ມອບ-ຮັບສິ່ງເສດເຫລືຂອງທະຫານອາເມລິ ກາທີ່ຫາຍສາບສູນໃນປາງສົງຄາມຢູ່ລາວ

- advert banner 728 90 728x90 - ມອບ-ຮັບສິ່ງເສດເຫລືຂອງທະຫານອາເມລິ ກາທີ່ຫາຍສາບສູນໃນປາງສົງຄາມຢູ່ລາວ

  ໃນທ້າຍອາທິດຜ່ານມານີ້, ທີ່ສະໜາມບິນສາກົນວັດໄຕ, ນະຄອນຫລວງວຽງຈັນ ໄດ້ຈັດພິທີມອບ-ຮັບສິ່ງເສດເຫລືອຂອງທະຫານອາເມລິກາທີ່ຫາຍສາບສູນໃນປາງສົງຄາມຢູ່ລາວ, ຊຶ່ງສິ່ງເສດເຫລືອດັ່ງກ່າວແມ່ນຜົນສໍາເລັດທີ່ໄດ້ຮັບຈາກການປະຕິບັດງານຮ່ວມຢູ່ພາກສະ ໜາມຂອງຄະນະວິຊາການລາວ-ອາເມລິກາ ໃນການສໍາຫລວດ ແລະ ຂຸດຄົ້ນເພື່ອຊອກຫາຮ່ອງຮອຍ ແລະ ສິ່ງເສດເຫລືອຂອງທະຫານອາເມລິກາທີ່ຫາຍສາບສູນໃນປາງສົງຄາມຢູ່ລາວຄັ້ງທີ 2 ປະຈໍາປີ 2018-2019 ຢູ່ເຂດເມືອງວຽງໄຊແຂວງຫົວພັນ.

- lattana 1 - ມອບ-ຮັບສິ່ງເສດເຫລືຂອງທະຫານອາເມລິ ກາທີ່ຫາຍສາບສູນໃນປາງສົງຄາມຢູ່ລາວ

  ຕາງໜ້າໃຫ້ລັດຖະບານລາວແມ່ນທ່ານ ແສງເພັດ ຮຸ່ງບຸນຍວງ ຮອງລັດຖະມົນຕີກະຊວງການຕ່າງປະເທດ, ຜູ້ຊີ້ນຳວຽກງານການສໍາຫລວດ ແລະ ຂຸດຄົ້ນເພື່ອຊອກຫາຮ່ອງຮອຍ ແລະ ສິ່ງເສດເຫລືອຂອງທະຫານອາເມລິກາທີ່ຫາຍສາບສູນໃນປາງສົງຄາມຢູ່ລາວ ແລະ ຕາງໜ້າໃຫ້ລັດຖະບານສະຫະລັດ ອາເມລິກາ ແມ່ນທ່ານນາງ ເລນາ ບີດເຕີ (Rena Bitter) ເອກອັກຄະລັດຖະທູດສະຫະລັດອາເມລິກາປະຈໍາລາວ, ພ້ອມດ້ວຍເຈົ້າໜ້າທີ່ຂັ້ນສູງຂອງສອງຝ່າຍເຂົ້າຮ່ວມ.

  ການສໍາຫລວດ ແລະ ຂຸດຄົ້ນຄັ້ງນີ້ໄດ້ຄົ້ນພົບສິ່ງເສດເຫລືອຂອງທະຫານອາເມລິກາຢູ່ໃນ 3 ກໍລະນີຄື: ກໍລະນີ 0690 ເຂດບ້ານບັກ, 0079 ແລະ 0084 ເຂດບ້ານນາແທ່ນ, ເມືອງວຽງໄຊແຂວງຫົວພັນ.

  ຕະຫລອດໄລຍະ 30 ກວ່າປີແຫ່ງການຮ່ວມມືສອງຝ່າຍລາວ-ອາເມລິກາ ໃນຂອບວຽກງານ MIA ນີ້, ລັດຖະບານລາວ ກໍຄືປະຊາຊົນລາວ ໄດ້ໃຫ້ການຮ່ວມມືຕາມເງື່ອນໄຂ ແລະ ຄວາມອາດສາມາດຕົວຈິງບົນພື້ນຖານນະໂຍບາຍມະນຸດສະທໍາອັນສະເໝີຕົ້ນສະເໝີປາຍດັ່ງກ່າວ, ອັນໄດ້ເຮັດໃຫ້ການປະຕິບັດງານຮ່ວມສອງຝ່າຍ (JFAs) ໄດ້ຮັບຜົນສໍາເລັດໜ້າເພີ່ງພໍໃຈ. ຫວັງວ່າດ້ວຍຄວາມພະຍາຍາມຮ່ວມກັນເພີ່ມຂຶ້ນບົນຈິດໃຈແຫ່ງການຮ່ວມມື ແລະ ການເປັນຄູ່ຮ່ວມມືແບບກວມລວມອັນແທ້ຈິງ, ການປະຕິບັດງານຮ່ວມກັນດັ່ງກ່າວຈະສືບຕໍ່ບັນລຸເປົ້າໝາຍທີ່ວາງໄວ້ ເພື່ອຜົນປະໂຫຍດຂອງປະຊາຊົນສອງຊາດລາວ ແລະ ສະຫະລັດອາເມລິກາ.

  ນັບແຕ່ມື້ເລີ່ມຕົ້ນຂອງການຮ່ວມມືມາຮອດປະຈຸບັນ, ສອງຝ່າຍໄດ້ຂຸດຄົ້ນພົບສິ່ງເສດເຫຼືອຂອງທະຫານອາເມລິກາ ແລະ ຈັດສົ່ງແລ້ວຈຳນວນ 285 ຄົນ ໃນຈໍານວນຜູ້ຫາຍສາບສູນທັງໝົດ 573 ຄົນ ຫລືເກືອບເທົ່າ 50% ແລະ ຍັງອີກ 288 ຄົນ ທີ່ຝ່າຍອາເມລິກາຈໍາເປັນ ແລະ ຕ້ອງການການຮ່ວມມືຈາກຝ່າຍລາວໃນການສືບຕໍ່ຄົ້ນຫາ, ຊຶ່ງລັດຖະບານລາວເຫັນດີຈະສືບຕໍ່ໃຫ້ການຮ່ວມມືກັບອາເມລິກາບົນພື້ນຖານຄວາມອາດສາມາດ ແລະ ເງື່ອນໄຂຕົວຈິງຂອງຕົນ ແລະ ອີງຕາມບັນຍາກາດການພົວພັນຮ່ວມມືລະຫວ່າງສອງປະເທດລາວ-ອາເມລິກາໃນອະນາຄົດ.