ປີ 2019 ທິບພະຍະປະກັນໄພ ຕັ້ງຍອດຂາຍເພີ່ມຂຶ້ນ 50%
ໃນວັນທີ 1 ມີນານີ້, ບໍລິສັດ ທິບພະຍະປະກັນໄພ (ລາວ) ຈໍາກັດ ໄດ້ຈັດກອງປະຊຸມຕົວແທນທົ່ວປະເທດ ຂຶ້ນທີ່ຫໍປະຊຸມແຫ່ງຊາດ ໃນນະຄອນ ຫລວງວຽງຈັນ, ໂດຍການເປັນປະທານຂອງ ທ່ານ ຫໍລະດີ ວໍລະຣາດ ຜູ້ອໍານວຍການໃຫຍ່ ບໍລິສັດດັ່ງກ່າວ, ມີທ່ານ ສະຍາມ ຣາມມະສູດ ປະທານຄະນະກໍາມະການຂັບເຄື່ອນທຸລະກິດ ບໍລິສັດ ທິບພະຍະປະກັນໄພລາວ ຈໍາກັດ ແລະ ທ່ານ ໂພໄຊ ໝັ້ນພິລາພັນ ທີ່ປຶກສາຝ່າຍກົດຫມາຍ ແລະ ກວດສອບ ພ້ອມຕົວແທນທົ່ວປະເທດເຂົ້າຮ່ວມເປັນຈໍານວນຫລາຍ.
ທ່ານ ຫໍລະດີ ວໍລະຣາດ ຜູ້ອໍານວຍການໃຫຍ່ ບໍລິສັດ ໃຫ້ຮູ້ວ່າ: ບໍລິສັດຂອງຕົນໄດ້ສ້າງຕັ້ງຂຶ້ນມາເປັນເວລາ 5 ປີ ແລ້ວ ແລະ ເປັນໄລຍະທີ່ໄດ້ຜ່ານຜ່າອຸປະສັກນາໆປະການ ແຕ່ກໍສາມາດຍາດໄດ້ຜົນສໍາເລັດອັນພົ້ນເດັ່ນຫລາຍດ້ານຄື: ຕົນເອງໄດ້ຮັບການຄັດເລືອກຈາກ 24 ບໍລິສັດປະກັນໄພໃນລາວ ໃຫ້ເປັນປະທານສະມາຄົມປະກັນໄພ ແຫ່ງ ສປປ ລາວ ຄົນທໍາອິດຂອງປະເທດ; ສາມາດປະມູນການປະກັນໄພເຂື່ອນໄຟຟ້າພະລັງນໍ້າໄດ້ 10 ເຂື່ອນ ແລະ ໂຮງງານໄຟຟ້າແສງຕາເວັນ 5 ແຫ່ງ ພ້ອມທັງໄດ້ຮັບໂລ້ລາງວັນທຸລະກິດດີເດັ່ນ 30 ປີ ຈາກສະພາການຄ້າ ແລະ ອຸດສາຫະກໍາແຫ່ງຊາດລາວ. ພ້ອມນີ້, ການເຕີບໃຫຍ່ທາງດ້ານທຸລະກິດກໍມີການຂະຫຍາຍຕົວຂຶ້ນເລື້ອຍໆຈາກຕົວເລກຍອດຂາຍ ປີ 2018, ເພີ່ມຂຶ້ນ 37% ຈາກປີ 2016 ແລະ ເພີ່ມຂຶ້ນ 70,6% ຈາກປີ 2017.
ທ່ານຜູ້ອໍານວຍການໃຫຍ່ ບໍລິສັດ ທິບພະຍະປະກັນໄພ ລາວ ຈໍາກັດ ໃຫ້ຮູ້ວ່າຕື່ມວ່າ: ປີນີ້ ກ້າວເຂົ້າເປັນປີທີ 6 ຂອງການດໍາເນີນທຸລະກິດໃນລາວແລະ ໄດ້ວາງຍຸດທະສາດຄື: Tip First ໝາຍເຖິງ ການກ້າວຂຶ້ນເປັນຜູ້ນໍາໜ້າໃນການຂາຍປະກັນໄພຢູ່ລາວໃນອານາຄົດ. ສໍາລັບ ນະໂຍບາຍ ປີ 2019 ນີ້ໄດ້ວາງເປົ້າໝາຍເພີ່ມຂຶ້ນໃຫ້ໄດ້ຢ່າງຕໍ່າ 50% ຈາກຍອດຂາຍປີ 2018 ແລະເພື່ອບັນລຸເປົ້າໝາຍດັ່ງກ່າວ, ບໍລິສັດໄດ້ວາງກົນລະຍຸດຕະຫລາດໃໝ່ ແລະ ປັບປຸງດັດແກ້ເນື້ອໃນສັນຍາຄືນໃໝ່ໃຫ້ສອດຄ່ອງ ແລະ ແທດເໝາະກັບສະພາບຄວາມຮຽກ ຮ້ອງຕ້ອງການຂອງປະກັນໄພໃນໄລຍະໃໝ່.
ໃນໂອກາດດັ່ງກ່າວ, ທ່ານ ສະຍາມ ຣາມມະສູນ ໃຫ້ຮູ້ຕື່ມວ່າ: ເພື່ອສ້າງຄວາມໝັ້ນໃຈ ແລະ ເຊື່ອໝັ້ນໃຫ້ກັບຕົວແທນຈໍາໜ່າຍທົ່ວປະເທດກ່ຽວກັບຄວາມຮັບຜິດຊອບໃນການໃຫ້ບໍລິການ ແລະ ໃຫ້ຄວາມຮູ້ແກ່ຕົວແທນກ່ຽວກັບນະໂຍບາຍຂອງບໍລິສັດ. ເນື່ອງຈາກວ່າ ທິບພະຍະປະກັນໄພ ເປັນບໍລິສັດມະຫາຊົນ ທີ່ສ້າງຂຶ້ນມາໄດ້ 68 ປີແລ້ວ ແລະ ເປັນບໍລິສັດອັນດັບໜຶ່ງຂອງປະເທດໄທ, ສໍາລັບ ທິບພະຍະປະກັນໄພລາວ ແມ່ນກ້າວເຂົ້າເປັນປີທີ 6 ເຊິ່ງໄດ້ດໍາເນີນທຸລະກິດດ້ວຍຄວາມຊື່ສັດ, ໃຫ້ບໍລິການດີ ແລະ ມີຄວາມໝັ້ນຄົງ ພ້ອມຈະກ້າວມາເປັນຜູ້ນໍາດ້ານປະກັນໄພໃນມໍ່ໆນີ້.
