ເຕັກນິກການຝຶກດື່ມນ້ຳໃນເວລາແລ່ນ

    ໃນການອອກກຳລັງກາຍ ປັດໄຈໜຶ່ງທີ່ເຮັດໃຫ້ຮ່າງກາຍໝົດແຮງ ນອກຈາກການຂາດອາຫານທີ່ພຽງພໍກ່ອນການແລ່ນແລ້ວກໍແມ່ນການຂາດນຳ້ ໂດຍສະເພາະການແລ່ນໃນໄລຍະທາງໄກ ຮ່າງກາຍຈະເສຍນຳ້ຫລາຍ ຫາກບໍ່ມີການດື່ມນຳ້ເຂົ້າໄປຊົດເຊີຍ ຈະເຮັດໃຫ້ຮ່າງກາຍຂາດນຳ້ ແລະ ຫາກຂາດຢ່າງຕໍ່ເນື່ອງຈະເຮັດໃຫ້ຮ່າງກາຍອ່ອນແອລົງໂດຍອັດຕະໂນມັດ ອັນເປັນຜົນຈາກຮ່າງກາຍຕ້ອງຮັກສາໃຫ້ປອດໄພຫລາຍທີ່ສຸດ.

     ການດື່ມນຳ້ລະຫ່ວາງການແລ່ນ ຈຶ່ງເປັນສິ່ງຈຳເປັນ ບໍ່ວ່າທ່ານຈະແລ່ນໄລຍະທາງເທົ່າໃດກໍຕາມ ເພາະການແລ່ນຈະເຮັດໃຫ້ອຸນຫະພູມໃນຮ່າງກາຍສູງຂຶ້ນ ໃນກໍລະນີທີ່ແລ່ນໄລຍະທາງໄກໆ ອຸນຫະພູມຈະຂຶ້ນສູງປະມານ 1 ອົງສາ ເຖິງວ່າຮ່າງກາຍຈະພະຍາຍາມລະບາຍຄວາມຮ້ອນຜ່ານທາງເຫື່ອ ແຕ່ຄວາມຮ້ອນທີ່ລະບາຍອອກມາ ພ້ອມກັບເຫື່ອກໍຍັງໜ້ອຍກ່ວາຄວາມຮ້ອນທີ່ເກີດຂຶ້ນໃນຂະບວນການເຜົາຜານພະລັງງານພາຍໃນຮ່າງກາຍ.

     ການດື່ມນຳ້ເຂົ້າຈະໄປຊ່ວຍ ຫລຸດອຸນຫະພູມໃຫ້ຢູ່ໃນລະດັບທີ່ເໝາະສົມ ສ່ວນເກີນຈະຖືກໄລ່ທາງເຫື່ອ ລະບາຍຄວາມຮ້ອນ ດັ່ງນັ້ນ ນຳ້ຈຶ່ງເປັນສິ່ງສຳຄັນລະຫ່ວາງການແລ່ນຢ່າງຂາດບໍ່ໄດ້. ຄຳຖາມກໍຄື ເຮົາຄວນຈະດື່ມນຳ້ຫລາຍປານໃດ ? ຫາກເປັນຫລັກວິຊາການຈະແບ່ງການດື່ມນຳ້ລະຫ່ວາງການແລ່ນອອກກຳລັງກາຍໄວ້ 2 ແນວທາງ ຄື : ດື່ມເມື່ອກະຫາຍ ແລະ ດື່ມ ຕາມນຳ້ໜັກໂຕ ແລ້ວຄຳນວນຕາມອັດຕາການເສຍເຫື່ອເພື່ອດື່ມຊົດເຊີຍຢ່າງພໍດີ, ແບບທີ 2 ນີ້ເກືອບຈະບໍ່ມີໃຜໃຊ້ກັນ ຍ້ອນຍາກທີ່ຈະວັດແທກ ເພາະມີປັດໄຈເລື່ອງອຸນຫະພູມລະຫ່ວາງແລ່ນ ທັງນີ້ຄົນເຮົາກໍມີເຫື່ອອອກໄດ້ບໍ່ສະໝໍ່າສະເໝີຕະຫລອດເວລາ. ແນວທາງທີ່ເໝາະສົມທີ່ສຸດແມ່ນການດື່ມເມື່ອຮູ້ສຶກກະຫາຍ ແລະ ຢ່າດື່ມຫລາຍເກີນໄປ ເພາະຮ່າງກາຍບໍ່ໄດ້ໄລ່ເຫື່ອອອກມາ ຫລາຍຂະໜາດນັ້ນ ຫາກເປັນການແຂ່ງມາລາທອນ ເຮົາຈະພົບວ່າມີຈຸດບໍລິການນຳ້ດື່ມທຸກໄລຍະທາງ 2,5 ກິໂລແມັດ ຫລາຍຄົນເລືອກທີ່ຈະບໍ່ຢຸດຮັບນຳ້ທຸກຈຸດ ຍ້ອນຄິດວ່າຈະເຮັດໃຫ້ເສຍເວລາ, ແຕ່ໃນຄວາມເປັນຈິງແລ້ວນັກແລ່ນທີ່ດື່ມນຳ້ໄປຕະຫລອດການແຂ່ງຂັນຈະເຮັດເວລາໄດ້ດີກ່ວາ ເພາະຮ່າງກາຍສົດຊື່ນກ່ວານັກແຂ່ງທີ່ຝືນແລ່ນໄປຮັບນຳ້ອີກຈຸດໜຶ່ງເພື່ອຂຶ້ນນຳກຸ່ມ ໂດຍສະເພາະແມ່ນການແລ່ນ 10 ກິໂລແມັດຂຶ້ນໄປ ໃນເລື່ອງການດື່ມນຳ້ຈະດື່ມພຽງ 1 ໃນ 3 ຫລື ດື່ມພຽງເຄິ່ງຈອກເທົ່ານັ້ນ ທີ່ເຫລືອໃຊ້ຫົດໂຕເພື່ອຫລຸດອຸນຫະພູມຮ່າງກາຍ. ນອກຈາກນີ້, ເຮົາຄວນຫລີກເວັ້ນການກິນຢາແກ້ປວດ ດັ່ງ ແອສໄປຣິນ ເພາະຈະເຮັດໃຫ້ຮ່າງກາຍບວມນຳ້ ຫລື ເກັບນຳ້ຫລາຍເປັນພິເສດ ສົ່ງຜົນຕໍ່ນຳ້ໜັກ ແລະ ຄວາມໄວໃນການແລ່ນໂດຍກົງ ຫາກທ່ານຕ້ອງແລ່ນຕໍ່ເນື່ອງໂດຍໃຊ້ເວລາເກີນ 4 ຊົ່ວໂມງຂຶ້ນໄປ ຕ້ອງສັງເກດອາການໂຕເອງຢູ່ຕະຫລອດເວລາ ເຊັ່ນ : ຮູ້ສຶກອຶດອັດ, ຫາຍໃຈລຳ ບາກ, ຫົວໃຈເຕັ້ນຜິດປົກກະຕິ, ວິນ ຫົວ, ປວດຮາກ ນັ້ນແມ່ນອາການ ຂອງນັກແລ່ນທີ່ຂາດນຳ້ ແລະ ລະ ບົບຮ່າງກາຍກຳລັງມີບັນຫາ. ໃນກໍລະນີແລ່ນແຂ່ງລະດັບນີ້ຈະໃຊ້ເຄື່ອງດື່ມເກືອແຮ່ໃຫ້ພະລັງງານຊ່ວຍເສີມໃຫ້ຮ່າງກາຍສົດຊື່ນຢ່າງວ່ອງໄວ.

     ຫລັງຈົບການແລ່ນ ສິ່ງທີ່ຄວນເຮັດກໍຄືການດື່ມນຳ້ຢ່າງຊ້າໆ ອອກກຳລັງກາຍເບົາໆ ຈົນກ່ວາຮ່າງກາຍເປັນປົກກະຕິ, ອາບນຳ້ ແລະ ພັກຜ່ອນປະມານ 20 – 40 ນາທີ ກ່ອນຈະກິນອາຫານ.

     ສະຫລຸບໃຈຄວາມສຳຄັນກໍຄື ດື່ມນຳ້ແຕ່ພໍດີ ຢ່າຫລາຍ ຫລື ໜ້ອຍເກີນໄປ, ດື່ມເປັນໄລຍະ ແລະ ສັງເກດການເຕັ້ນຂອງຫົວໃຈ ແລະ ຄວາມຜິດປົກກະຕິອື່ນໆ ເຊິ່ງຈະເຮັດໃຫ້ທ່ານແລ່ນເຖິງເສັ້ນໄຊຢ່າງວ່ອງໄວ ແລະ ປອດໄພ.