ຂະແໜງການຜະລິດຈີນເດືອນກຸມພາ ບັນລຸລະດັບຕໍ່າສຸດໃນຮອບສາມປີ
ຂະແໜງການຜະລິດຂອງຈີນເດືອນກຸມພາປີນີ້ຫລຸດລົງເປັນເດືອນທີ 3 ຕິດຕໍ່ກັນ ໂດຍລົງໄປຢູ່ລະດັບຕໍ່າສຸດໃນຮອບ 3 ປີ ເພາະເສດຖະກິດຂະຫຍາຍຕົວຊ້າ ແລະ ຜົນກະທົບຈາກສົງຄາມການຄ້າກັບອາເມລິກາ.
ສຳນັກງານສະຖິຕິແຫ່ງຊາດຈີນ ເປີດເຜີຍດັດຊະນີຜູ້ຈັດການຝ່າຍຈັດຊື້ ຫລື PMI ເຊິ່ງເປັນຕົວບົ່ງຊີ້ສະພາບຂອງຂະແໜງການຜະລິດວ່າ: ຫລຸດລົງຈາກ 49,5 ຈຸດໃນເດືອນມັງກອນເຫລືອ 49,2 ຈຸດໃນເດືອນກຸມພາ ຫລຸດລົງເປັນເດືອນທີ 3 ຕິດຕໍ່ກັນ ແລະ ຕໍ່າທີ່ສຸດໃນຮອບ 3 ປີ. ດັດຊະນີທີ່ຕໍ່າກວ່າ 50 ຈຸດສະແດງວ່າສະພາບຂະແໜງການຜະລິດຫລຸດລົງ. ນັກເສດຖະສາດຂອງ ING ເບິ່ງວ່າ: ຖ້າສົງຄາມການຄ້າກັບອາເມລິກາບໍ່ມີການຕໍ່ອາຍຸພັກຮົບ, PMI ເດືອນມີນາອາດຈະຫລຸດລົງເຊັ່ນດຽວກັນ.
ຖ້າແຍກເບິ່ງດັດຊະນີຍ່ອຍພົບວ່າ: ສາຍການຜະລິດເດືອນກຸມພາຫລຸດລົງເປັນຄັ້ງທຳອິດນັບແຕ່ເດືອນມັງກອນ 2009 ເຊິ່ງເປັນໄລຍະທີ່ວິກິດການເງິນໂລກເຖິງຈຸດສູງສຸດ ໂດຍຫລຸດລົງຈາກ 50,9 ຈຸດໃນເດືອນມັງກອນເຫລືອ 49,5 ຈຸດໃນເດືອນກຸມພາ. ຂະນະທີ່ຍອດສັ່ງຊື້ໃໝ່ຫລຸດລົງເປັນເດືອນທີ 9 ຕິດຕໍ່ກັນ ໂດຍຫລຸດລົງຈາກ 46,9 ຈຸດໃນເດືອນມັງກອນເຫລືອ 45,2 ຈຸດໃນເດືອນກຸມພາ ແລະ ຕໍ່າທີ່ສຸດໃນຮອບ 10 ປີ.
