ປະຊາຊົນເມືອງໄຊເສດຖາສະເຫນີ ຫລາຍບັນຫາ ໃຫ້ ສສຊ ນະຄອນ ຫລວງວຽງຈັນ ຊ່ວຍແກ້ໄຂ
ເມື່ອທ້າຍອາທິດຜ່ານມານີ້, ທ່ານ ບຸນທອງ ພົມມະຈັນ, ສະມາຊິກສະພາແຫ່ງຊາດ ຊຸດທີ VIII ປະຈຳເຂດເລືອກຕັ້ງທີ 1, ພ້ອມດ້ວຍບັນດາສະມາຊິກສະພາປະຊາຊົນ ນະຄອນຫລວງວຽງຈັນ, ໄດ້ເຄື່ອນໄຫວພົບປະປະຊາຊົນ ຢູ່ບ້ານນາຄວາຍ, ໄຮ່ຄໍາ, ນາສ້າງໄພ ແລະ ບ້ານສົມສະຫງ່າ ເມືອງໄຊເຊດຖາ, ໂດຍໄດ້ຮັບຟັງຫລາຍບັນຫາທີ່ປະຊາຊົນພາຍໃນບ້ານດັ່ງກ່າວໄດ້ສະເຫນີ, ເປັນຕົ້ນແມ່ນບັນຫາເງິນເດືອນຂອງນາຍບ້ານ, ການແກ້ໄຂຄ່າຊົດເຊີຍທີ່ດິນຂອງປະຊາຊົນເຂດເສັ້ນທາງ 450 ປີ, ເນື່ອງຈາກວ່າມາຮອດປັດຈຸບັນ, ການທົດແທນຄ່າຊົດເຊີຍຍັງບໍ່ທັນໝົດ, ບັນຫາຊົນລະປະທານສະໜອງນ້ຳບໍ່ພຽງພໍກັບການຜະລິດກະສິກຳ, ເຮັດໃຫ້ຜົນຜະລິດໄດ້ຮັບຜົນໜ້ອຍ ແລະ ບັນຫາເສັ້ນທາງເປ່ເພ.
ໃນໂອກາດນີ້, ທ່ານ ບຸນທອງ ພົມມະຈັນ, ກໍໄດ້ຊີ້ແຈງບັນ ຫາທີ່ປະຊາຊົນສະເໜີມານີ້, ບັນຫາໃດທີ່ ສສຊ, ສສ ນະຄອນຫລວງວຽງຈັນ ຕອບໄດ້ກໍໃຫ້ຄວາມກະຈ່າງແຈ້ງ ແລະ ຊຸກຍູ້ໃຫ້ຂະແຫນງການກ່ຽວຂ້ອງ, ສ່ວນບັນຫາທີ່ບໍ່ກ່ຽວຂ້ອງສະພາກໍໄດ້ເກັບບັນທຶກໄວ້ເພື່ອສະເໜີຕໍ່ໄປຍັງພາກສ່ວນກ່ຽວຂ້ອງລົງມາແກ້ໄຂໃນຂອດຕໍ່ໄປ ແລະ ເມື່ອບໍ່ດົນມານີ້, ຫົວໜ້າພະແນກໂຍທາທິການ ແລະ ຂົນສົ່ງ ນະຄອນຫລວງວຽງຈັນ ໃຫ້ຮູ້ວ່າ: ໂຄງການກໍ່ສ້າງເສັ້ນທາງແຕ່ດອນນົກຂຸ້ມ ຫາ ທາງ 450 ປີ ແມ່ນ ໂຄງການຫັນ ຊັບສິນເປັນທຶນ ເຊິ່ງມີຜູ້ຖຶກຜົນກະທົບທັງໝົດ 691 ຕອນ ມີເນື້ອທີ່ 3.091.544 ຕາແມັດ. ມາຮອດປັດຈຸບັນ ໄດ້ຊຳລະຄ່າຊົດເຊີຍແລ້ວ 265 ຕອນ, ສ່ວນທີ່ເຫຼືອກຳລັງ ໄກ່ເກ່ຍ ແລະ ຈັດຕັ້ງປະຕິບັດຢູ່.ເສັ້ນທາງ ດັ່ງກ່າວ ຍາວປະມານ 9 ກິໂລແມັດ ເລີ້ມຈາກ ບ້ານດອນນົກຂຸ້ມ ຕັດຜ່ານ ບຶງທາດຫລວງ ໄປຫາ ບ້ານນ້ອຍ ຊຽງດາ ຊຶ່ງ ຈະເຊື່ອມຈອດ ກັບ ຖະໜົນ 450 ປີ ມີມູນຄ່າ ການກໍ່ສ້າງ 150 ລ້ານໂດລາ ໂດຍແມ່ນ ບໍລິສັດ ນໍ້າທາ ກໍ່ສ້າງ ຂົວທາງເປັນຜູ້ຮັບເຫມົາກໍ່ສ້າງ.
