ຢາ​ເສບ​ຕິດ​ໄພ​ຄຸກ​ຄາມຄວາມ​ໝັ້ນຄົງ​ຂອງ​ຊາດ

- advert banner 728 90 728x90 - ຢາ​ເສບ​ຕິດ​ໄພ​ຄຸກ​ຄາມຄວາມ​ໝັ້ນຄົງ​ຂອງ​ຊາດ


ໂດຍ: ທິດ​ກ່ຳ

- lattana 1 - ຢາ​ເສບ​ຕິດ​ໄພ​ຄຸກ​ຄາມຄວາມ​ໝັ້ນຄົງ​ຂອງ​ຊາດ

ເທົ່າທີ່ເຫັນຕາມແຫລ່ງ ຂ່າວຄາວໃນສື່ສັງຄົມບໍ່ວ່າໃນໜັງສືພິມ, ວິທະຍຸ, ໂທລະພາບ ແລະ ໃນສື່ອອນລາຍເກືອບ ທຸກວັນ ແມ່ນມີເຫດການຕາມລ່າປາບປາມ, ຈັບກຸມຄຸມຂັງ, ທັງປະກາດລົງໂທດພວກຄ້າຂາຍຢາເສບຕິດ ເພື່ອເລັ່ງ ສະກັດກັ້ນໃຫ້ຫລຸດໜ້ອຍຖອຍລົງ.

ຖ້າເບິ່ງໃນທາງສວນກັບແລ້ວ, ສິ່ງດັ່ງກ່າວຄືວ່າມີ ການຕາມລ່າປາບປາມຈັບກຸມຄຸມຂັງກັນຫລາຍເທົ່າໃດປາກົດການເຄື່ອນໄຫວຂອງພວກຕ້ອງໂທດກ່ຽວກັບບັນ ຫາຢາເສບຕິດພັດນັບມື້ກຳເລີບເຕີບສານ ແລະ ແຜ່ຂະຫຍາຍໄປຫລາຍໝ້ອງ ຫລາຍທີ່.

ເບື້ອງໜຶ່ງ ກໍຂໍຊົມເຊີຍ ເຈົ້າໜ້າທີ່ກ່ຽວຂ້ອງ ນັບແຕ່ຂັ້ນ ສູນກາງລົງຮອດທ້ອງຖິ່ນ ທີ່ ໄດ້ເອົາໃຈໃສ່ເຮັດທຸກສິ່ງທຸກຢ່າງໃນການຕ້ານ ແລະ ສະກັດກັ້ນ ຂະບວນການດັ່ງກ່າວ ຢ່າງບໍ່ລົດລະ, ຈຶ່ງສາມາດ ຕາມລ່າປາບປາມໄພຄຸກຄາມເຫລົ່ານີ້ໄດ້ຢ່າງຫລວງ ຫລາຍ, ເຊິ່ງບາງລາຍ, ບາງ ກໍລະນີ ກໍຈົນເຖິງຂັ້ນຕັດສິນ ລົງໂທດປະຫານຊີວິດ.

ຕາມເຮົາວ່າ, ອັນສາ ເຫດທີ່ເຮັດໃຫ້ຂະບວນຢາ ເສບຕິດລາມພະລາມຈົວແຜ່ ຂະຫຍາຍໄປໃນຫລາຍບ່ອນຫລາຍທີ່ ກໍອາດເກີດມາຈາກ ຫລາຍເງື່ອນໄຂ ແລະ ຫລາຍປັດໄຈ ຕົວຢ່າງໃນສະພາບປັດຈຸບັນການປາບປາມຂອງພວກເຮົາເບິ່ງຢ່າງໜຶ່ງຄືວ່າ ແກ້ທີ່ປາຍເຫດ ຍັງບໍ່ທັນເຂົ້າເລິກເຖິງເຮືອນຮັງບ່ອນທີ່ເຂົາຜະລິດ.

ການຈັບກຸມຄຸມຂັງລົງ ໂທດກໍມີແຕ່ພວກທີ່ຂົນເຄື່ອນຍ້າຍ, ພວກຄ້າຂາຍກັບພວກເສບເທົ່ານັ້ນ. ສະນັ້ນມັນກໍເລີຍບໍ່ມີທ່າທີໝົດ ສ້ຽງ ຫລື ວ່າບໍ່ມີການຫລຸດ ຜ່ອນລົງຈັກເທື່ອ, ສິ່ງທີ່ແນ່ນອນຄືຜູ້ຜະລິດມັນກໍຍັງຜະລິດຢູ່ຕິກໆໃນເງື່ອນໄຂທີ່ ຄວາມຕ້ອງການຂອງພວກຈຳໜ່າຍກັບພວກເສບ ຫລື ຄວາມຕ້ອງການມັນຍັງມີແຜ່ຫລາຍຢູ່ໃນທົ່ວສັງຄົມທັງ ພາຍໃນ ແລະ ຕ່າງປະເທດ.

ເມື່ອຕັ້ງໂຈດກັນວ່າ, ເພື່ອແກ້ໄຂບັນຫາດັ່ງກ່າວ ພວກເຮົາຈະຕ້ອງເຮັດແນວໃດ? ຕາມທິດກ່ຳວ່າມັນ ເປັນບັນຫາຂອງສັງຄົມທີ່ຕ້ອງໄດ້ ພ້ອມກັນເຮັດ ແລະ ພ້ອມກັນແກ້ໃຫ້ຄວບຄູ່ກັນໄປໂດຍເລີ່ມຈາກຄອບຄົວເປັນຫລັກ ຈາກນັ້ນຈຶ່ງກ້າວໄປຫາການ ຈັດຕັ້ງສັງຄົມ. ປັດຈຸບັນພັກ ແລະ ລັດຖະບານເຮົາໄດ້ມີແນວທາງນະໂຍບາຍໃນ ການສ້າງສາພັດທະນາປະ ເທດຊາດດ້ວຍຫລາຍຮູບການ ແລະ ວິທີການເພື່ອພ້ອມກັນບຸກທະລຸເປັນຕົ້ນ ໜຶ່ງໃນໜ້າວຽກເພື່ອລົບ ລ້າງຄວາມທຸກຍາກກໍແມ່ນ  3 ສ້າງ. ໃນນີ້ອັນສຳຄັນກວ່າ ໝູ່ກໍແມ່ນບັນຫາການສ້າງ ບ້ານໃຫ້ເປັນຫົວໜ່ວຍພັດທະ ນາຢ່າງຈິງຈັງ ແລະ ເປັນຮູບປະທຳຂຶ້ນອີ່ຫລີ.

ປັດໄຈທີ່ສະແດງອອກ ໃນການສ້າງບ້ານເປັນຫົວໜ່ວຍພັດທະນານີ້ເນື້ອແທ້ ຂອງມັນກໍແມ່ນສ້າງຄອບຄົວຕົວແບບໃນການຜະລິດ, ຄອບຄົວວັດທະນະທຳ, ຄອບຄົວປອດຢາເສບຕິດ, ຄອບ ຄົວມີຄວາມສະຫງົບ, ສ້າງບ້ານປອດຄະດີ, ບ້ານວັດທະນະທຳ, ບ້ານສາທາລະນະສຸກແບບຢ່າງ ແລະ ອື່ນໆ ຕາມເງື່ອນໄຂມາດຖານທີ່ພັກ ແລະ ລັດຖະບານ     ວາງອອກ.

ຖ້າຢາກໄດ້ຕາມຄວາມຫວັງທີ່ວ່ານີ້, ກ່ອນອື່ນໝົດຕ້ອງພາກັນຫັນທິດລົງກໍ່ສ້າງຮາກຖານການເມືອງ ເພື່ອສ້າງບ້ານໃຫ້ເຂັ້ມແຂງຢ່າງ ຮອບດ້ານ, ພະຍາຍາມສ້າງ ບ້ານໃຫ້ສາມາດລົບລ້າງ ຄວາມທຸກຍາກ ແລະ ດ້ອຍພັດທະນາ.  ສ່ວນວ່າວິທີອັນ ທີສອງນີ້ ກໍຕ້ອງໄດ້ປາບເຮືອນຮັງບ່ອນລີ້ຊ່ອນປ່ອນ ຕົວຂອງພວກຜະລິດຢາເສບຕິດໃຫ້ສຸດຂັ້ນສຸດຂີດກາຍເປັນສະໜາມຮົບໃຫຍ່ອັນໜຶ່ງຂອງຊາດ.

ເຖິງຢ່າງໃດກໍດີ, ຕາມເຮົາວ່າບັນຫາການປາບປາມຢາເສບຕິດມັນເປັນເລື່ອງລະອຽດອ່ອນທັງຫຍຸ້ງຍາກສັບສົນ ແລະ ມີຄວາມສ່ຽງສູງ, ແຕ່ພວກເຮົາກໍຕ້ອງໄດ້ພ້ອມ ກັນເຮັດ ເພາະວ່າຢາເສບຕິດ ແມ່ນມັດຈຸລາດຂ້າຄົນໃນທາງກົງ ແລະ ທາງອ້ອມ, ທັງສະເພາະໜ້າ ແລະ ຍາວນານ ເພາະວ່າຢາເສບຕິດມັນເປັນ ໄພຄຸກຄາມຢ່າງມະຫັນຕໍ່ສະເຖຍລະພາບ ແລະ ຄວາມໝັ້ນຄົງຂອງປະເທດຊາດ.

- 576 - ຢາ​ເສບ​ຕິດ​ໄພ​ຄຸກ​ຄາມຄວາມ​ໝັ້ນຄົງ​ຂອງ​ຊາດ
(ພາບປະກອບ)