ດານັງ ດຶງດູດລົງທຶນຕ່າງປະເທດ ຫລາຍກວ່າ 490 ລ້ານໂດລາ
ທາງການດານັງ ເປີດເຜີຍວ່າ: ບໍລິສັດ ຢູນິເວີແຊລ ອັລລອຍຄໍເປີເຣຊັນ ຂອງອາເມລິກາ ວາງແຜນລົງທຶນເປີດໂຮງງານໃໝ່ໃນເຂດອຸດສາຫະກຳໄຮເທັກ ໃນກາງເມືອງດານັງ ສສ ຫວຽດນາມ ເພື່ອໃຊ້ເປັນຖານການຜະລິດຊິ້ນສ່ວນເຮືອບິນສົ່ງອອກໄປຕະຫລາດອາເມລິກາເໜືອ ແລະ ເອີຣົບ, ຄາດວ່າເມື່ອສຳເລັດ ໂຮງງານແຫ່ງນີ້ຈະສາມາດຜະລິດຊິ້ນສ່ວນປະກອບເຮືອບິນ 4.000 ອັນ ທີ່ສາມາດນຳໄປໃຊ້ກັບເຮືອບິນທຸກປະເພດ.
ຂະນະທີ່ບໍລິສັດມິກາຊູກິຂອງຍີ່ປຸ່ນ ກຽມລົງທຶນສ້າງຊັອບປິ້ງຄອມເພລັກ ມູນຄ່າ 100 ລ້ານໂດລາ ໃນພື້ນທີ່ 71,8 ໄລ່ ປະກອບມີໂຮງແຮມລະດັບ 5 ດາວ, ສວນນ້ຳ, ສວນສະໜຸກ ແລະ ຮ້ານອາຫານ.
ນອກຈາກນີ້ ທາງການທ້ອງຖິ່ນດານັງ ຍັງອະນຸມັດໂຄງການລົງທຶນໂດຍກົງຈາກຕ່າງປະເທດ (FDI) ອີກ 6 ໂຄງການ ເປັນໂຮງງານຜະລິດລົດ ແລະ ຊິ້ນສ່ວນປະກອບລົດນິດສັນຈາກຍີ່ປຸ່ນ ແລະ ອຸປະກອນຊິ້ນສ່ວນເອເລັກໂຕຣນິກຂອງບໍລິສັດອາເມລິກາ ຄີທໍນິກ ອີເອັມເອສ.
ນອກຈາກໂຄງການທີ່ຜ່ານການພິຈາລະນາແລ້ວໃນເບື້ອງຕົ້ນ ຍັງມີອີກ 11 ໂຄງການທີ່ໄດ້ຜ່ານການອະນຸມັດໃນຫລັກການ ຈຳນວນເງິນລົງທຶນເກືອບ 3,5 ພັນລ້ານໂດລາ ເຊິ່ງລວມທັງໂຄງການສ້າງສູນກາງທາງການເງິນ 2 ພັນລ້ານໂດລາ ໂດຍບໍລິສັດຈາກສິງກະໂປ ແລະ ບໍລິສັດຮົງກົງຈະສ້າງສະໜາມມ້າມູນຄ່າ 200 ລ້ານໂດລາ ນຳອີກ. ເມື່ອທຽບໃສ່ປີ 2018 ຜ່ານມາ, ດານັງອະນຸມັດໂຄງການ FDI 135 ໂຄງການ ມູນຄ່າເກືອບ 286 ລ້ານໂດລາ.
