2 ປະເທດເກົາຫລີ ວາງແຜນຈັດ ການແຂ່ງຂັນບານໂລກຍິງຮ່ວມກັນ
ເດິ ເທເລກຣາບ ສື່ຂອງອັງກິດ ລະບຸວ່າ: ສ.ເກົາຫລີ ກັບ ສປປ ເກົາຫລີ ວາງແຜນຈະຂໍເປັນເຈົ້າພາບບານໂລກຍິງ ປະຈຳປີ 2023 ຮ່ວມກັນ ໂດຍ ຈານນີ່ ອິນຟານຕິໂນ່ ຜູ້ບໍລິຫານຟີຟາ ເປີດເຜີຍວ່າ: ນີ້ເປັນເລື່ອງທີ່ໜ້າຍິນດີທີ່ສຸດ.
ໄລຍະຜ່ານມາ ການພົວພັນຂອງ 2 ປະເທດເກົາຫລີດີຂຶ້ນຫລາຍ ໂດຍພວກເຂົາຫາກໍຍ່າງເຂົ້າສະໜາມພ້ອມກັນໃນການແຂ່ງຂັນ ໂອແລັມປິກ ເກມ ລະດູໜາວ ໃນປີ 2018 ແລະ ລົງແຂ່ງກິລາຮອກກີ້ນ້ຳກ້ອນຮ່ວມກັນ ຈົນສ້າງຄວາມປະທັບໃຈໃຫ້ຫລາຍຄົນ.
ທັງນີ້ ຫລັງຈາກທີ່ມີນັກຂ່າວໄປສຳພາດ ຈານນີ່ ອິນຟານຕິໂນ່ ປະທານຟີຟາ ກ່ຽວກັບເລື່ອງນີ້ນັ້ນ, ລາວກໍຕອບວ່າຮູ້ສຶກດີໃຈຫລາຍທີ່ທັງ 2 ປະເທດຕັ້ງໃຈຈະເປັນເຈົ້າພາບການແຂ່ງຂັນໃຫຍ່ຮ່ວມກັນ.
ສຳລັບຕອນນີ້ນັ້ນ ປະເທດທີ່ຍື່ນຂໍເປັນເຈົ້າພາບບານເຕະໂລກຍິງ 2023 ແນ່ນອນແລ້ວມີ ຍີ່ປຸ່ນ, ອັອສເຕຣເລຍ, ນິວຊີແລນ ແລະ ອາຟຣິກາໃຕ້ ໂດຍປະເທດທີ່ຢາກເປັນເຈົ້າພາບສາມາດຍື່ນເລື່ອງຂໍສິດນັ້ນໄດ້ຈົນຮອດວັນທີ 15 ມີນານີ້.
