ຈິດໃຈຊາດ, ສະຕິຊາດ ແລະ ຄວາມເປັນຊາດ

ຈິດໃຈຊາດ, ສະຕິຊາດ ແລະ ຄວາມເປັນຊາດ - Untitled design - ຈິດໃຈຊາດ, ສະຕິຊາດ ແລະ ຄວາມເປັນຊາດ


ໂດຍ: ລູກເມືອງພວນ

ຈິດໃຈຊາດ: ໝາຍເຖິງຄວາມເອກອ້າງທະນົງໃຈ, ຄວາມພາກພູມໃຈຕໍ່ແຜ່ນດິນເກີດ, ຕໍ່ເຜົ່າ ພັນ, ຕໍ່ຮີດຄອງປະເພນີອັນດີງາມຂອງຊາດ. ເຖິງຈະຕົກຢູ່ໃນດິນແດນແຫ່ງຫົນໃດກໍຕາມ ກໍບໍ່ ສາມາດຈະລືມເລືອນແຜ່ນດິນເກີດ ແລະ ເຊື້ອເຜົ່າພົງພັນຂອງຕົນເອງລົງໄດ້. ຈິດໃຈຊາດຕິດ ພັນກັບ ສະຕິຊາດ ຢູ່ສະເໝີ.

ສະຕິຊາດ: ສະຕິຊາດໝາຍເຖິງຄວາມແຂງແກ່ນບໍ່ຄອນແຄນຂອງຈິດໃຈທີ່ມີຕໍ່ຊາດຕົນເອງ. ເຖິງແມ່ນວ່າຈະມີໃຜມາຕົວະຕົ້ມຫຼອກລວງ, ໃສ່ຮ້າຍປ້າຍສີແນວບໍ່ດີໃສ່ປະເທດຊາດຕົນເອງ ກໍບໍ່ຫຼົງເຊື່ອງ່າຍ, ຢຶດໝັ້ນໃນຄວາມຮັກຊາດ, ຄວາມເປັນເອກະລາດຂອງຊາດຕົນໄວ້. ສະຕິ ຊາດຕິດພັນຢ່າງສະນິດແໜ້ນກັບ ຄວາມເປັນຊາດ.

ຄວາມເປັນຊາດ: ໝາຍເຖິງການປະພຶດ, ການກະທໍາທີ່ສະແດງໃຫ້ເຫັນເອກະລັກຂອງຊາດຕົນ ຢູ່ສະເໝີ ເຊັ່ນ: ການປົກປັກຮັກສາພາສາເວົ້າ, ພາສາຂຽນ, ການກິນຢູ່, ການນຸ່ງຖື, ຮີດຄອງປະເພນີອັນດີງາມຂອງຊາດ….ເຖິງແມ່ນວ່າຈະຕົກຢູ່ໃນສະຖານະການໃດກໍຕາມກໍສະ ແດງລັກສະນະຊາດຂອງຕົນເອງຢູ່ສະເໝີ.

ຈິດໃຈຊາດ, ສະຕິຊາດ ແລະ ຄວາມເປັນຊາດ - Wave100S AD to Website 2020 0 - ຈິດໃຈຊາດ, ສະຕິຊາດ ແລະ ຄວາມເປັນຊາດ

ໃນຍຸກໂລກາພິວັດ ແຫ່ງການເຊື່ອມໂຍງດ້ານຂໍ້ມູນຂ່າວສານ ແລະ ເຕັກໂນໂລຢີນີ້, ຖ້າພວກ ເຮົາຫາກບໍ່ມີການປັບປຸງລະບົບການສຶກສາຂອງພວກເຮົາຄືນໃໝ່ ຈະເຮັດໃຫ້ 3 ບັນຫາຂ້າງ ເທິງນັ້ນຖືກເສື່ອມຖອຍລົງຢ່າງໜ້າເປັນຫ່ວງ. ໃນລະບົບການສຶກສາຂອງພວກເຮົາທຸກມື້ນີ້, ອາຈານຂຶ້ນຫ້ອງສອນຈະເລັ່ງໃສ່ແຕ່ການສົ່ງຄວາມຮູ້ທາງດ້ານວິທະຍາສາດເປັນຕົ້ນຕໍ, ການສຶກ ສາອົບຮົມທັດສະນະຄະຕິຊາດແມ່ນຍັງເຮັດບໍ່ທັນໄດ້ດີເທົ່າທີ່ຄວນ, ໂດຍສະເພາະແມ່ນ 3 ບັນຫາຂ້າງເທິງນັ້ນ. ພວກເຮົາຈະສັງເກດເຫັນວ່າ ສະຕິຊາດ ແລະ ຄວາມເປັນຊາດຂອງຄົນລາວ ເຮົາຈຳນວນໜຶ່ງຖືກເສື່ອມຖອຍຢ່າງຮ້າຍແຮງ, ສະຕິຊາດ ແລະ ຄວາມເປັນຊາດນັ້ນຍັງບໍ່ທັນ ຈະແຈ້ງ ແລະ ຈຳແນກບໍ່ໄດ້ໃນຖັນແຖວໄວໜຸ່ມລາວໃນຍຸກປັດຈຸບັນ ເຊິ່ງມັນສະແດງອອກໃຫ້ ເຫັນຢູ່ໃນການນິຍົມເວົ້າ ແລະ ຂຽນເປັນພາສາຂອງຊາດອື່ນເຂົ້າໃນການເຄື່ອນໄຫວດຳລົງຊີ ວິດປະຈຳວັນຂອງຕົນເອງ ແມ່ນແຕ່ການໂຄສະນາຄ້າຂາຍສິນຄ້າຂອງອົງກອນຕ່າງໆກໍເຊັ່ນ ດຽວກັນ. ອັນນັ້ນມັນສະແດງເຖິງຫຍັງ? ສະແດງເຖິງວ່າສະຕິຊາດ ແລະ ຄວາມເປັນຊາດ ນັ້ນຖືກເສື່ອມຖອຍໜ້ອຍລົງທຸກທີ, ນິຍົມຊົມໃຊ້ວັດຖຸສິ່ງຂອງຂອງຊາດອື່ນ ສ່ວນຜະລິດຕະ ພັນຂອງຊາດຕົນຜະລິດໄດ້ຊໍ້າພັດບໍ່ນິຍົມ ແລະ ຍັງຈົ່ມເວົ້າວ່າບໍ່ມີຄຸນນະພາບ. ມີຊາດໃດແດ່ໃນ ໂລກນີ້ທີ່ສາມາດໃຊ້ຈ່າຍຫຼາຍຕະກຸນເງິນຢູ່ພາຍໃນປະເທດໂຕເອງ? ມັກນິຍົມຊົມຊອບວັດທະ ນະທໍາຂອງຊາດອື່ນທີ່ບໍ່ແມ່ນຂອງຊາດຕົນ ? ຄົນໃນຊາດບໍ່ມັກເບິ່ງໂລະພາບ ແລະ ຟັງເພງຂອງ ຕົນເອງ ?……ດັ່ງນັ້ນ, ຈຶ່ງເຫັນວ່າມີຄວາມຈໍາເປັນທີ່ພວກເຮົາຈະຕ້ອງໄດ້ປັບປຸງລະບົບການ ສຶກສາ ແລະ ວິທີການສິດສອນ, ໂດຍສະເພາະແມ່ນລະບົບການສຶກສາອົບຮົມການເມືອງແນວ ຄິດ, ຈິດໃຈຊາດ, ສະຕິຊາດ ແລະ ຄວາມເປັນຊາດຕົນເອງໃຫ້ແກ່ລູກຫຼານລາວສູງຂຶ້ນ, ທຸກບົດສອນວິທະຍາສາດຈະຕ້ອງຄໍານຶງເຖິງການສົ່ງສະຕິຊາດໃຫ້ແກ່ລູກຫຼານລາວຢູ່ໃນບົດຮຽນນັ້ນໆ ເພື່ອໃຫ້ຄົນລາວຮູ້ເຊີດຊູກຽດສັກສີ ແລະ ຄວາມເປັນເອກະລາດຂອງຊາດລາວໄວ້ໃຫ້ ໝັ້ນຄົງຕະຫຼອດໄປ.

ຕໍ່ກັບເນື້ອໃນທີ່ຈະເອົາມາສຶກສາອົບຮົມ ຝຶກຝົນຈິດໃຈຊາດ, ສະຕິຊາດ ແລະ ຄວາມເປັນຊາດ ນັ້ນແມ່ນຫຍັງ? ເປັນອັນແນ່ນອນວ່າເນື້ອໃນ ແລະ ວິທີການທີ່ຈະນຳເອົາມາສຶກສາອົບຮົມນັ້ນ ມັນກໍມີຫຼາຍເນື້ອໃນ ແລະ ວິທີການ ບໍ່ແມ່ນຈະອາໄສແຕ່ເນື້ອໃນ ແລະ ວິທີການດຽວ. ແຕ່ຕາມທັດສະນະຂອງຜູ້ຂຽນເຫັນວ່າເນື້ອໃນຕົ້ນຕໍ ແລະ ຫຼັກໆ ແລ້ວແມ່ນຕ້ອງອີງໃສ່ ວິຊາປະຫວັດສາດຂອງຊາດເປັນຫຼັກ ແລະ ຕົ້ນຕໍ. ເປັນຫຍັງຈຶ່ງວ່າແນວນັ້ນ? ກໍເພາະວ່າຖ້າ ຄົນລາວຫາກຮຽນຮູ້ກົກເຄົ້າເຫງົ້າກໍເຊື້ອເຜົ່າພົງພັນຂອງຊາດຕົນເອງຢ່າງເລິກເຊິ່ງ, ຮູ້ປະ ຫວັດສາດການຕໍ່ສູ້ສັດຕູຜູ້ຮຸກຮານປະເທດຊາດ, ຮູ້ທີ່ໄປທີ່ມາ ແລະ ຕົ້ນກຳເນີດຂອງຊາດຕົນ ອັນນີ້ຈະເປັນພື້ນຖານອັນໜັກແໜ້ນໃຫ້ແກ່ການເສີມຂະຫຍາຍຈິດໃຈຊາດ, ສະຕິຊາດ ແລະ ຄວາມເປັນຊາດໃຫ້ສູງຂຶ້ນ, ຄົນລາວຈະຮູ້ຄຽດ, ຮູ້ຊັງ, ຮູ້ຖະໜອມ, ຮູ້ປົກປ້ອງກຽດສັກສີ ແລະ ຄວາມເປັນເອກະລາດຂອງຊາດຕົນໄວ້ຄູ່ກັບຄົນລາວຕະຫຼອດໄປ. ຖ້າຄົນລາວຫາກບໍ່ຮຽນຮູ້ປະ ຫວັດສາດຕົ້ນກຳເນີດຂອງຊາດຕົນ, ປະຫວັດສາດການຕໍ່ສູ້ສັດຕູຜູ້ຮຸກຮານ, ການເປັນຫົວ ເມືອງຂຶ້ນຂອງຊາດອື່ນແລ້ວ ຈິດໃຈຊາດ, ສະຕິຊາດ ແລະ ຄວາມເປັນຊາດຂອງຄົນລາວກໍຈະ ຖືກຕີຖອຍໃຫ້ລຸດໜ້ອຍຖອຍລົງຢ່າງໜ້າເປັນຫ່ວງ ເພາະທຸກວັນນີ້ ພວກກໍາລັງອິດທິປໍລະປັກ ກັບພວກເຮົານັ້ນ, ພວກເຂົາຫາທຸກວິທີທາງເຮັດໃຫ້ຄົນລາວຫຼົງລືມປະຫວັດສາດຂອງຊາດຕົນ ດ້ວຍມາດຕະການທາງດ້ານເສດຖະກິດ ແລະ ການບິດເບືອນຄວາມຈິງດ້ານປະຫວັດສາດຂອງ ຊາດລາວ, ເຮັດໃຫ້ຄົນລາວຫຼົງທິດ ແລະ ຫຼົງເຊື່ອ ຫັນທິດຕໍ່ຕ້ານລັດຖະບານ ແລະ ກໍຫັນໄປ ຍົກຍ້ອງ, ນິຍົມຊົມຊອບພວກເຂົາ ເພື່ອໃຫ້ຄົນລາວເປັນຜູ້ລຶບປະຫວັດສາດຂອງຊາດຕົນເສຍ ເອງ.

ເຖິງເວລາແລ້ວ ທີ່ພວກເຮົາຈະໄດ້ຊ່ວຍກັນອົບຮົມບົ່ມເຄາະລູກຫຼານລາວໃຫ້ມີຈິດໃຈຜ່ອງໃສ ຕໍ່ຊາດ, ຮູ້ເຄົາລົບນັບຖື ແລະ ຊູກຽດສັກສີຊາດຕົນໃຫ້ສູງຂຶ້ນ. ຖ້າພວກເຮົາບໍ່ອອກແຮງບັນ ຫານີ້ຢ່າງຈິງຈັງ ສິ່ງດີງາມຂອງຊາດ, ສິລະປະວັນນະຄະດີ, ຮີດຄອງປະເພດີອັນດີງາມກໍຈະສູນ ຫາຍໄປຕາມການເວລາທີ່ຄົນລາວບໍ່ສາມາດຮັກສາໄວ້ໄດ້, ໃນທີ່ສຸດຄົນລາວ, ຊາດລາວຈະ ເສື່ອມສະຫຼາຍໄປຢ່າງບໍ່ຮູ້ເມື່ອຕົວ.

ຈິດໃຈຊາດ, ສະຕິຊາດ ແລະ ຄວາມເປັນຊາດ - WhatsApp Image 2020 05 27 at 5 - ຈິດໃຈຊາດ, ສະຕິຊາດ ແລະ ຄວາມເປັນຊາດ
ຈິດໃຈຊາດ, ສະຕິຊາດ ແລະ ຄວາມເປັນຊາດ - WhatsApp Image 2020 05 27 at 5 - ຈິດໃຈຊາດ, ສະຕິຊາດ ແລະ ຄວາມເປັນຊາດ
error: Alert: ເນື້ອຫາຂ່າວມີລິຂະສິດ !!