ລັດເລັ່ງກວດຄືນການສໍາປະທານທີ່ດິນບໍ່ມີການພັດທະນາ

  ລັດຖະບານພວມເລັ່ງກວດຄືນບັນດາໂຄງການເຊົ່າ-ສໍາປະທານທີ່ດິນລັດໃນທົ່ວປະເທດ, ຖ້າຫາກພົບເຫັນໂຄງການໃດບໍ່ມີການພັດທະນາແມ່ນໃຫ້ຍົກເລິກ, ພ້ອມປັບໃໝຕາມລະບຽບກົດໝາຍ.

  ບັນຫາດັ່ງກ່າວ, ໄດ້ຕົກລົງເຫັນດີເປັນເອກະພາບຢູ່ກອງປະຊຸມລັດຖະບານປະຈໍາເດືອນກຸມພາທີ່ຈັດຂຶ້ນໃນທ້າຍອາທິດຜ່ານມານີ້, ໂດຍການເປັນປະທານຂອງທ່ານນາຍົກລັດຖະມົນຕີ ທອງລຸນ ສີສຸລິດ, ເຊິ່ງພາຍຫລັງລັດຖະບານໄດ້ຮັບຮອງເອົາບົດລາຍງານຜົນການກວດກາໂຄງການເຊົ່າ ແລະ ສໍາປະທານທີ່ ດິນໃນທົ່ວປະເທດແລ້ວນັ້ນ, ກໍໄດ້ຊີ້ນໍາໃຫ້ພາກສ່ວນກ່ຽວຂ້ອງເອົາໃຈໃສ່ບັນຫາສໍາຄັນໃນວຽກງານດັ່ງກ່າວ ຄື: ພິຈາລະນາຍົກເລິກສັນຍາ, ປັບໃໝຜູ້ສໍາປະທານ ຫລື ເຊົ່າທີ່ດິນ ທີ່ບໍ່ເຄື່ອນໄຫວກວ່າ 200 ໂຄງການ ກວມເອົາເນື້ອທີ່ຫລາຍກວ່າ 81.870 ເຮັກຕາ. ໃຫ້ບັນດາກະຊວງ ແລະ ອົງການປົກຄອງທ້ອງຖິ່ນເອກະພາບກັບກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ລົງສໍາຫລວດວັດແທກຕົວຈິງເພື່ອອອກແຜນທີ່ດິນລັດກ່ອນເຊັນສັນຍາສໍາປະທານ ເພື່ອເປັນເອກະສານໃຫ້ກະຊວງການເງິນສາມາດເກັບຄ່າເຊົ່າ-ສໍາປະທານໄດ້ຢ່າງຖືກຕ້ອງ ແລະ ມີປະສິດທິຜົນ. ເລັ່ງປັບປຸງຖານຂໍ້ມູນທີ່ດິນຢ່າງເປັນລະບົບ ແລະ ຕ້ອງມີກົນໄກແລກປ່ຽນຂໍ້ມູນຂອງແຕ່ລະຂະແໜງການຢ່າງເປັນປົກກະຕິ, ເນື່ອງຈາກຂໍ້ມູນການເຊົ່າ-ສໍາປະທານທີ່ດິນລັດມີການປ່ຽນແປງເລື້ອຍໆ, ມີຄວາມຊໍ້າຊ້ອນ ຍ້ອນມີຫລາຍຂະແໜງການນັບທັງສູນກາງ ແລະ ທ້ອງຖິ່ນ ມີພາລະບົດບາດໃນການອະນຸມັດ ແລະ ຄຸ້ມຄອງ.

ປັດຈຸບັນ, ພາກລັດເຫັນວ່າມີຫລາຍເຖິງ 240 ໂຄງການເຊົ່າ-ສໍາປະທານດິນລັດ ໄດ້ສ້າງຜົນກະທົບຕໍ່ທໍາມະຊາດ-ສິ່ງແວດລ້ອມ ແລະ ກວມເອົາປ່າສະຫງວນ, ສະນັ້ນ ເພື່ອແກ້ໄຂບັນຫາດັ່ງກ່າວຂົງເຂດຊັບພະຍາກອນທໍາມະຊາດ ແລະ ສິ່ງແວດລ້ອມ ຈະຕ້ອງໄດ້ປະສານສົມທົບລະຫວ່າງຂະແໜງການຢ່າງໃກ້ຊິດ ເພື່ອຫລີກເວັ້ນບັນຫາການຂຸດຄົ້ນບໍ່ແຮ່ທີ່ຈະສົ່ງຜົນກະທົບຕໍ່ປ່າໄມ້. ນອກນີ້. ທຸກການອະນຸມັດການເຊົ່າ-ສໍາປະທານທີ່ດິນຕ້ອງໃຫ້ສອດຄ່ອງກັບແຜນແມ່ບົດຈັດສັນທີ່ດິນແຫ່ງຊາດ ແລະ ແຜນແມ່ບົດຈັດສັນທີ່ດິນຂອງແຂວງ ເພື່ອຮັບປະກັນຜົນປະໂຫຍດຂອງຊາດ.