ເຊລຊີ ຖືກ FIFA ລົງໂທດຫ້າມຊື້ນັກເຕະ 1 ລະດູການ ຂໍ້ຫາຊື້ນັກເຕະຜິດລະບຽບ
February 25, 2019 - 4:58 PM
ສະຫະພັນບານເຕະນາໆຊາດ ຫລື ຟີຟາ ປະກາດລົງໂທດສະໂມສອນເຊລຊີ ທີມຊັ້ນນຳໃນພຣີເມຍລີກ ອັງກິດ ຫ້າມຊື້ນັກເຕະເສີມທັບ 1 ລະດູການ ຄືລະດູການຕໍ່ໄປ 2019-20 (ຫ້າມຊື້ໄລຍະພັກແລ້ງຫລັງຈົບລະດູການນີ້ ແລະ ເດືອນມັງກອນ 2020) ຈາກຂໍ້ຫາຊື້ນັກເຕະອາຍຸຕໍ່າກວ່າ 18 ປີ ຜິດລະບຽບ. FIFA ກວດພົບວ່າ ເຊລຊີ ມີການເຊັນສັນຍາຊື້ນັກເຕະອາຍຸຕໍ່າກວ່າ 18 ປີ ຈຳນວນ 29 ຄົນ ເປັນຕົ້ນ ເບີທຣານ ຕາໂອເລ ກອງໜ້າຊາວເບີກີນາຢາໂຊ ປັດຈຸບັນປ່ອຍໃຫ້ ໂອລິມປິກ ລີຢົງ.
ພ້ອມນີ້ ເຊລຊີ ກໍຖືກປັບໄໝອີກ 600.000 ຟຣັງສະວິດ. ຂະນະທີ່ ສະມາຄົມບານເຕະອັງກິດ ຖືກປັບໄໝ 510.000 ຟຣັງສະວິດ, ແຕ່ ເຊລຊີ ພ້ອມສະມາຄົມບານເຕະອັງກິດຈະຍື່ນອຸທອນເລື່ອງນີ້.
