ອາເມລິກາກຽມຍົກເລີກເກັບພາສີ ນຳເຂົ້າເກືອບທັງໝົດຈາກຈີນ
ໜັງສືພິມວໍສະຕີດ ເຈີນັດ ລາຍງານວ່າ: ອາເມລິກາອາດຍົກເລີກມາດຕະການຮຽກເກັບພາສີນຳເຂົ້າສິນຄ້າເກືອບທັງໝົດທີ່ໄດ້ບັງຄັບໃຊ້ກັບຈີນນັບແຕ່ປີຜ່ານມາ ໂດຍຄາດວ່າຜູ້ນຳຂອງທັງສອງປະເທດອາດຈະບັນລຸຂໍ້ຕົກລົງການຄ້າຢ່າງສົມບູນໃນກອງປະຊຸມວັນທີ 27 ມີນານີ້.
ວໍສະຕີດ ເຈີນັດ ລາຍງານໂດຍອ້າງແຫລ່ງຂ່າວວ່າ: ອາເມລິກາ ແລະ ຈີນ ຢູ່ໃນຂັ້ນຕອນສຸດທ້າຍຂອງການເຮັດຂໍ້ຕົກລົງການຄ້າ ໂດຍຈີນສະເໜີວ່າຈະຫລຸດພາສີນຳເຂົ້າ ແລະ ຫລຸດຜ່ອນກົດລະບຽບດ້ານການນຳເຂົ້າສິນຄ້າກະສິກຳ, ເຄມີ, ລົດ ແລະ ສິນຄ້າອື່ນໆຈາກອາເມລິກາ.
ຜ່ານມາ, ປະທານາທິບໍດີ ໂດນັລ ທຣຳ ຂອງອາເມລິກາ ຮຽກຮ້ອງລັດຖະບານປັກກິ່ງ ຍົກເລີກການຈັດເກັບພາສີສິນຄ້າກະສິກຳທີ່ນຳເຂົ້າຈາກອາເມລິກາທັງໝົດໃນທັນທີ ເນື່ອງຈາກການເຈລະຈາການຄ້າລະຫວ່າງກັນມີຄວາມຄືບໜ້າດ້ວຍດີ ເຊິ່ງລວມທັງການຕັດສິນໃຈເລື່ອນກຳນົດເສັ້ນຕາຍຈັດເກັບພາສີສິນຄ້ານຳເຂົ້າຈາກຈີນ 25% ອອກໄປ.
ກະສິກອນເປັນຖານສຽງສຳຄັນຂອງພັກລີພັບບລີກັນ ເຊິ່ງການເຮັດສົງຄາມການຄ້າລະຫວ່າງ ອາເມລິກາ ແລະ ຈີນ ສ້າງຜົນກະທົບໂດຍກົງຕໍ່ບັນດາກະສິກອນຢູ່ອາເມລິກາ ໂດຍປີຜ່ານມາ ລັດຖະບານປັກກິ່ງຈັດເກັບພາສີນຳເຂົ້າຖົ່ວເຫລືອງ, ເຂົ້າສາລີ, ຊີ້ນໝູ ແລະ ສິນຄ້າກະສິກຳໝວດອື່ນໆຈາກອາເມລິກາ ລວມທັງຫລຸດຄຳສັ່ງຊື້ຜະລິດຕະພັນຈາກຟາມຂອງບັນດາກະສິກອນອາເມລິກາຈຳນວນຫລາຍ.
