ການບິນລາວ ມີຄວາມພ້ອມບໍລິການປີທ່ອງທ່ຽວລາວ-ຈີນ 2019
ແຫລ່ງຂ່າວຈາກ ຂປລ ລາຍງານວ່າ: ທ່ານ ບຸນມາ ຈັນທະວົງສາ ຜູ້ອຳນວຍການ ລັດວິສາຫະກິດການບິນລາວ ໃຫ້ຮູ້ວ່າ: ເພື່ອກະກຽມຄວາມພ້ອມຮອງຮັບການບໍລິການໃນປີທ່ອງທ່ຽວ ລາວ-ຈີນ 2019 ນີ້, ການບິນລາວ ໄດ້ປັບປຸງຂອດບໍລິການພາຍໃນອາຄານ, ສະຖານທີ່ ແລະ ສິ່ງອຳນວຍຄວາມສະດວກ, ພ້ອມທັງລະບົບຄວາມປອດໄພຕ່າງໆ ເພື່ອຮອງຮັບນັກທ່ອງທ່ຽວຈາກທົ່ວໂລກທີ່ຈະເຂົ້າມາທ່ຽວລາວ ໂດຍສະເພາະນັກທ່ອງທ່ຽວຈີນ ເຊິ່ງໃນທ້າຍເດືອນມັງກອນຜ່ານມານ ການບິນລາວ ກໍໄດ້ເປີດຖ້ຽວບິນໂດຍກົງຈາກວຽງຈັນ-ຊຽງໄຮ້ ເຊິ່ງເປັນເສັ້ນທາງຍຸດທະສາດສຳຄັນ ເພື່ອໂຄສະນາການທ່ອງທ່ຽວຂອງລາວໃຫ້ນັກທ່ອງທ່ຽວຈີນເຂົ້າມາທ່ຽວລາວຫລາຍຂຶ້ນ. ນອກນີ້ ຍັງມີຖ້ຽວບິນອື່ນໆໄປຈີນ ແລະ ຜ່ານມາເຮົາກໍໄດ້ເປີດຖ້ຽວບິນຈາກຫລວງພະບາງ-ຊາງຊາ ເຮັດໃຫ້ມີຈຳນວນຜູ້ໂດຍສານເພີ່ມຂຶ້ນ. ປັດຈຸບັນ ການບິນລາວ ມີຫລາຍເສັ້ນບິນທີ່ກຳລັງຂໍເປີດເສັ້ນບິນກົງຈາກວຽງຈັນ-ປັກກິ່ງ ແລະ ກຳລັງເພີ່ມຈຳນວນຖ້ຽວບິນທີ່ບິນໄປຈີນຕື່ມອີກ ເປັນຕົ້ນ ວຽງຈັນ-ຄຸນໝິງ, ຫລວງພະບາງ-ຄຸນໝິງ, ຊາງໂຈ, ກວາງໂຈ ແລະ ຕົວເມືອງອື່ນໆ. ໃນປີຜ່ານມາ ມີຜູ້ໂດຍສານຈາກຈີນມາໃຊ້ບໍລິການສາຍການບິນລາວ 173.000 ຄົນ.
ທ່ານ ບຸນມາ ຈັນທະວົງສາ ກ່າວຕື່ມວ່າ: ການບິນລາວ ເປັນສາຍການບິນແຫ່ງຊາດສາຍດຽວບິນເຊື່ອມຕໍ່ລະຫວ່າງປະເທດລາວກັບບັນດາປະເທດໃກ້ຄຽງ ມີຈຳນວນຖ້ຽວບິນທັງໝົດ 15.598 ຖ້ຽວ ເປັນຕົ້ນໄທ, ຫວຽດນາມ, ກຳປູເຈຍ, ຈີນ ແລະ ສະຖານທີ່ສຳຄັນອື່ນໆຂອງບັນດາປະເທດໃກ້ຄຽງ, ໄດ້ມີການປະກອບສ່ວນຢ່າງຕັ້ງໜ້າໃນການບິນ. ສໍາລັບສາຍການບິນພາຍໃນສ່ວນຫລາຍຈະເປັນການບິນເຊື່ອມຕໍ່ຫາບັນດາຕົວເມືອງທ່ອງທ່ຽວ ເຊັ່ນ: ເມືອງມໍລະດົກໂລກ ຫລວງພະບາງ, ອຸດົມໄຊ, ຫລວງນ້ຳທາ, ຊຽງຂວາງ, ສະຫວັນນະເຂດ, ແລະ ປາກເຊ. ມີຜູ້ໂດຍສານເຂົ້າມາໃຊ້ສາຍການບິນລາວ ໃນປີ 2018 ຫລາຍກວ່າ 1 ລ້ານຄົນ ຖ້າທຽບໃສ່ປີ 2017 ເພີ່ມຂຶ້ນ 10%. ເພື່ອເປັນການດຶງດູດຜູ້ໂດຍສານ ກໍຄືນັກທ່ອງທ່ຽວໃຫ້ເຂົ້າມາລາວ ຫລື ມາໃຊ້ບໍລິການສາຍການບິນລາວ, ພວກເຮົາໄດ້ມີການສະໜອງຜະລິດຕະພັນການທ່ອງທ່ຽວ ເປັນຕົ້ນອະນຸຍາດໃຫ້ບໍລິສັດທ່ອງທ່ຽວບໍລິການ ການທ່ອງທ່ຽວໃນການສ້າງເສັ້ນທາງການທ່ອງທ່ຽວ ແລະ ທີ່ພັກສຳລັບນັກທ່ອງທ່ຽວນຳອີກ. ສຳລັບໃນປີນີ້, ການບິນລາວ ກໍາລັງປຶກສາຫາລືກ່ຽວກັບການຖືເອົາການທ່ອງທ່ຽວເປັນຜະລິດຕະພັນຫລັກຂອງສາຍການບິນລາວ ເພື່ອດຶງເອົາຜູ້ໂດຍສານມາໃຊ້ບໍລິການສາຍການບິນພວກເຮົາ. ພ້ອມກັນນີ້, ຍັງມີແຜນຂະຫຍາຍຕະຫລາດຂອງການທ່ອງທ່ຽວ ບໍ່ສະເພາະແຕ່ພາຍໃນປະເທດຍັງຈະເຊື່ອມຕໍ່ກັບແຫລ່ງທ່ອງທ່ຽວທີ່ສຳຄັນຂອງບັນດາປະເທດໃກ້ຄຽງເຊັ່ນ: ພາກຕາເວັນອອກສຽງເໜືອ (ພາກອີສານ), ຊຽງໃໝ່, ຊຽງລາຍ, ຂອນແກ່ນ, ພູເກັດ, ຫົວຫີນຂອງໄທ, ເຂດເໜືອຂອງກຳປູເຈຍ, ມຽນມາ ແລະ ຈະຟື້ນຟູຄືນຖ້ຽວບິນດານັງ ຫວຽດນາມ ໂດຍໃນທ້າຍປີ 2019 ການບິນລາວ ມີແຜນຂະຫຍາຍສາຍການບິນໄປຍັງປະເທດຍີ່ປຸ່ນ.
