ນາຍົກລັດຖະມົນຕີເນັ້ນໃຫ້ຂະແໜງສາທາລະນະສຸກສືບຕໍ່ແກ້ໄຂບັນຫາຕົວຊີ້ວັດທີ່ຍັງບໍ່ທັນບັນລຸ
ກອງປະຊຸມສະຫຼຸບການຈັດຕັ້ງປະຕິບັດວຽກງານສາທາລະນະສຸກ ປະຈໍາປີ 2018 ແລະ ວາງທິດທາງແຜນການ 2019, ໄດ້ຈັດຂຶ້ນໃນວັນທີ 26-28 ກຸມພານີ້, ຢູ່ຫໍປະຊຸມແຫ່ງຊາດ, ນະຄອນຫຼວງວຽງຈັນ, ໂດຍການເປັນປະທານຂອງທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ແລະ ເປັນກຽດເຂົ້າຮ່ວມຂອງທ່ານ ທອງລຸນ ສີສຸລິດ ນາຍົກລັດຖະມົນຕີ.
ໃນໂອກາດດັ່ງກ່າວ, ທ່ານນາຍົກລັດຖະມົນຕີ ໄດ້ໃຫ້ກຽດໂອ້ລົມເນັ້ນຂະແໜງສາທາສະນະສຸກເອົາໃຈໃສ່ແກ້ໄຂບັນດາຕົວຊີ້ວັດຂອງຂະແໜງສາທາລະນະສຸກທີ່ຍັງບໍ່ທັນບັນລຸ ເປັນຕົ້ນແມ່ນ ການຂະຫຍາຍຕາໜ່າງ ສາທາລະນະສຸກ, ໃຫ້ເອົາມາດຕະການປ້ອງກັນໄປກ່ອນ ແລະ ເອົາການປິ່ນປົວຮັກສາໄປນໍາ ຖືເປັນການຍົກລະດັບຄວາມຮູ້-ຄວາມສາມາດໃຫ້ພະນັກງານແພດໝໍ ເພື່ອເປັນການສ້າງຄົນ, ສ້າງແພດ, ສ້າງພະຍາບານໃຫ້ດີຂຶ້ນ, ຢາກປ້ອງກັນພະຍາດທີ່ມີປະສິດທິຜົນກໍຕ້ອງອົບຮົມຄວາມຮູ້ໃຫ້ປະຊາຊົນໄດ້ເຂົ້າໃຈກ່ຽວກັບສຸຂະພາບໃຫ້ເລິກເຊິ່ງກວ້າງຂວາງ, ນອກນີ້, ພວກເຮົາຕ້ອງຍາດແຍ່ງເອົາຄວາມຮູ້-ບົດຮຽນ, ເອົາການຊ່ວຍເຫຼືອຈາກຕ່າງປະເທດໃຫ້ຫຼາຍ, ພ້ອມທັງໃຫ້ມີການກວດກາຄືນ 5 ດີ ທີ່ຜ່ານມາສາມາດປະຕິບັດໄດ້ຄືແນວໃດ, ສືບຕໍ່ປັບປຸງສຸກສາລາ, ໂຮງໝໍເມືອງ-ແຂວງ ເພື່ອສະໜອງການບໍລິການປິ່ນປົວໃຫ້ມັນດີຂຶ້ນ, ສ້າງຈັນຍາບັນ-ຈັນຍາທຳໃຫ້ພະນັກງານແພດໝໍໃຫ້ດີຂຶ້ນ ແລະ ເປັນທີ່ຍອມຮັບຂອງປະຊາຊົນ, ພ້ອມທັງເອົາໃຈໃສ່ການອົບຮົມດ້ານຈັນຍາບັນ-ຈັນຍາທຳຂອງພະນັກງານແພດໝໍໃຫ້ດີຂຶ້ນ ເພື່ອຫຼຸດຜ່ອນການໄປປິ່ນປົວຢູ່ຕ່າງປະເທດ ແລະ ກວດກາຄືນການປິ່ນປົວໂດຍບໍ່ເສຍຄ່າຕາມບັນດາໂຮງໝໍລັດ ເພື່ອສ້າງຄວາມເຊື່ອໝັ້ນໃຫ້ສັງຄົມ.
