ຕ້ອງປັບປຸງໂຮງຝາກເດັກ ໃຫ້ມີມາດຕະຖານ
ເພື່ອສືບຕໍ່ສົ່ງເສີມ ແລະ ຂະຫຍາຍການສຶກສາກ່ອນໄວຮຽນໃຫ້ກວ້າງຂວາງ, ພ້ອມທັງໃຫ້ຮັບປະກັນຄຸນນະພາບ ຫ້ອງການສຶກສາທິການ ແລະ ກິລາເມືອງ (ສກມ) ທົ່ວປະເທດຕ້ອງໄດ້ປັບປຸງໂຮງຝາກເດັກຢູ່ໃນເທສະບານເມືອງໃຫ້ມີມາດຕະຖານດີຂຶ້ນເທື່ອລະກ້າວ, ໃນກອງປະຊຸມຜູ້ບໍລິຫານການສຶກສາ ແລະ ກິລາ ທົ່ວປະເທດ ປະຈໍາປີ 2018 ທີ່ຈັດຂຶ້ນເມື່ອບໍ່ດົນມານີ້ກໍໄດ້ເຫັນດີຕົກລົງຮັບຮອງເອົາວິທີການ ແລະ ມາດຕະການແກ້ໄຂບັນຫາ ແຕ່ລະຂະແໜງການຍ່ອຍ ເປັນຕົ້ນແມ່ນວຽກງານ ການສຶກສາກ່ອນໄວຮຽນ ໂດຍເຫັນດີໃຫ້ຫ້ອງການສຶກສາທິການ ແລະ ກິລາເມືອງ ທົ່ວປະເທຕ້ອງໄດ້ຂຶ້ນແຜນຢ່າງມີຈຸດສຸມ ເພື່ອປັບປຸງໂຮງຝາກເດັກຢູ່ໃນເທດສະບານເມືອງ ໃຫ້ກາຍເປັນໂຮງຮຽນຕົວແບບຂັ້ນເມືອງໃນອະນາຄົດ, ໂດຍສະເພາະເມືອງທີ່ມີອັດຕາເຂົ້າຮຽນຂອງເດັກ 3-5 ຕໍ່າ, ສືບຕໍ່ຂະຫຍາຍຫ້ອງກຽມປະຖົມດ້ວຍຮູບແບບຕ່າງໆ ຕາມຫຼັກການທີ່ມີ ເຊັ່ນ: ສອນຄວບ 3-5 ປີ, ຂະຫຍາຍກຸ່ມພັດທະນາເດັກໃນຊຸມຊົນ ແລະ ຮູບແບບອື່ນໆທີ່ເໝາະສົມ; ສູ້ຊົນຍາດແຍ່ງທຶນເພື່ອມາກໍ່ສ້າງໂຮງລ້ຽງເດັກ ແລະ ໂຮງຮຽນອະນຸບານໃຫ້ຫຼາຍຂຶ້ນ ແລະ ເອົາໃຈໃສ່ດູແລເດັກເບິ່ງແຍງ ແລະ ຄູໃຫ້ດີຕາມເງື່ອນໄຂຂອງແຕ່ລະທ້ອງຖິ່ນ.
ກະຊວງສຶກສາທິການ ແລະ ກໍລິ ໃຫ້ຮູ້ວ່າ: ໃນໄລະຍະ 2 ປີຜ່ານມາ ອັດຕາການເຂົ້າຮຽນຂອງເດັກອາຍຸ 3-5 ປີ ເພີ່ມຂຶ້ນຈາກ 43,2% ໃນປີ 2015 ເປັນ 57,2% ໃນປີ 2018; ອັດຕາການເຂົ້າຮຽນຂອງເດັກ 5 ປີ ເພີ່ມຈາກ 66% ເປັນ 77,1% ແລະ ຈໍານວນນັກຮຽນຊັ້ນການສຶກສາກ່ອນໄວຮຽນທັງໝົດເພີ່ມຈາກ 175 ພັນກວ່າຄົນ ມາເປັນ 229 ພັນກວ່າຄົນ, ຊຶ່ງສະແດງອອກໃຫ້ເຫັນວ່າວຽກງານການສຶກສາກ່ອນໄວຮຽນ ໄດ້ຮັບການພັດທະນາເປັນລໍາດັບ.
