ລາວ-ໄທ ເພີ່ມທະວີການຄວາມຮ່ວມມືດ້ານແຮງງານ
ໃນລະຫວ່າງ ວັນທີ 20-22 ກຸມພານີ້, ທ່ານ ຄໍາແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ເດີນທາງເຂົ້າຮ່ວມກອງປະຊຸມລະດັບລັດຖະມົນຕີແຮງງານ ຢູ່ນະຄອນຫລວງບາງກອກ ຣາຊະອານາຈັກໄທ ຕາມການເຊື້ອເຊີນຂອງທ່ານ ພົນຕຳຫຼວດເອກ ອະດຸນ ແສງສິງແກ້ວ ລັດຖະມົນຕີວ່າການກະຊວງແຮງງານ ແຫ່ງຣາຊະອານາຈັກໄທ ເພື່ອສືບຕໍ່ຜັນຂະຫຍາຍຖະແຫລງການຮ່ວມຂອງກອງປະຊຸມນາຍົກລັດຖະມົນຕີຮ່ວມ ລາວ ແລະ ໄທ ເມື່ອທ້າຍປີ 2018 ຜ່ານມາ ທີ່ນະຄອນຫລວງວຽງຈັນ ແລະ ເປັນການທົບທວນການຈັດຕັ້ງປະຕິບັດບົດບັນທຶກຄວາມເຂົ້າໃຈວ່າດ້ວຍການຮ່ວມມືດ້ານແຮງງານ ໃນປີ 2016 ແລະ ຂໍ້ຕົກລົງວ່າດ້ວຍການຈ້າງງານ ປີ 2017 ເພື່ອປົກປ້ອງສິດຜົນປະໂຫຍດຂອງຜູ້ໃຊ້ແຮງງານ ແລະ ຜູ້ອອກແຮງງານ ລາວ-ໄທ ແນໃສ່ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງສອງປະເທດດີຂຶ້ນ ເຊິ່ງໃນໄລຍະສອງປີຜ່ານມາ ສອງກະຊວງໄດ້ເອົາໃຈໃສ່ປະສານສົມທົບ ແລະ ຈັດຕັ້ງປະຕິບັດບັນດາໜ້າວຽກຫລັກທີ່ກຳນົດໄວ້ໃນບັດບົດບັນທຶກຄວາມເຂົ້າໃຈວ່າດ້ວຍການຮ່ວມມື ແລະ ຂໍ້ຕົກລົງວ່າດ້ວຍການຈ້າງງານດັ່ງກ່າວໄດ້ມີຜົນສຳເລັດຫລາຍດ້ານ ເປັນຕົ້ນລັດຖະບານໄທ ກໍຄືກະຊວງແຮງງານ ແຫ່ງຣາຊະອານາຈັກໄທ ໄດ້ໃຫ້ການສະໜັບສະໜູນໃນການພັດທະນາສີມືແຮງງານໃຫ້ບຸກຄະລາກອນຂອງ ສປປ ລາວ ໃນສາຂາວິຊາຊ່າງຫລາຍພໍສົມຄວນ; ສອງຝ່າຍໄດ້ເອົາໃຈໃສ່ປະສານສົມທົບໃນການຄຸ້ມຄອງແຮງງານລາວທີ່ມາອອກແຮງງານຢູ່ປະເທດໄທຖືກຕ້ອງຕາມກົດໝາຍ; ໄດ້ຕັ້ງໜ້າປະຕິບັດວຽກງານແກ້ໄຂແຮງງານລາວທີ່ເຮັດວຽກແບບບໍ່ຖືກຕ້ອງຕາມກົດໝາຍຢູ່ປະເທດໄທ ດ້ວຍການດຳເນີນປັບສະຖານະພາບແຮງງານໃຫ້ຖືກຕ້ອງຕາມກົດໝາຍເປັນລະບົບດີຂຶ້ນ. ພ້ອມກັນນັ້ນ, ຍັງໄດ້ສ້າງສິ່ງອຳນວຍຄວາມສະດວກທີ່ເປັນຈຸດພັກໃນການເດີນທາງກັບຄືນປະທດສຳລັບແຮງງານລາວ. ສ່ວນການຮ່ວມມືດ້ານປະກັນສັງຄົມ ກໍໄດ້ເອົາໃຈໃສ່ຊຸກຍູ້ການຮ່ວມມືສອງຝ່າຍ ເຊິ່ງໄດ້ມີການແລກປ່ຽນຄະນະຜູ້ແທນຢ້ຽມຢາມແລກບົດຮຽນເຊິ່ງກັນ ແລະ ກັນເປັນປົກກະຕິ.
ພ້ອມກັນນັ້ນ, ກອງປະຊຸມໄດ້ພ້ອມກັນກຳນົດແຜນຈັດຕັ້ງປະຕິບັດຕາມບົດບັນທຶກຄວາມເຂົ້າໃຈ ແຕ່ປີ 2019 ເຖິງ 2022 ເປັ້ນຕົ້ນແມ່ນ ໄດ້ເພີ່ມການຮ່ວມມືດ້ານການພັດທະນາສີມືແຮງງານ ໂດຍສະເພາະການສ້າງຂໍ້ຕົກລົງວ່າດ້ວຍການຮ່ວມມືດ້ານການພັດທະນາສີມືແຮງງານຂອງສອງຝ່າຍ ແລະ ໃນປີງົບປະມານ 2019 ຝ່າຍໄທມີແຜນການຝຶກອົບຮົມໃຫ້ແກ່ບຸກຄະລາກອນພາກລັດ ແລະ ເອກະຊົນຂອງ ສປປ ລາວ ຈຳນວນ 500 ຄົນ; ດຳເນີນການໃຫ້ແຮງງານສັນຊາດລາວທີ່ໄດ້ຮັບເອກະສານຢັ້ງຢືນຖານະບຸກຄົນ (CI) ແລະ ເຮັດວຽກຢູ່ຣາຊະອານາຈັກໄທ ໄດ້ປັບປ່ຽນສະຖານະເປັນແຮງງານທີ່ເຂົ້າມາເຮັດວຽກຕາມກອບຂອງບັນທຶກຄວາມເຂົ້າໃຈ ກ່ອນວັນທີ 31 ມີນາ 2020; ໃຫ້ໜ່ວຍງານທີ່ກ່ຽວຂ້ອງທັງສອງຝ່າຍປຶກສາຫາລືຮ່ວມກັນ ເພື່ອຊຸກຍູ້ແກ້ໄຂບັນຫາການເດີນທາງເຂົ້າມາຂອງແຮງງານສັນຊາດລາວ ເພື່ອເຮັດວຽກເປັນຊົ່ວຄາວໃນໄລຍະເວລາໃດໜື່ງ ຫຼື ຕາມລະດູການ ແລະ ໃນທ້ອງຖີ່ນທີ່ກຳນົດ; ເພີ່ມການຮ່ວມມືດ້ານວິຊາການໃນການຄຸ້ມຄອງແຮງງານຂອງສອງປະເທດ ເພື່ອນຳໄປສູ່ການສ້າງຂໍ້ຕົກລົງຮ່ວມກັນໃນການປົກປ້ອງສິດຜົນປະໂຫຍດຕາມກົດໝາຍ ແລະ ລະບຽບການຂອງສອງປະເທດ; ສອງຝ່າຍຮ່ວມກັນສ້າງ ແລະ ເຊື່ອມໂຍງຖານຂໍ້ມູນແຮງງານສັນຊາດ ລາວ-ໄທ ທີ່ເຮັດຽກຢູ່ສາທາລະນະລັດ ປະຊາທິປະໄຕ ປະຊາຊົນລາວ ແລະ ຣາຊະອານາຈັກໄທ ເພື່ອອຳນວຍສະດວກໃນການຕິດຕາມ ແລະ ການຄຸ້ມຄອງແຮງງານດັ່ງກ່າວຢ່າງເປັນລະບົບ ແລະ ເພີ່ມການຮ່ວມມືດ້ານການປະກັນສັງຄົມໃຫ້ແກ່ແຮງງານຂອງສອງປະເທດ.
ບັນຫາສຳຄັນອັນໜຶ່ງແມ່ນ ສອງປີຕໍ່ໜ້ານີ້ ກະຊວງແຮງງານ ແລະ ສະຫວັດດີການສັງຄົມຈະໄດ້ເປັນເຈົ້າພາບຈັດກອງປະຊຸມລະດັບເຈົ້າໜ້າທີ່ອາວຸໂສດ້ານແຮງງານ ແລະ ກອງປະຊຸມລະດັບລັດຖະມົນຕີແຮງງານ ລາວ-ໄທ ຄັ້ງຕໍ່ໄປ.
