ຈີນຕັ້ງເປົ້າ GDP ຂະຫຍາຍຕົວປີນີ້ 6-6,5%
ລັດຖະບານຈີນ ເປີດເຜີຍລາຍງານການດຳເນີນງານຕໍ່ສື່ມວນຊົນກ່ອນກອງປະຊຸມສະພາປະຊາຊົນແຫ່ງຊາດຈີນ (NPC) ຊຸດທີ 13 ຄັ້ງທີ 2 ໃນວັນທີ 5 ມີນານີ້ ໂດຍລັດຖະບານຈີນໄດ້ກຳນົດເປົ້າໝາຍການຂະຫຍາຍຕົວຂອງລວມຍອດຜະລິດຕະພັນພາຍໃນ (GDP) ໄວ້ໃນລະດັບ 6-6,5% ສຳລັບປີ 2019.
ຂະນະດຽວກັນ, ລັດຖະບານຈີນຕັ້ງເປົ້າຈະຮັກສາລະດັບເງິນເຟີ້ດ້ານລາຄາຜູ້ບໍລິໂພກໄວ້ປະມານ 3% ແລະ ການສ້າງວຽກໃນເຂດເມືອງຫລາຍກວ່າ 11 ລ້ານຕຳແໜ່ງ, ພ້ອມທັງຄາດວ່າ: ອັດຕາການຫວ່າງງານໃນເຂດເມືອງທີ່ໄດ້ຮັບການສຳຫລວດຈະຍັງຢູ່ປະມານ 5,5%, ສ່ວນອັດຕາການຫວ່າງງານໃນເຂດເມືອງທີ່ມີການລົງທະບຽນຈະຢູ່ລະດັບ 4,5%.
ນອກຈາກນີ້, ລັດຖະບານຈີນ ໄດ້ເພີ່ມເປົ້າໝາຍການຂາດດູນດ້ານການເງິນສຳລັບປີ 2019 ສູ່ລະດັບ 2,8% ຂອງ GDP ເຊິ່ງເພີ່ມຂຶ້ນ 0,2% ເມື່ອທຽບໃສ່ປີ 2018.
ຂະນະດຽວກັນ, ລັດຖະບານຈີນຄາດວ່າ: ຍອດຂາດດູນງົບປະມານໂດຍລວມຢູ່ລະດັບ 2,76 ຕື້ຢວນ (4,12 ແສນລ້ານໂດລາສະຫະລັດ) ໂດຍຄາດວ່າຍອດຂາດດູນງົບປະມານຂອງລັດຖະບານຈະຢູ່ລະດັບ 1,83 ຕື້ຢວນ ແລະ ຍອດຂາດດູນງົບປະມານຂອງທ້ອງຖິ່ນຈະຢູ່ລະດັບ 9,30 ແສນລ້ານຢວນ.
