ບຸນມະໂຫລານສົ່ງເສີມການອ່ານ ນະຄອນຫລວງວຽງຈັນ ຄັ້ງທີ 1 ຈະຈັດຂຶ້ນໃນວັນທີ 7-17 ມີນານີ້

ບຸນມະໂຫລານສົ່ງເສີມ ການອ່ານ ນະຄອນຫລວງ ວຽງຈັນ ຄັ້ງທີ 1 ຈະຈັດຂຶ້ນທີ່ດ້ານໜ້າສູນການຄ້າສາກົນ (World Trade Centre) ເມືອງສີສັດຕະນາກ, ໃນລະ ຫວ່າງວັນທີ 7-17 ມີນານີ້, ເຊິ່ງຈະເລີ່ມແຕ່ເວລາ  9:00 ໂມງ ຫາ 21:30 ໂມງ. ສະເພາະວັນສຸກ-ວັນທິດ, ໂດຍການຮ່ວມມືລະຫວ່າງ ບໍລິສັດປານຈຳປາ ແລະ ພະແນກສຶກສາທິການ  ແລະ  ກິລາ ນະຄອນຫລວງວຽງຈັນ.

ທ່ານ ຮອງຫົວໜ້າພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ນະຄອນຫລວງວຽງຈັນ  ກ່າວວ່າ: ງານຄັ້ງນີ້, ເພື່ອເປັນການສົ່ງເສີມການອ່ານໃຫ້ ແກ່ຊາວໜຸ່ມ-ເຍົາວະຊົນ, ທັງເປັນການເປີດໂອກາດ ໃຫ້ຄົນລາວ ໄດ້ສຳຜັດກັບປື້ມ ຈາກນານາຊາດ ເພື່ອເປີດໂລກະທັດຂອງການພັດທະນາອຸດສາຫະກຳປຶ້ມໃນຕ່າງປະເທດ, ຂະນະດຽວກັນກໍເປີດໂອກາດໃຫ້ຄົນຕ່າງ ຊາດ ໄດ້ສຳຜັດກັບປື້ມອ່ານ ຂອງລາວ ແລະ ຍັງເປັນສື່ ກາງໃນການສ້າງໂອກາດ ໃຫ້ນັກຂຽນ ແລະ ສຳນັກ ພິມຂອງລາວມີພັດທະນາ ການຜະລິດປື້ມອ່ານ ໃຫ້ມີ ຄຸນນະພາບທີ່ຫລາກຫລາຍສີສັນເປັນປະໂຫຍດຕໍ່ຜູ້ອ່ານ ແລະ ພັດທະນາເສດຖະກິດ- ສັງຄົມ. ງານຄັ້ງນີ້, ຈະໄດ້ມີການວາງສະແດງ ສື່ສິ່ງພິມຕ່າງໆຫລາຍ ກວ່າ 200 ບູດ, ມີກິດຈະກຳຖາມ-ຕອບຄວາມຮູ້ຮອບຕົວ, ສຳລັບນັກຮຽນ ແລະ ອື່ນໆ. ນອກນັ້ນ, ຍັງຈະໄດ້ມີ ການແຈກຢາຍປື້ມຕ່າງໆ ອີກດ້ວຍ./.