ປາ​ໂຕ​ດຽວ​ຢ່າ​ໃຫ້​ເນົ່າ​ໝົດ​ຂ້ອງ

ປາ​ໂຕ​ດຽວ​ຢ່າ​ໃຫ້​ເນົ່າ​ໝົດ​ຂ້ອງ - advert banner 728 90 728x90 - ປາ​ໂຕ​ດຽວ​ຢ່າ​ໃຫ້​ເນົ່າ​ໝົດ​ຂ້ອງ

ໂດຍ: ທິດ​ກ່ຳ

ປາ​ໂຕ​ດຽວ​ຢ່າ​ໃຫ້​ເນົ່າ​ໝົດ​ຂ້ອງ - new3 - ປາ​ໂຕ​ດຽວ​ຢ່າ​ໃຫ້​ເນົ່າ​ໝົດ​ຂ້ອງ

ໃນເວລາປະມານ 15 ໂມງປາຍຂອງວັນທີ 20 ກຸມພາທີ່ຜ່ານມາ ໄດ້ມີເຫດການລະທຶກຂວັນເຜີຍແຜ່ໄປທົ່ວສື່ອອນລາຍກໍລະນີເຫດການລົດກະບະໄຮລັກສ໌ ຣີໂວປ້າຍກະຊວງ ກກ 4668 ໄດ້ຕເອົາລົດຈັກເຊິ່ງຂັບຂີ່ໂດຍຜູ້ຍິງຜູ້ໜຶ່ງລອດຕາຍຢ່າງອະພິນິຫານ.

ເມື່ອລົດຄັນນັ້ນຕຳເອົາ ແລ້ວແຕ່ຜູ້ຂັບຂີ່ລົດໃຫຍ່ໄດ້ ຍູ້ລົດຈັກໄປທາງໜ້າເປັນໄລຍະຍາວ ຈົນມວນຊົນຜູ້ເຫັນເຫດການ ແລະ ເຈົ້າໜ້າທີ່ຕຳຫລວດຈະລາຈອນຂັບ ລົດຈັກໄລ່ຕາມຈິ່ງຢຸດລົດດັ່ງກ່າວໄດ້ແລ້ວຈິ່ງຮູ້ວ່າ ຄົນຂັບລົດໃຫຍ່ເປັນນາຍຕຳຫລວດຊັ້ນນາຍພັນ, ພວມຢູ່ ໃນອາການມືນເມົາຈົນບໍ່ຮູ້ສະຕິນັບສິບບໍ່ລຸກ.

ປາ​ໂຕ​ດຽວ​ຢ່າ​ໃຫ້​ເນົ່າ​ໝົດ​ຂ້ອງ - 22357 - ປາ​ໂຕ​ດຽວ​ຢ່າ​ໃຫ້​ເນົ່າ​ໝົດ​ຂ້ອງ

ນີ້ຄືເຫດການເລີ່ມແລກແຮກໝານແຫ່ງປີ 2019 ທີ່ດັງກ້ອງໄປຕາມສື່ອອນລາຍແຜ່ຂະຫຍາຍໄປທົ່ວໂລກ, ໂດຍຜູ້ກະທຳຜິດກໍບໍ່ອື່ນໄກເປັນນາຍຕຳຫລວດຍົດພັນຕີ, ເປັນເຈົ້າໜ້າທີ່ແກນນຳ, ເປັນຕົວແບບໃນການປະຕິບັດຕົວບົດກົດໝາຍ ແລະ ເປັນຜູ້ບັງຄັບບັນຊາລູກນ້ອງເປັນສິບເປັນຮ້ອຍ.

ສ່ວນຊື່ສຽງຮຽງນາມ ກົມກອງສັງກັດນັ້ນ, ທິດກ່ຳ ຂໍສະຫງວນໄວ້ບໍ່ຢາກຊ້ຳຊອກຕອກລີ່ມໃຫ້ກັນເພາະເຫດມັນກໍ່ເກີດຂຶ້ນແລ້ວ, ເປັນໄປແລ້ວ, ສຳຄັນແຕ່ວ່າຜິດກໍຄືຜິດ, ຮູ້ຜິດແລ້ວກໍໃຫ້ເຂັດຫລາບ ແລະ ຕ້ອງຮັບໂທດຕາມກົດຢ່າໄດ້ເອົາຍົດ, ຖານະຕຳແໜ່ງ ຫລື ໜ້າທີ່ມາ ອວດອ້າງວ່າເຮົາເປັນນາຍ, ຢ່າໄປສະແດງທ່າທີຄຸນສົມບັດແຂງຂໍ້ຕໍ່ແຫລກັບຜູ້ທີ່ ເຮັດໜ້າທີ່ພິທັກສັນຕິລາດເພື່ອປົກປ້ອງສິດ ແລະ ຜົນປະໂຫຍດຂອງບ້ານເມືອງເພາະການທີ່ເຮົາມີຄວາມຜິດແລ້ວຕ້ອງຍອມຮັບ ແລະ ແກ້ໄຂກໍຕ້ອງຢູ່ໃນກອບຂອງກົດໝາຍ ຫລື ຂະບວນການຍຸຕິທຳ ແລະ ກົດລະບຽບຂອງກົມກອງນັ້ນມາເປັນຕົວວັດ.

ທິດກ່ຳ ຂໍຍໍມືສາທຸນຳ ຜູ້ຂັບຂີ່ລົດຈັກທີ່ເປັນເພດຍິງ ຍັງມີສິ່ງສັກສິດຄຸ້ມຄອງເບິ່ງແຍງ ແລະ ເປັນຈັ່ງບຸນບໍ່ເສຍຊີວິດອິນຊີແຕ່ປະການໃດ, ແຕ່ດີແທ້ກໍຄວນໄປກວດກາ ເຊັກເບິ່ງສຸຂະພາບວ່າ ມີອາ ການແຊກຊ້ອນເຈັບໜ້ອຍເຈັບຫລາຍນັ້ນລະຈຶ່ງເປັນການດີ. ສ່ວນວ່າລົດຈັກມັນ ເປ່ເພຢູ່ໝ້ອງໃດຜູ້ກະທຳຜິດ ຕ້ອງມີຄວາມຮັບຜິດຊອບ ໃນຖານະເປັນເຈົ້າໜ້າທີ່, ທັງເປັນນາຍ ແລະ ເປັນຜູ້ຊາຍເອີກສາມສອກ.

ປາ​ໂຕ​ດຽວ​ຢ່າ​ໃຫ້​ເນົ່າ​ໝົດ​ຂ້ອງ - lattana 1 - ປາ​ໂຕ​ດຽວ​ຢ່າ​ໃຫ້​ເນົ່າ​ໝົດ​ຂ້ອງ

ນີ້ລະຄືໂທດຂອງຄວາມເມົາ, ຂອງນ້ຳເຫລົ່ານ້ຳຢາ, ສຸລາບາຢອງ ກິນເມົາແລ້ວພັດ ຍັງຂັບລົດ, ເມົາພໍດ້າມພໍດີກໍ ຍັງພໍໄຄແດ່ ແຕ່ອັນນີ້ເບິ່ງອາການຈົນຍືນບໍ່ຢູ່ ຈັກວ່າຕັ້ງແກ້ງ ຫລື ຕື່ນຕົກໃຈຕໍ່ເຫດການຈົນວ່າຕຳຫລວດຈາລະຈອນຊັ້ນຜູ້ນ້ອຍຄຸມລົງລົດກໍ ບໍ່ຍອມລົງອາດຢ້ານເສຍໜ້າ, ເສຍຕາ ແລະ ຢ້ານເສຍສັກສີຂອງຕົນເອງໃນຖານະເປັນນາຍ ທັງເປັນເຈົ້າໜ້າທີ່ຢ່າງເຕັມຕົວເຮັດນາມາໝົດປີໄຟພັດໄໝ້ເລົ້າເຂົ້າ.

ຂໍຊົມເຊີຍເຈົ້າໜ້າທີ່ຕຳຫລວດຈາລະຈອນ ທີ່ມີຄວາມມານະອົດທົນສາມາດປະຕິບັດໜ້າທີ່ສົມສັກສີຮັບໃຊ້ປະຊາຊົນ ແລະ ເພື່ອປະຊາຊົນອີ່ຫລີ.

ເວົ້າເຖິງສັງຄົມມືນເມົາ ຂອງເຈົ້າໜ້າທີ່ຕຳຫລວດເຮົາໃນຜ່ານມາ, ທິດກ່ຳກໍເຄີຍ ເຫັນຫລາຍໝ້ອງທີ່ມີການຊຸມແຊວຍົກຈອກກັນໃນໂມງການ, ນອກໂມງການ, ໃນ ເຄື່ອງແບບ ແລະ ນອກເຄື່ອງ ແບບອັນເປັນການຜິດກົດຂອງກົມກອງ ແລະ ຜິດກັບກົດໝາຍຂອງກຳລັງປ້ອງກັນຄວາມສະຫງົບປະຊາຊົນ, ປະກົດການທີ່ວ່າ ນີ້ມັກເຫັນຍາມກິນເຂົ້າທ່ຽງ, ຍາມນັດກັນຊຸມແຊວແລ້ວ ກໍພາກັນນັ່ງກົ້ນໝັກ, ຈາກນັ້ນ, ກໍລາມພະລາມຈົວປະວຽກປະງານໃນບາງມື້, ບາງ ຄັ້ງບາງຄາວ, ເຊິ່ງປະຊາຊົນ ຫລື ຄົນອື່ນເຂົາເຫັນກໍອຶດອັດໃຈເບິ່ງຍາກ, ແຕ່ກໍບໍ່ກ້າ ເວົ້າເພາະເພິ່ນເປັນຕຳຫລວດຍົດຊັ້ນນາຍຮ້ອຍນາຍພັນ ເປັນເຈົ້າໜ້າທີ່ຂອງບ້ານເມືອງ.

ເຖິງຢ່າງໃດກໍດີ, ຕາມທິດກ່ຳວ່ານີ້ຄືບົດຮຽນອັນປະເສີດ, ທັງເຈັບແສບທີ່ສອນ ໃຫ້ພວກເຮົາຮູ້ ແລະ ໄດ້ເຫັນໂທດຂອງການມືນເມົາເພາະນ້ຳເຫລົ້ານ້ຳເບຍມັນສັດຊື່. ຕຳຫລວດກິນຕຳຫລວດກໍເມົາ, ທະຫານກິນທະຫານກໍເມົາ, ນາຍກິນນາຍກໍເມົາ, ລູກນ້ອງກິນລູກນ້ອງ ກໍເມົາທີ່ໃຜທີ່ມັນທີ່ເພິ່ນທີ່ໂຕແຕ່ຂໍຢ່າເປັນປາໂຕດຽວແລ້ວເນົ່າໝົດຂ້ອງກໍແລ້ວກັນ.

ປາ​ໂຕ​ດຽວ​ຢ່າ​ໃຫ້​ເນົ່າ​ໝົດ​ຂ້ອງ - 36974 - ປາ​ໂຕ​ດຽວ​ຢ່າ​ໃຫ້​ເນົ່າ​ໝົດ​ຂ້ອງ
(ພາບປະກອບ)
error: Content is protected !!