ອາສາສະໝັກກາແດງ ລາວ-ສ.ເກົາຫລີ ຊ່ວຍສ້ອມແປງໂຮງຮຽນປະຖົມ 2 ແຫ່ງຢູ່ເມືອງສັງທອງ

ໃນວັນທີ 20-26 ກຸມພາ ນີ້, ຢູ່ໂຮງຮຽນປະຖົມບ້ານ ທ່ານາສາ ແລະ ບ້ານ ຫ້ວຍຫຼ້າ ເມືອງ ສັງທອງ ນະຄອນຫລວງວຽງຈັນ, ໄດ້ມີກິດຈະກໍາແລກປ່ຽນຊາວໜຸ່ມອາສາສະໝັກກາແດງລາວ ແລະ ສ.ເກົາຫຼີ, ໂດຍການຊ່ວຍສ້ອມແປງອາຄານຮຽນຊັ້ນປະຖົມ ແລະ ໂຮງຮຽນອະນຸບານ ບ້ານດັ່ງກ່າວ, ເຊິ່ງເປັນອາຄານເກົ່າແກ່ໃຫ້ມີສະພາບດີ, ເພື່ອອໍານວຍຄວາມ ສະດວກໃຫ້ແກ່ການຮຽນ- ການສອນ ຂອງຄູ-ອາຈານ ແລະ ນັກຮຽນພ້ອມນີ້ກໍໄດ້ມອບອຸປະກອນການສຶກສາຈໍານວນໜຶ່ງ ແລະ ຊ່ວຍອົບຮົມຄວາມຮູ້ດ້ານການປະຖົມພະຍາບານຂັ້ນຕົ້ນ ແລະ ວັດທະນະທຳລາວເຊັ່ນ: ການໃສ່ບາດ, ການນຸ່ງຖື, ການປຸງແຕ່ງອາຫານ, ບາສີສູ່ຂວັນ ແລະ ການສະແດງສິລະປະ. ການຊ່ວຍເຫຼືອຄັ້ງນີ້ ແມ່ນໄດ້ຈາກການລະດົມທຶນ ຂອງກາແດງແຂວງ ອຸນຊານ ສ.ເກົາຫລີ ລວມມູນຄ່າ 197 ລ້ານກວ່າກີບ. ພ້ອມນີ້, ຍັງ ໄດ້ມອບເຄື່ອງໃຫ້ນັກຮຽນ ລວມມູນຄ່າກວ່າ 6 ລ້ານກີບ. ການເຄື່ອນໄຫວກິດຈະກຳລະຫວ່າງຊາວໜຸ່ມອາສາ ສະໝັກກາແດງລາວ-ກາແດງ ສ. ເກົາຫລີ ໄດ້ເລີ່ມແຕ່ປີ 2012 ເປັນຕົ້ນມາ ແລະ ປີນີ້ເປັນປີທີ 9.