ສປປ ເກົາຫລີ ບໍ່ເຈລະຈາກັບ ລັດຖະບານ ທຣຳ ອີກ

- advert banner 728 90 728x90 - ສປປ ເກົາຫລີ ບໍ່ເຈລະຈາກັບ ລັດຖະບານ ທຣຳ ອີກ

      ​ເຈົ້າໜ້າ​ທີ່​ລະດັບ​ສູງ​ດ້ານ​ນະ​ໂຍບາຍ​ຕ່າງປະ​ເທດ​ຂອງ ສປປ ​ເກົາຫລີ ຢືນຢັນ​ວ່າ: ລັດຖະບານ​ພຽງ​ຢາງ​ຈະ​ບໍ່​ປ່ຽນ​ແປງ​ທ່າ​ທີ ​ແລະ ບໍ່​ປະສົງ​ເຈລະຈາ​ກັບ​ລັດຖະບານ​ອາ​ເມ​ລິ​ກາ​ຂອງ​ປະທານາທິບໍດີ ​ໂດ​ນັລ ທຣຳ ອີກ, ​ເຖິງ​ວ່າ​ອີກ​ຝ່າຍ​ພະຍາຍາມ​ຊຸກຍູ້​ໃຫ້​ເກີດ​ການ​ພົບ​ປະ​ຫາລື​ຄັ້ງ​ໃໝ່.

- lattana 1 - ສປປ ເກົາຫລີ ບໍ່ເຈລະຈາກັບ ລັດຖະບານ ທຣຳ ອີກ

       ສຳນັກ​ຂ່າວ​ຕ່າງປະ​ເທດ​ລາຍ​ງານ​ວ່າ: ທ່ານ​ ນາງ ​ໂຊ ຊອນ​ຮີ ຮອງລັດຖະມົນຕີ​ກະຊວງ​ການ​ຕ່າງປະ​ເທດ ສປປ ​ເກົາຫລີ ກ່າວ​ໃນ​ວັນ​ທີ 1 ມີນາ​ວ່າ: ທ່ານ ກິມ ຈ໋ອງອຸນ ຜູ້ນຳ​ສູງ​ສຸດ​ຂອງ​ປະ​ເທດ​ໝົດ​ອາລົມ​ໃນ​ການ​ເຈລະຈາ​ກັບ​ອາ​ເມ​ລິ​ກາ ​ເນື່ອງ​ຈາກ​ເປັນ​ເລື່ອງ​ຍາກ​ທີ່​ຈະ​ເຂົ້າ​ໃຈສຳລັບ​ທ່ານ​ຜູ້ນຳ ວ່າ​ເພາະ​ເຫດ​ໃດ​ກອງ​ປະຊຸມ​ຮ່ວມ​ກັບ​ປະທານາທິບໍດີ ​ໂດ​ນັລ ທຣຳ ຢູ່​ນະຄອນຫລວງ​ຮ່າ​ໂນ້ຍ ​ໃນ​ອາທິດ​ຜ່ານ​ມາ ຈຶ່ງ​ລົ້ມ​ເຫ​ລວ.

       ຄຳ​ກ່າວ​ຂອງ​ທ່ານ ນາງ ​ໂຊ ຊອນ​ຮີ ​ເປັນ​ການ​ເພີ່ມ​ນ້ຳໜັກ​ໃຫ້​ຄຳ​ຖະ​ແຫລ​ງຂອງ​ທ່ານ ຣີ ຢອງ​ໂຮ ລັດຖະມົນຕີກະຊວງ​ການ​ຕ່າງປະ​ເທດ​ຂອງ ສປປ ​ເກົາຫລີ ​ເຊິ່ງກ່າວ​ກ່ອນ​ໜ້ານັ້ນວ່າ: ອາ​ເມ​ລິ​ກາ​ເປັນ​ຝ່າຍ​ຖິ້ມ​ໂອກາດ​ທີ່​ອາດ​ຈະ​ບໍ່​ເກີດ​ຂຶ້ນຂຶ້ນ ​ໂດຍ​ທ່ານ ຣີ ຢອງ​ໂຮ ກ່າວ​ວ່າ: ລັດຖະບານ​ພຽງ​ຢາງ​ຍື່ນ​ຂໍ້​ສະ​ເໜີ​ເປັນ​ລາຍ​ລັກ​ອັກສອນ ​ໃນ​ເລື່ອງ​ການ​​ໂຈະ​ທົດ​ລອງ​ອາວຸດ​ນິວ​ເຄຼຍ ​ແລະ ລູກ​ສອນ​ໄຟ​ຂ້າມ​ທະວີບ ​ເພື່ອ​ແລກກັບ​ການ​ຫລຸດຜ່ອນ​ມາດ​ຕະການ​ຂວ້ຳບາດ​ໃນ​ສ່ວນ​ທີ່​ສົ່ງ​ຜົນ​ກະທົບ​ຕໍ່​ຄຸນ​ນະພາ​ບຊີວິດ​ຂອງ​ພົນລະ​ເມືອງ ສປປ ​ເກົາຫລີ ບໍ່​ແມ່ນ​ການ​ຮຽກຮ້ອງ​ໃຫ້​ລັດຖະບານ​ວໍ​ຊິງ​ຕັນ​ຍົກ​ເລີກ​ການ​ຂວ້ຳບາດ​ທັງ​ໝົດ ຕາມ​ທີ່​ປະທານາທິບໍດີ ​ໂດ​ນັລ ທຣຳ ກ່າວ​ອ້າງ ​ແລະ ຜູ້ນຳ​ອາ​ເມ​ລິ​ກາຍ​ອມຮັບ​ອີກ​ວ່າ: ຜູ້ນຳ​ທັງ​ສອງ​ປະ​ເທດ​ມີ​ວິ​ໄສ​ທັດ​ເລື່ອງ​ໂຄງການ​ນິວ​ເຄຼຍທີ່​ແຕກ​ຕ່າງ​ກັນ.

       ​ເຖິງ​ຢ່າງ​ໃດ​ກໍ​ຕາມ, ທ່ານ ​ໄມ ປອມ​ເປ​ໂອ ລັດຖະມົນຕີ​ກະຊວງ​ການ​ຕ່າງປະ​ເທດ​ອາ​ເມ​ລິ​ກາ ກ່າວ​ວ່າ: ລັດຖະບານ​ວໍ​ຊິງ​ຕັນ​ຈະ​ພະຍາຍາມ​ເດີນ​ໜ້າ​ຕໍ່​ທັນທີ ​ເພື່ອ​ຈັດການ​ພົບ​ປະ​ຫາລື​ຄັ້ງ​ໃໝ່​ກັບ​ລັດຖະບານ​ພຽງ​ຢາງ. ສ່ວນ​ທຳນຽບປະທານາທິບໍດີ ສ.​ເກົາຫລີ ອອກ​ຖະ​ແຫລ​ງການ​ຍອມຮັບ​ວ່າ: ຜິດ​ຫວັງ​ຕໍ່​ກອງ​ປະຊຸມ​ຢູ່​ນະຄອນຫລວງ​ຮ່າ​ໂນ້ຍ ​ເຊິ່ງຢຸດຕິ​ໂດຍ​ປາສະຈາກ​ການ​ລົງ​ນາມ​ໃນ​ຂໍ້​ຕົກລົງ​ໃດໆ, ​ແຕ່​ເຊື່ອ​ໝັ້ນວ່າ​ທັງ​ສອງ​ຝ່າຍ​ຈະ​ສາມາດ​ກັບ​ມາ​ພົບ​ປະ​ຫາລື​ກັນ​ໄດ້​ອີກ. ຂະນະ​ທີ່​ສື່​ທ້ອງ​ຖິ່ນ​ຂອງ ສ.​ເກົາຫລີ ສ່ວນ​ຫລາຍ​ວິ​ເຄາະ​ໄປ​ໃນ​ທາງ​ດຽວ​ກັນ​ວ່າ: ຂະ​ບວນການ​ສ້າງສັນ​ຕິ​ພາບ​ຢູ່​ແຫລມ​ເກົາຫລີ​ຕ້ອງ​ກັບ​ມາ​ເລີ່​ມ​ໃໝ່.