ເຈົ້າຂອງສະໂມສອນ ແມນຊິຕີ້ ຊື້ສະໂມສອນທີ 7 ໃນລີກອັນດັບ 3 ຂອງປະເທດຈີນ
ຄະນະບໍລິຫານ ສະໂມສອນແມນເຊັສເຕີ ຊິຕີ້ ທີມມະຫາເສດຖີ ໃນພຣີເມຍລີກ ອັງກິດ ຕັ້ງໜ້າລົງທຶນເຮັດທຸລະກິດດ້ານການກິລາບານເຕະຢ່າງຕໍ່ເນື່ອງ. ຫລ້າສຸດຕັດສິນໃຈຊື້ສະໂມສອນ ສື່ຊວນ ຈິວນິວ ທີມພະລັງງົວຊົນແຫ່ງ Chinese League Two ລີກອັນດັບ 3 ຂອງປະເທດຈີນ ທີມດັງປະຈຳແຂວງສື່ຊວນ ທາງພາກຕາເວັນຕົກຂອງປະເທດ ທີ່ມີສະໜາມ Chengdu Longquanyi Football ສາມາດບັນຈຸຜູ້ຊົມບໍ່ຕໍ່າກວ່າ 27.000 ຄົນ.
ແຟຣານ ໂຊເຣຍໂນ້ ຜູ້ບໍລິຫານລະດັບສູງຂອງກຸ່ມບໍລິສັດ City Football Group ຂອງສະໂມສອນແມນຊິຕີ້ ກ່າວວ່າ: ພວກເຮົາເຊື່ອໝັ້ນຢ່າງຍິ່ງກັບການພັດທະນາຂອງວົງການບານເຕະຈີນ, ພວກເຮົາມີແຜນໄລຍະຍາວໃນການສ້າງທີມ ແລະ ພັດທະນາທີມ.
ສື່ຊວນ ຈິວນິວ ເປັນສະໂມສອນທີ 7 ທີ່ສະໂມສອນແມນຊິຕີ້ ຊື້ມາບໍລິຫານຕໍ່ຈາກ ນິວຢ໋ອກ ເອັຟຊີ ທີມໃນລີກສູງສຸດຂອງສະຫະລັດອາເມລິກາ, ເມວເບິນ ຊິຕີ້ ເອັຟຊີ ທີມໃນລີກສູງສຸດຂອງອົດສະຕຣາລີ, ໂຢໂກຮາມາ ເອັຟ ມາຣີນັອສ ເອັຟຊີ ທີມໃນລີກສູງສຸດຂອງຍີ່ປຸ່ນ, ຄລັບ ແອັດເລຕິໂກ ຕໍຣເກ ທີມໃນລີກຂອງອຸຣຸໄກວ ແລະ ຄີໂຣນາ ເອັຟຊີ ທີມໃນລາລີກາ ສະເປນ. ປັດຈຸບັນກຳລັງພິຈາລະນາຊື້ສະໂມສອນທີ 8 ເປັນທີມໃນອິນເດຍ.
