ເກາະລອມບອກ ທີ່ເກີດແຜ່ນດິນໄຫວໃຫຍ່ຫລາຍຄັ້ງເມື່ອປີກ່ອນ.
ບໍລິສັດພັດທະນາການທ່ອງທ່ຽວອິນໂດເນເຊຍ ຖະແຫລງວ່າ: ໂຄງການນີ້ຕ້ອງການຊ່ວຍຟື້ນຟູເກາະລອມບອກທີ່ຢູ່ຖັດຈາກເກາະບາຫລີ ຫລັງເກີດແຜ່ນດິນໄຫວ ຂ້າຊີວິດຄົນໄປຫລາຍກວ່າ 500 ຄົນ ໃນເດືອນກໍລະກົດ ແລະ ສິງຫາປີກ່ອນ, ທາງບໍລິສັດເຮັດຂໍ້ຕົກລົງໄລຍະ 3 ປີກັບ ດໍນາສະປອດ ເຈົ້າຂອງລິຂະສິດການແຂ່ງຂັນໂມໂຕີຈີພີ ເລືອກເກາະລອມບອກໃຫ້ເປັນຈຸດໝາຍການທ່ອງທ່ຽວທາງກິລາ ໂດຍຈະສ້າງສະໜາມແຂ່ງໃຫ້ສຳເລັດພາຍໃນປີ 2021 ເປັນສະໜາມໄລຍະທາງ 4,32 ກິໂລແມັດ ມີທັງໝົດ 18 ໂຄ້ງ ເພື່ອໃຫ້ແຂ່ງຂັນລົດຈັກທາງລຽບຊີງແຊ້ມໂລກລະຫວ່າງປີ 2021-2023.
