ລາວຫາລືປະຕິບັດຍຸດທະສາດເຕີບໂຕສີຂຽວ
ກອງປະຊຸມປຶກສາຫາລືການຈັດຕັ້ງປະຕິບັດຍຸດທະສາດການເຕີບໂຕສີຂຽວແຫ່ງຊາດຂອງ ສປປ ລາວ ແຕ່ນີ້ຮອດປີ 2030 ໄດ້ຈັດຂຶ້ນໃນວັນທີ 5 ມີນານີ້ ຢູ່ນະຄອນຫລວງວຽງຈັນ ໂດຍການເປັນປະທານຂອງທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ມີລັດຖະມົນຕີກະຊວງແຜນການ ແລະ ການລົງທຶນ, ຫົວໜ້າສະຖາບັນຄົ້ນຄວ້າເສດຖະກິດແຫ່ງຊາດ ພ້ອມດ້ວຍຂະແໜງການກ່ຽວຂ້ອງຕ່າງໆເຂົ້າຮ່ວມ.
ທ່ານ ບົວສອນ ບຸບຜາວັນ ຫົວໜ້າສະຖາບັນຄົ້ນຄວ້າເສດຖະກິດແຫ່ງຊາດ ໃຫ້ຮູ້ວ່າ: ຍຸດທະສາດດັ່ງກ່າວແມ່ນລັດຖະບານໄດ້ຮັບຮອງ ແລະ ປະກາດໃຊ້ໃນຕົ້ນປີ 2019 ນີ້ ໂດຍເລັ່ງໃສ່ຊຸກຍູ້ການຂະຫຍາຍຕົວຂອງເສດຖະກິດ ແລະ ຫລຸດຜ່ອນຄວາມທຸກຍາກຂອງປະຊາຊົນບັນດາເຜົ່າ, ຊຸກຍູ້ການນຳໃຊ້ຊັບພະຍາກອນຢ່າງຈຳກັດ ແລະ ມີປະສິດທິຜົນ ແລະ ຫລຸດຜ່ອນຄວາມສ່ຽງຂອງເສດຖະກິດຕໍ່ໄພພິບັດທາງທຳມະຊາດ ແລະ ການເໜັງຕີງຂອງເສດຖະກິດໂລກ ແລະ ເພື່ອຜັນຂະຫຍາຍຍຸດທະສາດດັ່ງກ່າວໃຫ້ມີປະສິດທິຜົນ ແມ່ນຕ້ອງໄດ້ສ້າງຕັ້ງບັນດາໜ່ວຍງານ ແລະ ກົນໄກຕ່າງໆຄື: ສ້າງຕັ້ງສູນສົ່ງເສີມການເຕີບໂຕສີຂຽວແຫ່ງຊາດ, ສ້າງກົນໄກການເງິນ ແລະ ການສະໝັກເຂົ້າເປັນສະມາຊິກສົ່ງເສີມເສດຖະກິດສີຂຽວຂອງອົງການສະຫະປະຊາຊາດ.
ທ່ານຮອງນາຍົກລັດຖະມົນຕີ ສົມດີ ດວງດີ ກ່າວວ່າ: ວຽກງານການ ເຕີບໂຕສີຂຽວຖືເປັນບູລິມະສິດຂອງລັດຖະບານ ໂດຍໄດ້ເຊື່ອມສານເຂົ້າໃນວິ ໄສທັດຮອດປີ 2030, ຍຸດທະສາດການພັດທະນາ 10 ປີ ແລະ ແຜນພັດທະ ນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII (2016-2020). ສະນັ້ນ ວຽກງານນີ້ຈຶ່ງພົວພັນກັບທຸກຂະແໜງການ ນັບແຕ່ສູນກາງ ແລະ ທ້ອງຖິ່ນ. ດັ່ງນັ້ນ ການປຶກສາຫາລືເພື່ອຜັນຂະຫຍາຍຍຸດທະສາດດັ່ງກ່າວໃຫ້ເປັນເອກະພາບຈຶ່ງເປັນຂັ້ນຕອນສຳຄັນຂອງທຸກຂະແໜງການ ເພື່ອຈັດຕັ້ງປະຕິບັດໃຫ້ມີຜົນສຳເລັດດີ.
