ຍີ່ປຸ່ນຈະຊ່ວຍພັດທະນານັກກິລາພິການແລ່ນລານລາວ
ໃນວັນທີ 26 ກຸມພານີ້, ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ ໄດ້ຕ້ອນຮັບການເຂົ້າພົບ ປະຂອງທ່ານ ທ່ານ ໂຕຊິມິຈິ ໂຄຮາມະຕາງໜ້າຈາກ ເມືອງ ອິເຊ ແຂວງມິເອະປະເທດ ຍີ່ປຸ່ນ, ພ້ອມຜູ້ຕາງໜ້າອົງການ ຄົນພິການອາຊີເພື່ອການ ພັດທະນາ (ADDP) ເພື່ອ ປຶກສາຫາລືການຮ່ວມມື ພັດທະນາກິລາຄົນພິການໃນ ລາວ, ໂດຍສະພາະແມ່ນ ກິລາ ແລ່ນລານ. ໂດຍຝ່າຍຍີ່ປຸ່ນ ມີຄວາມຍິນດີຮັບເອົານັກ ກິລາພິການແລ່ນລານທີມ ຊາດລາວ ໄປເກັບຕົວຝຶກ ຊ້ອມ ທີ່ເມືອງອິເຊ ແຂວງ ມິເອະ ປະເທດຍີ່ປຸ່ນ ເພື່ອກຽມ ຄວາມພ້ອມໃນການເຂົ້າຮ່ວມງານພາລາແລັມປີກເກມ ທີ່ ຈະຈັດຂຶ້ນຢູ່ນະຄອນຫຼວງ ໂຕກຽວ ປະເທດຍີ່ປຸ່ນ ໃນປີ 2020 ທີ່ຈະມາເຖິງນີ້ ແລະ ເມື່ອບໍ່ດົນມານີ້, ກະຊວງສຶກ ສາທິການ ແລະ ກິລາ ກໍໄດ້ ຮັບເອົາການຊ່ວຍເຫຼືອການ ຝຶກຊ້ອມນັກກິລາລາວໃນ 2 ປະເພດກິລາຄື: ລອຍນ້ຳ ແລະ ກິລາແລ່ນລານ ຈາກ ເມືອງອິຕາເຕະ ແຂວງ ຟຸກຸ ຊີ ມະ ປະເທດ ຍີ່ປຸ່ນເຊັ່ນດຽວກັນ.
ໃນໂອກາດດັ່ງກ່າວ, ທ່ານລັດຖະມົນຕີກະຊວງ ສຶກສາທິການ ແລະ ກິລາ ໄດ້ສະແດງຄວາມຍິນດີ ແລະ ຂອບໃຈຕໍ່ຄະນະນຳ ເມືອງອິເຊ ແຂວງມິເອະທີ່ ມີເຈດຈຳນົງໃຫ້ການຊ່ວຍ ເຫຼືອຄັ້ງນີ້, ພ້ອມທັງແນະນຳໃຫ້ຂະແໜງການກ່ຽວ ຂ້ອງປະສານສົມທົບກັນ ໃຫ້ລະອຽດໃນການແບ່ງປັນຄວາມຮັບຜິດຊອບການຝຶກ ຊ້ອມໃນແຕ່ລະປະເພດກິລາເພື່ອໃຫ້ຮັບປະກັນປະສິດທິຜົນສູງ.
