ເກີດເຫດໄຟໄໝ້ເຮືອນປະຊາຊົນຢູ່ບ້ານຊ້າງຄູ້ເສຍຫາຍ 1 ຫລັງ
ຕຳຫລວດສະກັດກັ້ນ ແລະ ມອດໄຟນະຄອນຫລວງວຽງຈັນ ໃຫ້ຮູ້ວ່າ: ໃນຕອນເຊົ້າຂອງວັນທີ 5 ມີນານີ້, ໄດ້ເກີດເຫດໄຟໄໝ້ເຮືອນ 1 ຫລັງຢູ່ບ້ານ ຊ້າງຄູ້, ເມືອງໄຊທານີນະຄອນຫລວງວຽງຈັນ, ເຊິ່ງເຈົ້າໜ້າທີ່ໄດ້ລະດົມກຳລັງລົດມອດໄຟກວ່າ 10 ຄັນ, ເພື່ອສະກັດກັ້ນບໍ່ໃຫ້ຂະຫຍາຍອອກເປັນວົງກ້ວາງ, ຜ່ານການສືບສວນ-ສອບສວນ ເບື້ອງຕົ້ນຂອງເຈົ້າໜ້າທີ່ຄາດວ່າ: ສາເຫດການເກີດໄຟໄໝ້ຄັ້ງນີ້ ອາດແມ່ນຍ້ອນໄຕ້ທູບທຽນບູຊາ, ຊຶ່ງລູກເຈົ້າຂອງເຮືອນໃຫຮູ້ວ່າ: ໄຟໄດ້ລຸກໄໝ້ອອກຈາກຫ້ອງພະຢູ່ຊັ້ນສອງຂອງເຮືອນແລ້ວລຸກລາມອອກໄປ, ແຕ່ບໍ່ມີຜູ້ໄດ້ຮັບບາດເຈັບ.
ເຈົ້າໜ້າທີ່ ໃຫ້ຮູ້ວ່າ: ໃນປີຜ່ານມາ, ທົ່ວປະເທດມີອັກຄີໄພເກີດຂຶ້ນ 177 ຄັ້ງທຽບໃສ່ປີ 2017 ຫລຸດລົງ 2 ຄັ້ງ, ມີເຮືອນປະຊາຊົນຖືກໄຟໄໝ້ເສຍຫາຍ 143 ຫລັງ, ລົດລາກ 4 ຄັນ, ລົດດາມ 2 ຄັນ, ຕະຫລາດ 3 ແຫ່ງ ແລະ ມີຜູ້ເສຍຊີວິດ 6 ຄົນຢູ່ 3 ແຂວງຄື: ຜົ້ງສາລີ, ໄຊຍະບູລີ ແລະ ຈໍາປາສັກ ລວມມູນຄ່າເສຍຫາຍທັງໝົດສູງເຖິງ 33 ຕື້ກວ່າກີບ. ໃນນີ້ເສຍຫາຍຫລາຍກ່ວາໝູ່ແມ່ນເຫດການໄຟໄໝ້ລົດລາກ 12 ລໍ້ ແລະ ລົດຈົກຂອງທ້າວ ຄໍາຊາຍ ຢູ່ບ້ານກົດ, ເມືອງໄຊແຂວງອຸດົມໄຊ ໃນວັນທີ 13 ກຸມພາຜ່ານມາຕົກເປັນ ມູນຄ່າ 3,80 ຕື້ກ່ວາກີບ, ຮອງລົງມາແມ່ນເຫດໄຟໄໝ້ສາງເກັບມ້ຽນອາໄຫລ່ລົດຂອງບໍລິສັດ ມິດຊຽງ ຈໍາກັດ ຢູ່ບ້ານສະພັງມຶກ, ເມືອງໄຊທານີນະຄອນຫລວງວຽງຈັນໃນວັນທີ 23 ພະຈິກ 2018 ຜ່ານມານີ້, ມູນຄ່າຄວາມເສຍ ຫາຍຫລາຍກວ່າ 2 ຕື້ກີບ. ສາເຫດຂອງອັກຄີໄພທີ່ເກີດຂຶ້ນຕົ້ນຕໍຍັງແມ່ນໄຟຟ້າລັດວົງຈອນ 54 ຄັ້ງ, ຮອງລົງມາແມ່ນຄົນຈູດ 35 ຄັ້ງ, ໄຕ້ທູບຈູດທຽນບູຊາ 13 ຄັ້ງ, ຈູດຂີ້ເຫຍື່ອລາມໃສ່ 9 ຄັ້ງ ແລະ ອື່ນໆ.
ເຖິງວ່າໃນໄລຍະຜ່ານມານີ້ ເຈົ້າໜ້າທີ່ກ່ຽວຂ້ອງໄດ້ເອົາໃຈໃສ່ລົງໂຄສະນາເຜີຍແຜ່ກ່ຽວກັບສະຕິ ແລະ ວິທີປ້ອງກັນອັກຄີໄພຢູ່ສຳນັກງານ, ອົງການ, ໂຮງຈັກໂຮງງານ ແລະ ບັນດາບ້ານຕ່າງໆຢ່າງຕໍ່ເນື່ອງແລ້ວກໍຕາມ ແຕ່ກໍຍັງມີເຫດການບໍ່ເພິງປາດຖະໜາດັ່ງກ່າວເກີດຂຶ້ນຫລາຍ, ໂດຍສະເພາະຢູ່ນະຄອນຫລວງວຽງຈັນ, ຍ້ອນສະຕິຕໍ່ການສະກັດກັ້ນ ແລະ ຕ້ານອັກຄີໄພ ຍັງບໍ່ສູງ. ອີກປະການຫນຶ່ງ, ໃນການຈັດຕັ້ງປະຕິບັດວຽກງານຕົວຈິງຂອງເຈົ້າໜ້າທີ່ຕຳຫລວດສະກັດກັ້ນ ແລະ ຕ້ານອັກຄີໄພ, ຍັງພົບຄວາມຫຍຸ້ງຍາກຫລາຍຢ່າງເປັນຕົ້ນ: ພາຫະນະຮັບໃຊ້ ແລະ ພະນັກງານມອດໄຟບໍ່ພຽງພໍກັບຄວາມ ຕ້ອງການ, ແຫລ່ງນ້ຳທີ່ຈະນໍາມາໃຊ້ເຂົ້າໃນການມອດໄຟມີໜ້ອຍ ຈຶ່ງເຮັດໃຫ້ການໄປເອົານ້ຳມາມອດໄຟເວລາເກີດອັກຄີໄພໃນບາງຄັ້ງຊັກຊ້າ. ນອກຈາກນີ້, ການເດີນທາງໄປຫາຈຸດເກີດເຫດໃນບາງຄັ້ງຄາວ ກໍຍັງຊັກຊ້າເຊັ່ນກັນ, ໂດຍສະເພາະແມ່ນໃນໂມງເຂົ້າການ-ເລີກການ ຍ້ອນການສັນຈອນແອອັດ, ຈຶ່ງເຮັດໃຫ້ບາງຄັ້ງຄາວເກີດມີຫາງສຽງວິພາກວິຈານຈາກສັງຄົມຍ້ອນບໍ່ເຂົ້າໃຈຕໍ່ສະພາບຄວາມເປັນຈິງດັ່ງກ່າວ.
