ພົນລະເມືອງດີ ພໍ່ຄ້າຂາຍສາດ ເກັບກະເປົາເງິນໄດ້ສົ່ງຄືນເຈົ້າຂອງ ໂດຍບໍ່ຮັບຄ່າຕອບແທນໃດໆ

ນັບວ່າເປັນພົນລະເມືອງດີຜູ້ ໜຶ່ງນັ້ນຄື ທ້າວ ຈັນອ້ວນ ຄຳຜິວ ຢູ່ບ້ານຜາງແຫ້ງ ເມືອງນາຊາຍທອງນະຄອນຫລວງວຽງຈັນ ມີອາຊີບເລາະ ຂາຍສາດໄປທົ່ວທຸກບ່ອນຄື: ໃນວັນທີ 5 ມີນານີ້, ລາວ ໄດ້ຂັບລົດຮຸນໄດສີຂາວຄູ່ອາຊີບ, ບັນທຸກສາດເຕັມທ້າຍ ລົດຂຶ້ນເມື່ອ ເມືອງຫົງສາ ແຂວງໄຊຍະບູລີ ເພື່ອຂາຍ ສາດດັ່ງກ່າວ ແລະ ໃນຂະນະນັ້ນໄດ້ພົບເຫັນກະ ເປົາເງິນຕົກເຮຍຢູ່ກາງທາງ ຈິ່ງເກັບຂຶ້ນມາເບິ່ງ ເຊິ່ງມີເງິນ ແລະ ບັດຫລາຍຊະນິດຢູ່ໃນນັ້ນ  ແລະ ພິເສດມີບັດປະຈຳຕົວຂອງຜູ້ກ່ຽວ ຊື່ ນາງ ອາລຸນ ພົມມະຫານ ປະຊາຊົນ ບ້ານ ສີບຸນເຮືອງ ເມືອງຫົງສາ ແລ້ວໄດ້ຂັບລົດມຸ່ງໜ້າມາ  ບ້ານດັ່ງກ່າວໄດ້ຖາມຫາຜູ້ ເສຍຫາຍເພື່ອສົ່ງກະເປົາເງິນນັ້ນຄືນໂດຍບໍ່ຮັບຄ່າຕອບແທນໃດໆ. ເຊິ່ງເປັນນ້ຳໃຈອັນດີທີ່ ພົນລະເມືອງເຮົາຄວນຮ່ຳ ຮຽນເອົາເປັນແບບຢ່າງ./.