ເປີດນຳໃຊ້ໂຮງໝໍມິດຕະພາບ-ພາກຂະຫຍາຍ ຢ່າງເປັນທາງການ
ພິທີເປີດນຳໃຊ້ໂຮງໝໍມິດຕະພາບ-ພາກຂະຫຍາຍ ຢູ່ທີ່ໂຮງໝໍມິດຕະພາບ 150 ຕຽງ ນະຄອນຫລວງວຽງຈັນ ໄດ້ຈັດຂຶ້ນໃນວັນທີ 4 ມີນານີ້ ໂດຍການເຂົ້າຮ່ວມຂອງທ່ານ ສົມດີ ດວງດີ ຮອງນາຍຍົກລັກຖະມົນຕີ ລັດຖະມົນຕີກະຊວງການເງິນ, ທ່ານລັດຖະມົນຕີ ກະຊວງສາທາລະນະສຸກ ແລະຜູ້ຕາງໜ້າພາກສ່ວນກ່ຽວຂ້ອງຕ່າງໆເຂົ້າຮ່ວມເປັນຈຳນວນຫລາຍ.
ຜູ້ອຳນວຍການໂຮງໝໍດັ່ງກ່າວໃຫ້ຮູ້ວ່າ: ໂຮງໝໍແຫ່ງນີ້ນີ້ໄດ້ດຳເນີນກໍ່ສ້າງມາຕັ້ງແຕ່ປີ 2015 ໂດຍທຶນກູ້ຢືມດອກເບ້ຍຕໍ່າຈາກປະເທດໂອຕຣິດ ໃນມູນຄ່າ 112,8 ກວ່າລ້ານເອີໂຣ, ປະກອບດ້ວຍອາຄານ 4 ຊັ້ນ, ລວມມີທັງໝົດ 308 ຕຽງນອນ, ມີຫ້ອງຜ່າຕັດ 6 ຫ້ອງ, ຫ້ອງບົ່ງມະຕິພະຍາດ 11 ຫ້ອງ ແລະຕຶກນອນພິເສດຈຳນວນໜຶ່ງ ເພື່ອຮັບຮອງການປິ່ນສຸຂະພາບຂອງປະຊາຊົນເຮົາໄປສູ່ລະບົບທັນສະໄໝ, ມີຄວາມສະດວກວ່ອງໄວ, ມີຄຸນນະພາບ ແລະຮັບປະກັນຄວາມປອດໄພສູງ.
ໃນໂອກາດດຽວກັນ ທ່ານບຸນກອງ ສີຫາວົງ ລັດຖະມົນຕີກະຊວງສາທາລະສາທາລະນະສຸກ ໄດ້ມີຄຳເຫັນໃນພິທີວ່າ: ວຽກງານສາທາລະນະສຸກເປັນສິ່ງສຳຄັນອັນຕົ້ນຕໍຂອງການພັດທະນາປະເທດຊາດຕາມແນວທາງນະໂຍບາຍຂອງພັກ ເຮັດໃຫ້ປະຊາຊົນລາວໄດ້ເຂົ້າເຖິງການບໍລິການດ້ານສາທາລະນະສຸກ. ດັ່ງນັ້ນ, ພາກສ່ວນສາທາລະນະສຸກຕ້ອງໄດ້ເອົາໃຈໃສ່ປະຕິບັດໜ້າທີ່ວຽກງານຂອງຕົນ, ເປັນຜູ້ຄວບຄຸມປ້ອງກັນພະຍາຍາດຕ່າງໆບໍ່ໃຫ້ແພ່ລະບາດ ແລະເຮັດການບໍລິການທີ່ມີຄຸນນະພາບໃຫ້ທົ່ວເຖິງດ້ວຍຄວາມຍຸຕິທຳ ແລະເອົາໃຈໃສ່ 4 ໜ້າວຽກຕົ້ນຕໍຄື: ວຽກງານກັນພະຍາດສົ່ງເສີມສຸຂະພາບ, ເອົາໃຈໃສ່ປິ່ນປົວໃຫ້ມີຄຸນນະພາບສາມາດແກ້ໄຂບັນຫາຂອງປະຊາຊົນໄດ້, ສົ່ງເສີມສີມືຂອງບຸກຄະລາກອນແພດໝໍໃຫ້ດີ ແລະລົງເລິກດ້ານການຈັດຕັ້ງປະຕິບັດຕົວຈິງໃຫ້ໄດ້ໝາກຜົນທີ່ເພີງພໍໃຈຂອງຜູ້ໃຊ້ບໍລິການກໍຄືປະຊາຊົນເປັນສຳຄັນ ເພື່ອເປັນບາດກ້າວໃໝ່ອັນດີໃຫ້ແກ່ການພັດທະນາຂົງເຂດວຽກງານສາທາລະນະສຸກໃຫ້ມີຄວາມ ແລະເປັນທີ່ເພີງກໍໃຈຂອງປະຊາຊົນລາວບັນດາເຜົ່າ.
